Buxoro viloyatida tadbirkor xotin-qizlarni qoʻllab-quvvatlash boʻyicha loyiha oʻz yakuniga yetdi

Xotin-qizlar tadbirkorligini qo‘llab-quvvatlash va xotin-qizlar bandligini taʼminlash har qanday davlatning asosiy vazifalaridan biridir. Shu bois tadbirkor xotin-qizlarga yordam berishga qaratilgan turli loyihalar ishga tushirilmoqda. Bunday dasturlardan biri IT Park va Astrum IT-Akademiyasi tomonidan YXHTning Buxoro viloyatidagi tadbirkor ayollar uchun IT koʻnikmalari va raqamli marketing boʻyicha malakasini oshirish dasturi doirasida amalga oshirilgan “Iqtisodiy rivojlanishni qoʻllab-quvvatlash” loyihasi edi.

22-dekabr kuni loyihaning yopilishi bo‘lib o‘tdi. Yakuniy tadbirda YXHT vakili Nargiza Karimova, Buxorodagi IT Park filiali direktori Sobir Safarov, IT Park vakillari, shuningdek, kurs o‘qituvchilari va bitiruvchilari ishtirok etishdi.

Iqtisodiy rivojlanishni qo‘llab-quvvatlash dasturi Buxoro viloyatida hunarmandchilik bilan shug‘ullanayotgan ayollar uchun bepul malaka oshirish kurslari edi. Loyihaning asosiy maqsadi axborot texnologiyalari va raqamlashtirish orqali tadbirkor ayollarning biznes salohiyatini oshirish, shuningdek, O‘zbekistonning ijtimoiy-iqtisodiy hayotida xotin-qizlarning imkoniyatlarini kengaytirishdan iborat edi. 

Bepul o‘quv kurslariga arizalar qabuli 15-noyabrda boshlangan va 21-noyabrda yakunlangan. Kurs dasturining oʻzi 1-dekabrdan boshlangan.

Eslatib o‘tamiz, dasturda ishtirok etish uchun 30 yoshdan 60 yoshgacha bo‘lgan jami 227 nafar ayol ariza topshirgan. Asosan, bu hunarmandlar, tikuvchilar, tadbirkorlar va xizmat koʻrsatish sohasi vakillari.

Bir nechta dastur ishtirokchilari loyihada qatnashish haqidagi taassurotlari bilan boʻlishdilar.

“Loyiha davomida men Microsoft Word, Excel, PowerPoint, Photoshop kabi dasturlarda, shuningdek, OLX, Uzum Market kabi platformalarda ishlashni o‘rgandim. Oʻqish davrida olgan bilimlarimni kelajakda, faoliyatimni rivojlantirishda qoʻllayman. Kelajakda bunday loyihalar imkon qadar ko‘proq bo‘lishi tarafdoriman” – dedi tadbirkor Qulnoz Samiyeva.

“Men ushbu loyiha haqida ijtimoiy tarmoqlar orqali bilib oldim va darhol roʻyxatdan oʻtdim. IT orqali tadbirkorlik faoliyatimni kengaytirish, elektron tijorat va chakana marketingdan keng foydalanish maqsadida kurslarga bordim. IT sohasi orqali oʻz faoliyatimizni rivojlantirish yo‘llarini o‘rgatgan loyihadan juda minnatdorman” – deya o‘z taassurotlari bilan boʻlishdi tadbirkor Mehriniso Xamedova.

Tadbir yakunida dasturning barcha ishtirokchilariga sertifikatlar topshirildi.

Eslatib oʻtamiz, dastur ikki bosqichdan iborat edi. Test sinovlaridan muvaffaqiyatli o‘tgan ishtirokchilar o‘quv kursining birinchi bosqichiga qabul qilindilar, unda 150 nafar tadbirkor ayol axborot texnologiyalari va kompyuter savodxonligi bo‘yicha o‘qitildi. Keyin, birinchi bosqichdan muvaffaqiyatli o‘tgan 90 nafar ishtirokchi elektron tijorat va raqamli marketingda IT-vositalar bo‘yicha malaka oshirishning ikkinchi bosqichiga qabul qilindi.