Qo‘shma tashabbuslarni rivojlantirish: IT Park Uzbekistan Malayziyaning IT sohasi bilan hamkorlikni mustahkamlamoqda

Xalqaro hamkorlikni kuchaytirish maqsadida IT Park Uzbekistan Malayziyaning raqamli va IT-sohalari yetakchi vakillari bilan bir qator muhim uchrashuvlar o‘tkazib, kelajakdagi sheriklik va O‘zbekistonning jadal rivojlanayotgan texnologik ekotizimiga sarmoyalarni jalb qilish uchun poydevor yaratdi. IT Park delegatsiyasiga IT Park Sirdaryo filiali direktori Oybek Anvarov rahbarlik qildi.

TM One

Malayziyaning yetakchi IT-kompaniyalaridan biri bo‘lgan “TM One” kompaniyasining ijrochi vitse-prezidenti Shazuravati Abd Karim bilan strategik uchrashuv bo‘lib o‘tdi. Muzokaralar davomida sun’iy intellekt, autsorsing, kiberxavfsizlik va raqamli ta’lim kabi asosiy yo‘nalishlar muhokama qilindi. IT Park vakillari O‘zbekistonda xorijiy investorlar uchun taklif etilayotgan keng imkoniyatlar va tashabbuslarni taqdim etdilar.

Uchrashuv yakunida Shazuravati O‘zbekistonga chuqur qiziqish bildirdi va Markaziy Osiyoning kompaniya faoliyatini kengaytirish uchun yangi bozor sifatidagi salohiyatini ta’kidladi. Shuningdek, u O‘zbekistonga rejalashtirilayotgan tashrif haqida ma’lum qilib, “TM One” kompaniyasining hamkorlik imkoniyatlarini yanada kengroq o‘rganish niyatida ekanligini bildirdi.

“TM One”, korporativ yechimlarni ishlab chiqish bo‘yicha “TM” kompaniyasining bo‘linmasi, tashkilotlarni raqamli transformatsiya jarayonida qo‘llab-quvvatlab, boshqariluvchi xizmatlar, ma’lumotlar markazlari va kiberxavfsizlik kabi ilg‘or texnologiyalarni taqdim etadi.

“TM One” — Malayziyaning yetakchi telekommunikatsiya va raqamli xizmatlar provayderi bo‘lib, ta’lim va texnologik yechimlar orqali Malayziyada raqamli ko‘nikmalarni rivojlantirish va transformatsiyaga hissa qo‘shadi.

Malayziya raqamli iqtisodiyot korporatsiyasi (MDEC)

Malayziya raqamli iqtisodiyot korporatsiyasi (MDEC) vitse-prezidenti janob Van Murdani bilan ham samarali uchrashuv o‘tkazildi. Janob Murdani tajriba va ilg‘or amaliyotlar almashinuvi chog‘ida O‘zbekistonning raqamlashtirish va texnologik kompaniyalar uchun qulay shart-sharoitlar yaratish borasidagi sa’y-harakatlarini yuqori baholadi. U “MDEC” kompaniyasining IT Park bilan potensial qo‘shma loyihalarga qiziqishini bildirdi va yaqin kelajakda O‘zbekistonga tashrif buyurish rejalarini ma’lum qildi.

Malayziya raqamli iqtisodiyot korporatsiyasi (MDEC) — Malayziyaning raqamli iqtisodiyotni rivojlantirish, texnologiyalar va innovatsiyalarni qo‘llab-quvvatlash hamda Malayziyani Osiyodagi raqamli markaz sifatida ilgari surish uchun mas’ul bo‘lgan yetakchi agentligi hisoblanadi.

Tasa Solutions

Yana bir muhim uchrashuv “Tasa Group of Companies” bosh strategik maslahatchisi Zaynul Alam bilan bo‘lib o‘tdi. Muzokaralar davomida Alam kompaniyaning mahalliy va xalqaro miqyosda startap loyihalarni moliyalashtirish uchun O‘zbekistonda venchur fondini tashkil etish bo‘yicha ulkan rejalarini ma’lum qildi. U “Tasa Solutions” O‘zbekistonda yil oxirigacha yuridik shaxs sifatida faoliyatini boshlashni rejalashtirayotganini ta’kidlab, hamkorlikni rasmiylashtirish uchun memorandum imzolash istagini bildirdi.

IT Park’ning faol ishtiroki uning xalqaro aloqalarni mustahkamlash va O‘zbekistonning IT-sektori hamda startap ekotizimini rivojlantirish uchun imkoniyatlar yaratishga intilishini ko‘rsatadi.

“Tasa Solutions” — investitsiya va texnologiyalarga ixtisoslashgan biznes yechimlari provayderi bo‘lib, startaplarni qo‘llab-quvvatlash va innovatsiyalarni rivojlantirish uchun venchur fondlarini tashkil etishda ulkan tajribaga ega.