Toshkentda 40 dan ortiq venchur fondi va biznes farishtalar ishtirokida venchur investitsiyalari bo‘yicha davra suhbati o‘tkazildi

O‘zbekiston Raqamli texnologiyalar vazirligida Vazirlik va IT Park Uzbekistan hamkorligida “Cross-Border Capital Dialogues: Uzbekistan Venture & Angel” mavzusida davra suhbati shaklidagi “Investor’s Day” tashkil etildi.

Tadbirda 40 nafardan ortiq ishtirokchi, jumladan, xalqaro venchur fondlari, biznes farishtalar, investorlar va davlat tuzilmalari vakillari qatnashdi. Asosiy mavzu qo‘shma investitsiya imkoniyatlari, global va mintaqaviy tendensiyalar, shuningdek, mamlakatga kapital oqimini cheklovchi to‘siqlar bo‘ldi.

Muhokama moderatori, fond menejeri va “Polyvalent Capital” direktorlar kengashi a’zosi Javonsher Abdullayev qutlov so‘zi bilan chiqish qilib, uchrashuvning asosiy mavzularini belgilab berdi. Sara Deniel (Doha Tech Angels), Marsel Drije (European Business Angel Network) va Alina Truxina (Utopia Capital Management) boshqa mamlakatlarda venchur bozorlarini rivojlantirish tajribasini taqdim etdilar.

Davra suhbati AQSh, Yevropa, Yaqin Sharq, Turkiya, Qozog‘iston, Ozarbayjon, O‘zbekiston va boshqa mamlakatlardan venchur sanoatining yetakchi vakillarini birlashtirdi. Ular orasida Robin Batler (Sturgeon Capital, Buyuk Britaniya), Yan Davidek (Purple Ventures, Chexiya), Serxio Argento (Argento Ventures, AQSh), Maykl Lints (Golden Gate Ventures, Qatar), Oliver Xyuz (TBC Bank Group), shuningdek, Gruziya, Malayziya, Keniya va boshqa davlatlarning biznes farishtalari bor edi.

Muhokama davomida ishtirokchilar investitsiyalarni to‘xtatib turgan asosiy muammolarni aniqladilar: huquqiy va soliq to‘siqlari, valyutani tartibga solish va korporativ boshqaruv masalalari. Vazirliklar va tartibga soluvchi organlar vakillari bilan birgalikda qulay investitsiya muhitini yaratish, hamkorlikda investitsiya kiritish modellarini rivojlantirish va transchegaraviy bitimlar oqimini ko‘paytirish bo‘yicha amaliy chora-tadbirlar taklif qilindi.

Uchrashuv yakunida tomonlar keyingi qadamlarni belgilab oldilar va hamkorlikni mustahkamlashga tayyor ekanliklarini bildirdilar. Davra suhbati O‘zbekistonning Markaziy Osiyo mintaqasida venchur investitsiyalarining yangi markazi sifatidagi mavqeini mustahkamlashda muhim bosqich bo‘ldi.