IT Park biznesni koʻchirish jarayonini qoʻllab-quvvatlash uchun Binghalib Group bilan muzokaralar oʻtkazdi

IT Park delegatsiyasi kompaniya bosh direktori Muhammad Bingalib boshchiligidagi “Binghalib Group” bilan muzokaralar oʻtkazdi. Birlashgan Arab Amirliklarida tashkil etilgan va elektrotexnika, ishlab chiqarish hamda savdo sohasida ixtisoslashgan kompaniya bilan uchrashuvda Oʻzbekistonda ofis ochish va biznesning katta qismini mamlakatga koʻchirish rejalari muhokama qilindi.

Bu nima uchun muhim?

“Binghalib Group” 1982-yilda tashkil etilgan boʻlib, yillik daromadi taxminan 55,3 million dollar va 140 nafardan ortiq xodimi bilan elektrotexnika yechimlari bozorining eng yirik ishtirokchilaridan biri hisoblanadi. Kompaniya butun dunyo boʻylab yetakchi OEM brendlari manfaatlarini ifodalaydi va ikki tomonlama simsiz aloqa, binolarni avtomatlashtirish va sanoat avtomatlashtirish kabi sohalarda oʻz faoliyatini faol kengaytirmoqda.

“Binghalib Group” BAAda koʻplab mijozlarga ega boʻlib, ular uchun mintaqadagi ishchi kuchining yuqori narxi muhim masala hisoblanadi. Shu nuqtai nazardan, Oʻzbekiston arzonroq va malakali kadrlar bilan biznesni koʻchirish uchun jozibador yoʻnalishga aylanmoqda.

“Binghalib Group” vakillari Oʻzbekistonda til tayyorgarligi boʻyicha afzalliklar mavjudligini taʼkidladilar. Xususan, yoshlarimizning xorijiy tillarni oʻrganishga va erkin talaffuz qilishga moyilligi yuqori ekanini, bu esa xodimlar orasida til koʻnikmalari sifatini oshirishga xizmat qilishini taʼkidladilar. Bu MENA mintaqasidagi mamlakatlarda mijozlarga xizmat koʻrsatish uchun ayniqsa muhim boʻlgan, ingliz tilini yuqori darajada biladigan kadrlarni tayyorlash imkoniyatlarini ochadi.

Kompaniyaning strategik rejalaridan biri 3-5 yil ichida Oʻzbekistonda 2000 dan ortiq ish oʻrni yaratishdir. Bu “Binghalib Group”ga xalqaro bozorlarda, shu jumladan MENA mintaqasidagi mamlakatlarda oʻz faoliyatini kengaytirish imkonini beradi.

IT Park yordami va biznes uchun afzalliklar

Muzokaralar davomida IT Park vakillari Oʻzbekistonda biznes yuritish qulayligini taʼkidladilar — texnopark rezidentlari uchun noyob qoʻllab-quvvatlash dasturlari, shuningdek, startaplar va xorijiy investorlar uchun soddalashtirilgan jarayonlar taqdim etilmoqda. Hatto maxsus iqtisodiy zonalarda ham kompaniyalar byurokratik qiyinchiliklarga duch keladigan MENA mintaqasidagi koʻplab mamlakatlardan farqli oʻlaroq, Oʻzbekiston biznes uchun ancha moslashuvchan sharoitlarni taklif etadi.

Uchrashuv davomida IT Park rezidenti boʻlmagan kompaniyalar uchun bank operatsiyalari jarayonlari koʻproq vaqt olishi mumkinligi taʼkidlandi. Xususan, xalqaro oʻtkazmalar va moliyaviy operatsiyalar qoʻshimcha tartib-taomillar va vaqt talab qilishi mumkin. Biroq, IT Park rezidentlari noyob infratuzilma va biznes yuritishning soddalashtirilgan tizimi tufayli moliyaviy tranzaksiyalar jarayonlarini sezilarli darajada tezlashtirishi mumkin. Bu IT Park oʻz rezidentlari uchun faol rivojlantirayotgan va Oʻzbekistonni xorijiy kompaniyalar uchun yanada jozibador qiladigan “Ease of Doing Business” tizimining muhimligini koʻrsatadi.

Bundan tashqari, “Binghalib Group” vakillari davlat tomonidan qoʻllab-quvvatlashning afzalliklari va Oʻzbekiston xorijiy investorlar uchun taqdim etayotgan noyob imkoniyatlarni taʼkidladilar. Xususan, Muhammad Bingalib koʻplab erkin iqtisodiy zonalar mavjud boʻlishiga qaramay, Oʻzbekiston tomonidan taklif etilayotgan imtiyozlarni MENA mintaqasidagi mamlakatlarda topish qiyinligini aytdi. Bunday sharoitlar Oʻzbekistonni operatsion xarajatlarni kamaytirish va xizmatlar sifatini yaxshilashga intilayotgan kompaniyalar uchun jozibador qiladi, shu bilan birga malakali kadrlarga ega boʻlish imkonini beradi.

Istiqbollar va strategik qadamlar

“Binghalib Group” tomonidan koʻrsatilgan qiziqish Oʻzbekistonda mamlakatni global IT-habga aylantirish boʻyicha koʻrilgan chora-tadbirlarning samaradorligini taʼkidlaydi, shuningdek, MENA mintaqasiga eksport ulushini oshirishga yordam beradi. IT Park kompaniyaning mamlakat hududida biznesini muvaffaqiyatli mahalliylashtirish va kengaytirish uchun barcha zarur yordamni taklif qilishga tayyorligini tasdiqladi. Ushbu hamkorlik O‘zbekistonning IT-ekotizimini mustahkamlash va IT sohasini rivojlantirish yo‘lidagi muhim qadam bo‘lib, mamlakatda ish o‘rinlarini yaratish va iqtisodiy sharoitlarni yaxshilashga xizmat qiladi.