IT Park Uzbekistan Yakub Bieszczad bilan muzokaralar oʻtkazdi

Yaqinda IT Park Uzbekistan vakillari va “TT & TELCOLAB” kompaniyasi vakili Yakub Bieszczad oʻrtasida uchrashuv boʻlib oʻtdi. Mazkur uchrashuv yuqori texnologiyalar sohasidagi hamkorlikni chuqurlashtirishda muhim qadam boʻldi.

“TT & TELCOLAB” — tadqiqotlar va ishlanmalar, sertifikatlashtirish, Yevropa Ittifoqi bozorida mahsulotlarni joriy etish va sotish sohasida xizmat koʻrsatuvchi kompaniya. Shuningdek, kompaniya Yevropa bozori uchun mahsulotlarni sertifikatlashni amalga oshiruvchi yuqori texnologiyali laboratoriyaga ega.

Uchrashuvdan koʻzlangan asosiy maqsad Toshkent shahrida “TT & TELCOLAB” vakolatxonasini ochish hamda Oʻzbek kompaniyalari orasidan hamkorlar izlash imkoniyatlarini muhokama qilish edi. Bundan tashqari, Yakub Bieszczad Oʻzbekistonning yangi texnologik markaz sifatidagi mavqeyini oshirish, xalqaro kompaniyalar bilan aloqalarni oʻrnatish hamda IT va BPO sohalarida mamlakatning jahon miqyosidagi oʻrnini mustahkamlashga yordam berishni ham rejalashtirmoqda.

Ikkala tomon ham Oʻzbekiston va Polsha kompaniyalari oʻrtasida axborot texnologiyalari sohasida tajriba almashish va yangi ishbilarmonlik aloqalarini oʻrnatishga tayyor ekanliklarini bildirishdi. Oʻzbekiston bozorida allaqachon faoliyat yuritayotgan Polsha kompaniyalari mavjudligini hisobga olsak, ushbu hamkorlik har ikki tomonning yanada rivojlanishiga hissa qoʻshadi.

Shuni ham taʼkidlash joizki, IT va BPO-xizmatlari eksportining 22 foizi Yevropa davlatlari va Buyuk Britaniyaga toʻgʻri keladi — bu Oʻzbekistondan amalga oshiriladigan ikkinchi eng mashhur autsorsing yoʻnalishi hisoblanib, “TT ​​& TELCOLAB” kompaniyasi bilan hamkorlikni mahalliy axborot texnologiyalari sanoati uchun yanada istiqbolli va muhim qiladi.