O’zbekistonliklar Meta (Facebook) va boshqa kompaniyalardan startap uchun sarmoya jalb qildi

Qoraqalpog‘istonlik Beknazar Abdikamalov va Aziz Murtazoyev Janubiy Koreyalik hamkori Jastin Kim bilan birgalikda “Ami” ruhiy salomatlik bo‘yicha startap ishga tushirish uchun Meta (Facebook) va boshqa kompaniyalardan 3 million AQSh dollariga teng investitsiya jalb qildi.

Loyiha ruhiy salomatlik xizmatini yanada qulayroq qilish uchun onlayn maslahat seanslarini o‘z ichiga oladi. Bu Osiyo mamlakatlaridagi biznes egalariga o‘z xodimlarining ruhiy salomatligini yaxshilash imkonini beradi.

Startap asoschilari ta’kidlashicha, bunday platformani yaratish g‘oyasi pandemiyadan keyin paydo bo‘lgan, negaki Jahon sog‘liqni saqlash tashkilotining 2022-yil mart oyidagi hisobotiga ko‘ra, pandemiyadan so‘ng butun dunyo bo‘ylab depressiya, tushkunlik darajasi 25 foizga oshgan.

"Biz Ami jamoasining ishtiyoqi va iste’dodidan hayratdamiz. Ularning Osiyo aholisiga ruhiy salomatliklarini saqlash yo‘lida yana bir usul taqdim etish sa’y-harakatlarini qo‘llab-quvvatlamoqchimiz", dedi Sunita Parasuraman, “Meta” kompaniyasining investitsiyalar bo‘limi rahbari.

Osiyoning ulkan startap markazlari Singapur va Jakartadan tashqari, Ami startapini butun Osiyo boʻylab kengaytirish, bu orqali kompaniyalarga ruhiy salomatlik platformasi yordamida yuqori malakali mutaxassislarni jalb qilish imkoniyatini yaratish rejalashtirilmoqda. Loyiha asoschilari, jamiyatda ruhiy salomatlik ahamiyati haqidagi bilimlarni oshirishni o‘zlari uchun oliy maqsad deb bilishadi.

Moliyalashtirish bosqichida Meta'ga investorlardan “Goodwater Capital” (“Kakao”, “Coupang” va “Viva Republica”), “Strong Ventures”, “January Capital” va “Collaborative Fund” kelib qo‘shildi.

Beknazar Abdikamalov va Aziz Murtazayev tomonidan, shuningdek, yoshlar uchun IT Parkda mahorat darslari  o'tkazilgan.

Platformaning ishlash usuli

Ro‘yxatdan o‘tish jarayonida foydalanuvchilar maxsus formani to‘ldirish jarayonida o‘zlarini eng ko‘p tashvishlantirayotgan masalalar haqida ma’lumot kiritadilar. Olingan ma’lumotlarga ko‘ra, platforma ularni kerakli shifokor bilan bog‘laydi va shu tariqa mutaxassisdan zarur psixologik yordam olinadi.