Creative Incubator final bosqichi: Toshkentda eng yaxshi kreativ tadbirkorlar taqdirlandi

IT Park Uzbekistan, O‘zbekiston Madaniyat va san’atni rivojlantirish jamg‘armasi hamda Toshkentdagi Westminster xalqaro universiteti bilan hamkorlikda butun mamlakat bo‘ylab kreativ iqtisodiyot sohasidagi yosh tadbirkorlarni qo‘llab-quvvatlashga qaratilgan “Creative Incubator” platformasining yakuniy “Demo Day” tadbirini tashkil etishdi.

Inkubatorda ishtirok etish uchun topshirilgan 79 ta arizadan 16 ta jamoa saralab olindi, ulardan 9 tasi o‘z yakuniy taqdimotlarini namoyish etdi.

Kreativ inkubator dasturi murabbiylik yordami, seminarlar, ixtisoslashgan kompaniyalarga tashriflar, shuningdek, xalqaro ekspert Sara Raza bilan kuratorlik sessiyasini o‘z ichiga oldi. Mavzular huquqiy jihatlar, mablag‘ jalb qilish, texnologiyalarni joriy etish va mahsulotni rivojlantirish kabi yo‘nalishlarni qamrab oldi.

Madaniyat va san’atni rivojlantirish jamg‘armasi raisining birinchi o‘rinbosari Elmurod Najimov qutlov so‘zi bilan chiqdi:

“Creative Incubator — bu g‘oyalar ro‘yobga aylanadigan makon. Qabul qilingan Kreativ iqtisodiyot to‘g‘risidagi qonun va O‘zbekistonda IV Butunjahon kreativ iqtisodiyot konferensiyasining o‘tkazilishi ijodkorlik nafaqat madaniy ifoda, balki mamlakatning barqaror rivojlanishining eng muhim omili ekanligini tasdiqlovchi muhim voqealardir.”

WIUT rektorining ilm-fan va innovatsiyalar bo‘yicha o‘rinbosari doktor Bahrom Mirqosimov universitetning ta’lim jarayoniga loyihaviy va fanlararo yondashuvni joriy etish hamda talabalarni amaliy sohalarga jalb qilish borasidagi sa’y-harakatlari haqida so‘zlab berdi.

IT Park Uzbekistan marketing bo‘yicha direktori Jamila Xalibaeva quyidagilarni ta’kidladi:

“Sohalararo hamkorlik — kreativ iqtisodiyotni rivojlantirishning poydevori. Kreativ inkubator kabi tashabbuslar yosh iste’dodlar, texnologiyalar va tadbirkorlik o‘rtasida ko‘priklar qurishga xizmat qiladi. Biz ushbu platformada madaniy merosni zamonaviy biznes vositalari bilan uyg‘unlashtiradigan yechimlar paydo bo‘layotganini ko‘ryapmiz."

So‘ngra, ishtirokchilarga inkubator rezidentlarining faoliyat yo‘li haqidagi videolavha namoyish etildi, undan keyin loyiha rahbarlaridan biri va “WIUT”dagi Kreativ sanoatni boshqarish bo‘yicha magistratura dasturi o‘qituvchisi Yuliya Paramonova so‘zga chiqdi. U ta’kidlaganidek, inkubatorning ishga tushirilishi mamlakatda kreativ iqtisodiyotga qiziqish tobora ortib borayotgan bir paytda yosh ijodkorlarni murabbiylar va sanoat bilan bog‘lay oladigan amaliy platformalarga bo‘lgan ehtiyoj tufayli amalga oshirilgan.

Hakamlar hay’ati tarkibiga mamlakatning startap va kreativ sektori yetakchilari kiritildi:

• Orian-Mehroj Rashidov — Yoshlar tadbirkorligini qo‘llab-quvvatlash markazi bosh direktori va “Unicorns Venture Fund” direktori
• Dalerxon Nodirov — “IT Park Ventures” investitsiyalar bo‘yicha direktor o‘rinbosari
• Shahzod Umirzakov — “TASS VISION” hammuassisi va bosh direktori, “AI Advisory Council” rais o‘rinbosari
• Nigora Akilova — “Beautify.uz” asoschisi va bosh direktori
• Farrux Maksumov — “C-Space Startup Center” bosh direktori
• Akmal Salixov — “East Games” biznesni rivojlantirish bo‘yicha direktori

Demo Day g‘oliblari

Birinchi o‘rinni “Almanac” jamoasi egalladi — kurslar, onlayn kontent va hamjamiyat orqali an’anaviy xattotlikni o‘rganish uchun raqamli platforma. Loyiha madaniy meros va zamonaviy ta’lim yondashuvlarini birlashtiradi. G‘oliblar o‘z loyihalarini rivojlantirish uchun 30 million so‘m mukofotga ega bo’lishdi.

Ikkinchi o‘rin va 20 million so‘m mukofotni turk-islom bezak san’atiga bag‘ishlangan “Tezhip.uz” ta’lim platformasi jamoasi qo‘lga kiritdi. Loyiha turli yosh guruhlaridagi tinglovchilar uchun onlayn va oflayn kurslar hamda seminarlarni taklif etadi.

Uchinchi o‘rin va 10 million so‘m miqdoridagi sovrinni dizaynerlar, illyustratorlar va ijodkorlarni brending va kontent xizmatlariga muhtoj kompaniyalar bilan bog‘laydigan “Creatives.uz” platformasi jamoasi qo‘lga kiritdi.

Bunday tashabbuslar yangi ekotizimni shakllantirmoqda, unda yoshlarning ijodiy salohiyati barqaror rivojlanishning poydevoriga aylanmoqda. IT Park Uzbekistan o‘zbek iste’dodlarining global salohiyatini ochib bergan holda innovatsiyalar, madaniyat va tadbirkorlikni birlashtiruvchi platformalarni qo‘llab-quvvatlashda davom etmoqda.