O‘zbekiston va Germaniya IT-kadrlarni tayyorlashda imkoniyatlarni birlashtiradi

13-iyun kuni IT Park ofisiga Germaniya Federativ Respublikasining Toshkentdagi Favqulodda va Muxtor Elchisi Tilo Klinner va Iqtisodiy hamkorlik boʻlimi xodimi Ralf Maureder tashrif buyurdilar.

Mehmonlarni IT Park bosh direktori Farxod Ibragimov, innovatsiyalar bo‘yicha bosh direktor o‘rinbosari Jahongir Radjabov, Investitsiyalar va xalqaro aloqalar boshqarmasi boshlig‘i Nigora Mirjalilova, IT-xizmatlari eksportini rivojlantirish boʻlimi boshlig‘i Sultonmurod Rasulov va Raqamli texnologiyalar vazirligining Internet tarmog‘idagi milliy kontentni rivojlantirish boʻlimi boshlig‘i Oybek Ishanxojayev kutib oldilar.

Uchrashuv kun tartibida – kelajakdagi hamkorlik masalalarini muhokama qilish va O‘zbekiston AKT yo‘nalishi bilan tanishish.

Mehmonlarga IT Park va FZD Global GmbH – Germaniyaning Geydelbergdagi IT Park vakolatxonalari faoliyatlari taqdim etildi.

IT Park rahbari O‘zbekistonda malakali IT-kadrlar tayyorlash muhimligi haqida gapirib, One Million Uzbek Coders, Coursera, IT Bilim va ITPU kabi yirik loyihalarni misol qilib keltirdi. Shuningdek, u O‘zbekistondagi yosh mutaxassislarning salohiyatiga to‘xtalib, har yili 30 yoshgacha bo‘lgan 25 000dan ziyod talaba IT sohasida ta’lim olayotganini ta’kidladi.

Elchi Tilo Klinner IT-kadrlar tayyorlash dasturiga qiziqish bildirdi. Tomonlar ikki davlatda ham kadrlar yetishmovchiligi muammosini hal qilish maqsadida TOT(Training of trainers) sohasida hamkorlik qilishga kelishib oldilar.

Mehmonlar so‘nggi yillarda O‘zbekistonda AKT sohasida amalga oshirilgan ijobiy o‘zgarishlarni qayd etdilar. Ikki mamlakat IT-mutaxassislari va kompaniyalari uchun yangi imkoniyatlar yaratish maqsadida Germaniya Savdo-sanoat palatasi va IT Park o‘rtasidagi hamkorlik masalalariga alohida e’tibor qaratildi. Hamkorlik doirasida quyidagi dasturlar taklif etildi:

• Oʻzbekiston kompaniyalari uchun Germaniya bozoriga kirish imkonini beruvchi Softlanding dasturi;
• Germaniya kompaniyalari uchun OSS (One Stop Shop) dasturi;
• Germaniya bozorida oʻz faoliyatini kengaytirishni istagan startaplar va rezidentlar uchun akseleratsiya dasturi;
• O‘zbekiston IT-sohasining investitsiya salohiyati va imkoniyatlarini taqdim etish uchun Germaniyada investitsiya seminarlari va forumlarini tashkil etish.

IT Park vakillari respublikaning infratuzilma imkoniyatlari va IT-ekotizimlari bilan tanishtirish uchun nemis ommaviy axborot vositalarining O‘zbekistonga tashrifini tashkil etish  hamda Tilo Klinnerni joriy yilning kuzida bo‘lib o‘tadigan ICT Week 2023 haftaligida ishtirok etishga taklif qilishdi.