SIMTECHDEV O‘zbekistondagi faoliyatini kengaytirmoqda va Markaziy Osiyoga IT-xizmatlarni eksport qilishni rejalashtirmoqda

IT Park Uzbekistan’da guruh asoschisi Artyom Gavrishin boshchiligidagi “SIMTECHDEV” kompaniyalar guruhi vakillari bilan uchrashuv bo‘lib o‘tdi. IT Park nomidan rezidentlar bilan ishlash boshqarmasi boshlig‘i Lazizbek Xudayev, rezidentlarni ro‘yxatga olish bo‘limi boshlig‘i Rufina Ismailova va rezidentlarni ro‘yxatga olish bo‘limi bosh menejeri Muhammadyusuf Azamov ishtirok etdilar. Tomonlar eksportni kengaytirish istiqbollari, ta’lim tashabbuslari, shuningdek, IT-mutaxassislarni qo‘llab-quvvatlash mexanizmlarini muhokama qildilar.

“SIMTECHDEV” kompaniyasi “CS-Cart” platformasining bosh hamkori bo‘lib, keng qamrovli IT-yechimlarni joriy etish va loyihalarni chuqur moslashtirish bo‘yicha asosiy integrator sifatida faoliyat yuritadi. Kompaniya 1000 dan ortiq mijozlarga xizmat ko‘rsatadi va AQSh hamda Yevropa bozorlarida 5000 dan ortiq loyihani amalga oshirgan.

O‘zbekistonda IT-biznesni rivojlantirish uchun yaratilgan qulay shart-sharoitlar tufayli “SIMTECHDEV” nafaqat bozorga kirish, balki bir vaqtning o‘zida uchta yuridik shaxsni ro‘yxatdan o‘tkazib, mustahkam o‘rnashib olishga qaror qildi. Mamlakatda quyidagi kompaniyalar ochildi: “Simtechdev” — guruh manfaatlarini ifodalovchi bosh ofis; “DevLabs” — dasturiy ta’minotni ishlab chiqish bilan shug‘ullanadigan sho‘ba tuzilma; shuningdek, “Searchanise East” — “Searchanise” qidiruv yechimini mahalliy va xalqaro bozorlarda ilgari surish uchun mas’ul bo‘lgan bo‘linma.

Uchrashuv davomida tomonlar eksportni rivojlantirish istiqbollari va mahalliy tashabbuslarni muhokama qildilar. “SIMTECHDEV” vakillariga IT Park dasturlari, jumladan, rezidentlarning xalqaro bozorlarga chiqishini qo‘llab-quvvatlashga qaratilgan “Local2Global” dasturi taqdim etildi. Kompaniya Markaziy Osiyo mamlakatlariga IT-xizmatlar eksportini kengaytirish va Toshkentdagi ofisni mintaqaviy markaz sifatida shakllantirish bo‘yicha qiziqish bildirdi.

Bundan tashqari, “SIMTECHDEV” bitiruvchilarni keyinchalik ish bilan ta’minlash maqsadida o‘z ta’lim dasturini ishga tushirganini ma’lum qildi, shuningdek, O‘zbekistonda IT-maktablar ochishga intilayotganini bildirdi. Kompaniya, shuningdek, IT Park tomonidan tashkil etiladigan sohaviy tadbirlarida ishtirok etishga tayyorligini tasdiqladi va IT-mutaxassislar uchun imtiyozli kreditlash mexanizmlarini, jumladan, IT-ipoteka va maqsadli kreditlarni ko‘rib chiqish tashabbusini ilgari surdi.

IT Park Uzbekistan “SIMTECHDEV” kompaniyasining mahalliy IT-ekotizimni rivojlantirishdagi faol ishtirokini olqishlaydi va eksport, kadrlar tayyorlash hamda sohaning barqaror o‘sishi uchun yangi tashabbuslarni joriy etish bo‘yicha kelgusidagi hamkorlikni maqsad qilgan.