Banklar va startaplar uchun innovatsion hamkorlik: Fintech sohasidagi yangi imkoniyatlar

Toshkentda Raqamli texnologiyalar vazirligida bank sektori, fintech kompaniyalari va startap ekotizimi vakillari uchun seminar o‘tkazildi. Tadbir Raqamli texnologiyalar vazirligi, IT Park Uzbekistan va “Plug&Play” tomonidan tashkil etildi hamda korporativ innovatsiyalarni rivojlantirishning yangi mexanizmlari va startap studiyalar bilan hamkorlikni muhokama qilishga bag‘ishlandi. Davra suhbatida 10 ta bank vakillari ishtirok etdi.

Davra suhbatini IT Park biznesni rivojlantirish bo‘yicha direktori Jahongir Radjabov boshlab berdi.

Bank sektori, fintech kompaniyalari va startap ekotizimi vakillari banklarning texnologik loyihalar bilan o‘zaro hamkorlik mexanizmini muhokama qilish, shuningdek, fintech sohasida innovatsion yechimlarni birgalikda amalga oshirish yo‘llarini belgilash uchun to‘planishdi.

IT Park vakili Elyor Maqsudov IT Park’ning startaplarni qo‘llab-quvvatlash bo‘yicha faoliyati natijalari, shuningdek, startap studiyalar loyihasi haqida ma’lumot berdi.

“Plug and Play Uzbekistan” moliyaviy texnologiyalar va sun’iy intellektga e’tibor qaratgan 4 ta akseleratsiya dasturini ishga tushirib, mamlakatda innovatsion ekotizimni faol rivojlantirmoqda. Asosiy yutuqlar orasida 57 ta startapni qo‘llab-quvvatlash, 450 dan ortiq ish o‘rni yaratish va 3,7 million dollar investitsiyalarni jalb qilish, jumladan, kompaniyalarning O‘zbekiston, Qozog‘iston va boshqa mamlakatlar bozorlariga chiqishi bor.

Davra suhbatida Muhammadjon Mahmudov va Alfredo Gomes startaplarni korporativ ekotizimlarga, ayniqsa bank sektoriga muvaffaqiyatli integratsiya qilish misollari bilan o‘rtoqlashdilar. Ular “Plug and Play”ning global tajribasi, jumladan, yetakchi moliya institutlari bilan hamkorligi haqida so‘zlab berdilar va bunday hamkorlik raqamli transformatsiyani qanday tezlashtirishini ta’kidladilar. Akseleratsiyadan so‘ng O‘zbekiston, Misr va AQSh bozorlariga kengayib, daromadini 2,6 baravarga oshirgan “Cybernet” (Qozog‘iston) loyihasiga alohida e’tibor qaratildi.

Davra suhbati davomida fintech startaplari taqdimoti o‘tkazildi. “Plug&Play” akseleratorining 4-to‘lqinidan to‘rtta loyiha raqamli to‘lovlar, kreditlash va ma’lumotlarni tahlil qilish bo‘yicha o‘z yechimlarini taqdim etdi. Ular orasida:

• 4Rize — fintech mahsulotlarini tahlil qilish platformasi bo‘lib, u o‘nlab hisoblarni ochmasdan turib eng yaxshi amaliyotlarni o‘rganish uchun yetakchi bank va fintech ilovalaridan skrinshot va foydalanuvchi tajribasi videolarini taqdim etadi.
• Jett — har qanday mobil ilovani ikki hafta ichida investitsiya platformasiga aylantiradigan mini-ilova bo‘lib, foydalanuvchilar uchun hisob ochishdan tortib, tahlil qilish va foydani yechib olishgacha bo‘lgan to‘liq xizmatlar doirasini taklif etadi.
• 1doc — himoyalangan platformada barcha qonuniy talablarga rioya qilgan holda sun’iy intellekt yuristining yordami bilan hujjatlarni onlayn yaratish, tahrirlash, yuborish va imzolashning eng oson usuli.
• Karmon — o‘yinlashtirish orqali byudjetni nazorat qilish, qarzlarni boshqarish va moliyaviy savodxonlikni oshirishni osonlashtiradigan shaxsiy moliyani boshqarish ilovasi.

Jahongir Radjabov, IT Park biznesni rivojlantirish bo‘yicha direktori:

“Bugungi muloqot an’anaviy banking va texnologik innovatsiyalar uyg‘unligi qanchalik muhimligini ko‘rsatdi. Biz startaplar o‘z yechimlarini haqiqiy bozor ishtirokchilari bilan sinovdan o‘tkazishi, banklar esa mijozlar bazasini kengaytirish va jarayonlarni optimallashtirish uchun ilg‘or vositalarni joriy etishi uchun muhit yaratmoqdamiz.”

Tadbir qo‘shma tashabbuslarni yo‘lga qo‘yish uchun boshlang‘ich nuqta bo‘ldi. Muhokamalar va taqdimotlar zamonaviy bozor muammolari uchun moslashuvchan yechimlarni yaratishda banklar, moliyaviy texnologiyalar va startaplar o‘rtasidagi hamkorlikning muhim rolini ta’kidladi.

Startaplarni korporativ ekotizimlarga integratsiya qilishning muvaffaqiyatli holatlari, shuningdek, raqamli to‘lovlar va moliyani boshqarish sohasidagi loyihalar namoyishi bunday hamkorlik mamlakatning fintech tajribalari va tarmoqlararo hamkorlik uchun istiqbolli markaz sifatidagi mavqeini mustahkamlayotganini tasdiqladi.