Toshkent shahrida va O‘zbekistonning boshqa viloyatlarida “One Million Uzbek Coders” seminarlari bo‘lib o‘tdi

Joriy yilning oktyabr oyida Axborot texnologiyalari va kommunikatsiyalarini rivojlantirish vazirligi tashabbusi bilan “One Million Uzbek Coders” loyihasi doirasida Toshkent shahri va Oʻzbekistonning boshqa viloyatlaridagi IT Park filiallarida yoshlarning loyihada ishtirok etish va yuqori sifatli IT – ta’lim olishga qiziqish darajasini oshirish maqsadida oʻquv seminarlari tashkil qilindi.

Seminarlarda IT-park va IT-markazlarining hududiy boshqarmalari rahbarlari, tuman va shahar hokimliklari xodimlari, shuningdek, Axborot texnologiyalari va kommunikatsiyalarini rivojlantirish vazirligining hududiy boshqarmalari vakillari ishtirok etdi.

Tadbir davomida tashrif buyuruvchilar yetakchi IT-mutaxassislarning IT-kasblarini o‘zlashtirishning ahamiyati haqida ma’ruzalarini tinglash imkoniga ega bo‘ldilar, vaholanki, sanoatni raqamlashtirish davrida IT xizmatlariga talab jadal o‘sib bormoqda va bu sohada malakali kadrlar tayyorlashga bo‘lgan ehtiyoj ortib bormoqda va natijada, axborot texnologiyalari sohasi ham kengayib bormoqdadir.

 IT Park xodimlari IT-tashkilot faoliyati va Dubai Future Foundation bilan hamkorlikda yaratilgan “One Million Uzbek Coders” loyihasi haqida taqdimot qilib oʻtdi.  Innovatsion platforma mobil ishlab chiqish, ma’lumotlarni tahlil qilish, frontend va fullstackni ishlab chiqish kabi sohalar uchun onlayn kurslarga bepul kirish imkonini beradi.

Ta’kidlash joizki, mazkur loyiha O‘zbekistonning keng aholisiga yuqori sifatli IT-ta’lim berish bilan bir qatorda iqtidorli yoshlarni kelajakda raqobatbardosh mutaxassis bo‘lib yetishish yo‘lida qo‘llab-quvvatlashga qaratilgandir.

“One Million Uzbek Coders” kurslariga quyidagi havola orqali roʻyxatdan oʻtishingiz mumkin: https://uzbekcoders.uz/