IT Park Uzbekistan va TMII kelajakdagi IT-yetakchilarni tayyorlash uchun kuchlarni birlashtirmoqda

IT Park Uzbekistan va Toshkent menejment va iqtisodiyot instituti (TMII) o‘rtasida hamkorlik memorandumi imzolandi. Ushbu kelishuv raqamli iqtisodiyot sohasida malakali kadrlar tayyorlash, yoshlarni ish bilan ta’minlashga ko‘maklashish va talabalarda innovatsion fikrlashni rivojlantirish uchun mustahkam zamin yaratishga qaratilgan.

IT Park bosh direktori Abdulahad Kuchkarov va TMII rektori Hojiakbarxon Ahmedov IT Park bilan hamkorlik natijasida talabalar uchun qanday imkoniyatlar paydo bo‘lishini muhokama qildilar.

Talabalar mahalliy va xalqaro bozorlarda faoliyat yuritayotgan IT-kompaniyalar loyihalarida amaliyot o‘tash va ishtirok etish imkoniyatiga ega bo‘ladilar. Bundan tashqari, ular ta’lim tadbirlarida: soha mutaxassislarining mahorat darslari, treninglari va seminarlarida qatnashishlari mumkin.

Biznesni rivojlantirish bo‘yicha direktor Jahongir Radjabov startaplarni qo‘llab-quvvatlash imkoniyatlarini, jumladan o‘z loyihalarini ishga tushirishda yordam ko‘rsatish, mentorlar va akseleratsiya dasturlaridan foydalanish imkoniyatini ta’kidladi. Shuningdek, u qo‘shma tashabbuslar — “soft” va “hard” ko‘nikmalarni rivojlantirish uchun hakatonlar, forumlar va tematik tanlovlarda ishtirok etish haqida ham to‘xtalib o‘tdi.

 

Ushbu hamkorlik ta’lim va sanoat integratsiyasi sari qo‘yilgan qadamdir. Nazariy bilimlar amaliyotga tatbiq etiladi, talabalar esa o‘z karyeralarini muvaffaqiyatli boshlash uchun zarur ko‘nikmalarga ega bo‘ladilar.

IT Park Uzbekistan va TMII o‘rtasidagi hamkorlik ta’limni transformatsiya qilish va raqamli O‘zbekiston kelajagiga sarmoya kiritish imkoniyatlarini taqdim etadi.  Bu yuqori malakali IT-mutaxassislarning yangi avlodini shakllantirishga qaratilgan ishonchli qadamdir.