IT Park Uzbekistan TONOMUS bilan hamkorlik istiqbollarini muhokama qildi

IT Park Uzbekistan Bosh direktori Farhod Ibragimov boshchiligidagi delegatsiya “TONOMUS” kompaniyasi moliyaviy direktori Olive Saj bilan muzokaralar oʻtkazdi. Texnopark vakillari Oʻzbekistonda ofis ochish va IT Park rezidenti boʻlish uchun jozibali imkoniyatlar haqida maʼlumot berdilar.

“TONOMUS” — Saudiya Arabistonining Neom shahrida joylashgan bosh qarorgohi bilan kognitiv texnologiyalar va raqamli infratuzilma sohasidagi jahon yetakchisidir. Kompaniya sunʼiy intellekt bilan bogʻliq mahsulot va xizmatlarga 1 milliard dollardan ortiq mablagʻ sarflagan. Kompaniyaning asosiy faoliyati Saudiya Arabistonida boʻlsa-da, uning ish doirasi Osiyo, Yevropa va Afrikani bogʻlovchi sunʼiy yoʻldosh aloqasi kabi tashabbuslar orqali global hamkorliklarni qamrab oladi.

Tomonlar investitsiya sohasidagi hamkorlik istiqbollarini, jumladan sunʼiy intellekt sohasidagi mahsulot va xizmatlarni, shuningdek, Oʻzbekistonda birgalikda sarmoya kiritishning istiqbolli sohalarini aniqlash masalalarini muhokama qildilar.

Farhod Ibragimov oʻzbekistonlik startaplarni qoʻllab-quvvatlash uchun akseleratorlar va venchur studiyasini yaratish boʻyicha hamkorlik mavzusiga toʻxtalib oʻtdi. Bu loyiha kengayish, sunʼiy intellektni joriy qilish va barqaror texnologiyalar boʻyicha ekspertiza taklif etadi. “TONOMUS” vakillari sunʼiy intellekt va aqlli shaharlar sohasidagi startaplarga sarmoya kiritishga, shuningdek, ularning Saudiya Arabistoni bozoriga chiqish jarayonida qoʻllab-quvvatlashga tayyor ekanliklarini bildirdilar.

Shuningdek, tomonlar oʻzbekistonlik muhandislarni jalb qilgan holda Saudiya Arabistoni Qirolligi uchun loyihalarni autsorsing qilish yoki Oʻzbekistonda bek-ofis tashkil etish istiqbollarini muhokama qildilar. Yuqori malakali IT-mutaxassislar, xizmatlarning raqobatbardosh narxi, rivojlangan infratuzilma va davlat tomonidan qoʻllab-quvvatlanishi, shuningdek, arab tilini biladigan koʻplab mutaxassislarning mavjudligi tufayli Oʻzbekiston autsorsing loyihalarini amalga oshirish uchun jozibador maydonga aylanmoqda.

“TONOMUS” jamoasi mamlakat infratuzilmasi va inson salohiyati bilan tanishish uchun Oʻzbekistonga taklif etildi.

Kelgusida IT Park va “TONOMUS” oʻrtasidagi hamkorlik sunʼiy intellekt va raqamli infratuzilma sohasidagi loyihalarni rivojlantirishga koʻmaklashadi, mamlakatga yangi investitsiyalar va texnologiyalarni jalb qiladi. Akseleratorlar va venchur studiyasini yaratishdagi hamkorlik mahalliy startaplar uchun yangi imkoniyatlar ochib, Oʻzbekistonning mintaqadagi texnologik innovatsiyalar markazi sifatidagi oʻrnini mustahkamlaydi.