IT Park Uzbekistan va MDIST talabalarning tashabbuslarini qoʻllab-quvvatlamoqda

Toshkentdagi Singapur menejmentni rivojlantirish institutida (MDIST) IT Park Uzbekistan koʻmagida talabalarning innovatsion startaplari va gʻoyalarini qoʻllab-quvvatlashga bagʻishlangan “Demo Day” oʻtkazildi. Tadbir Oʻzbekiston biznes muhitini oʻzgartirish va rivojlantirish, xalqaro bozorga chiqish imkoniyatiga ega loyihalarini taqdim etishga intilayotgan koʻplab ishtirokchilarni jamladi.

“MDIST” prorektori Dildora Ishonxoʻjayeva va IT Park Uzbekistan vakili Doniyor Yusupov ishtirokchilarga tabrik soʻzi bilan murojaat qildilar. Ular startaplarning mamlakat iqtisodiyotidagi ahamiyatini taʼkidlab, IT Park Uzbekistan koʻrsatayotgan yordam haqida soʻzladilar hamda allaqachon investitsiyalarni jalb qilgan va xalqaro bozorga chiqishni boshlagan muvaffaqiyatli mahalliy startaplarning ilhomlantiruvchi misollarini keltirdilar. Bundan tashqari, “MDIST” biznes inkubatsiya markazi koordinatori Said Aslanov ishtirokchilarga inkubatsiya dasturining afzalliklari va startaplarning rivojlanish uchun zarur resurslar hamda mentorlik yordamiga qanday ega boʻlishi mumkinligi haqida maʼlumot berdi.

Toshkent shahridagi universitetlarning 2-3-kurs talabalari oʻzlarining innovatsion loyihalarini namoyish etdilar. Ular orasida Samandar Erkinov tomonidan taqdim etilgan “DAMDAM”, Mirzohid Choriyev tomonidan taqdim etilgan “Your Service” startapi, Shohjahon Akmalov tomonidan taqdim etilgan “ratemyedu.org” loyihasi, shuningdek, Muhammadamin Abdurahimovning “FitLook” va Sabina Gʻalimovaning “Habitat” startaplari bor edi.

Loyihalar taʼlim platformalaridan tortib moda sanoati uchun innovatsion xizmatlargacha boʻlgan keng qamrovli yoʻnalishlarni oʻz ichiga olgan boʻlib, bu talabalar orasida yuqori darajadagi ijodkorlik va tadbirkorlik ruhini namoyon etadi.

Tadbir hakamlar hayʼati tadbirkorlik va investitsiyalar sohasidagi ekspertlardan iborat boʻldi:

• Abbos Oʻtkirov, MDIS Tashkent (Biznes va menejment maktabi) oʻqituvchisi;

• Raʼno Sidiqova, “Plug and Play” dasturlari menejeri;

• Behzod Abdullayev, “IT Park Ventures” investitsiya menejeri;

• Farrux Mahsumov, “C-Space Ventures” bosh ijrochi direktori.

IT Park Uzbekistan Oʻzbekistondagi startap ekotizimini faol qoʻllab-quvvatlash va rivojlantirishni davom ettirmoqda, yosh tadbirkorlarga dolzarb vazifalar yechimini topishda koʻmaklashmoqda, resurslar taqdim etmoqda va mentorlik yordamini taʼminlamoqda. MDIST “Demo Day” tadbiri innovatsion muhitni yaratish va xalqaro maydonda raqobatlasha oladigan yangi texnologik loyihalarni yaratishni ragʻbatlantirish yoʻlidagi yana bir muhim qadam boʻldi.