Qoraqalpog'istonda IT'ni rivojlantirish: vazir yangi ustuvor yo'nalishlarni belgilab berdi

Raqamli texnologiyalar vaziri Sherzod Shermatov IT Park'ning Qoraqalpog'istondagi filialiga tashrif buyurib, hududning texnologik rivojlanishini kuchaytirish bo'yicha strategik maqsadlarni belgilab berdi. Tashrif davomida yosh mutaxassislarni qo'llab-quvvatlash va ularning g'oyalarini xalqaro bozorlarga olib chiqishga qaratilgan istiqbolli loyihalar muhokama qilindi.

Prezident Shavkat Mirziyoyevning 2024-yil avgust oyida Qoraqalpog'istonga tashrifi viloyatda IT sohasini rivojlantirishda muhim voqea bo'ldi. Davlatimiz rahbari yosh IT-mutaxassislar uchun qulay muhit yaratish masalalariga alohida e'tibor qaratdi.Shavkat Mirziyoyev startaplarni qo'llab-quvvatlashda ularning shakllanishi va xalqaro bozorlarga chiqishiga kompleks yondashuv muhimligini ta'kidladi. Prezidentimiz texnologik sohaning rivojlanishi hududning iqtisodiy o'sishiga bevosita ta'sir ko'rsatib, investitsiyalarni jalb etish, aholi bandligini oshirish va turmush sifatini yaxshilash uchun yangi imkoniyatlar ochishini ta'kidladi.

Digital Uzbekistan-2030 strategik ustuvorliklariga amal qilgan holda, Raqamli texnologiyalar vaziri Sherzod Shermatov Qoraqalpog'istonda IT sohasini rivojlantirishning asosiy yo'nalishlarini ko'rsatib o'tdi. IT-xizmatlarning eksport salohiyatini kengaytirish va yoshlar uchun yuqori maoshli ish o'rinlari yaratishni ko'paytirish ustuvor vazifalar qatoriga kiradi. Vazir viloyatga xorijiy kompaniyalarni jalb qilish muhimligini, bu esa tajriba almashish, ilg'or texnologiyalarni joriy etish va bozorda raqobat darajasini oshirish uchun yangi imkoniyatlar yaratishini ta'kidladi.

Vazir Qoraqalpog'istonga tashrifi doirasida "Voice Solution VB" BPO markazi faoliyati bilan ham tanishdi. Markaz 2024-yil yakuniga qadar 100 dan ortiq yangi ish o'rinlarini yaratish orqali mintaqada IT-xizmatlar eksporti hajmini oshirishni maqsad qilgan. Ushbu reja joriy yilning 20-iyunida vazir tashabbusi asosida tasdiqlangan bo'lib, unga ko'ra markazga Nukusdagi IT Park binosining 16-qavati to'liq ajratilgan.

Sherzod Shermatov markaz xodimlari bilan muloqotda yoshlarning IT sohasidagi salohiyatini yuqori baholadi va ularning xorijiy bozorlar bilan ishlash tajribasini yanada oshirish muhimligini ta'kidladi. Shuningdek, markaz rahbariyatiga ish o'rinlarini ko'paytirish, xizmatlar sifatini oshirish va yangi mijozlarni jalb qilish bo'yicha bir qator takliflar taqdim etildi.

Tashrif yakunida vazir Sherzod Shermatov belgilangan vazifalarning muvaffaqiyatli bajarilishi Qoraqalpog'istonni O'zbekistonning asosiy texnologik markazlaridan biriga aylantirish yo'lida muhim qadam bo'lishini ta'kidladi. Vazir iqtisodiy o'sish va mintaqaning global IT-bozoridagi raqobatbardoshligini oshirishga hissa qo'shadigan innovatsion ekotizimni yaratish uchun barcha manfaatdor tomonlar - davlat, biznes va yoshlar birgalikda ishlashi muhimligini ta'kidladi.