Toshkentda 87 mamlakatdan 848 delegat ishtirokida Offshore Outsourcing Conference o‘tkazildi

2025-yil 23-sentyabr kuni “CAEX” markazida IT Park Uzbekistan va O‘zbekiston Raqamli texnologiyalar vazirligi hamkorligida “Shared Services and Offshore Outsourcing Conference” bo‘lib o‘tdi. Konferensiya O‘zbekistondan IT va BPO-xizmatlar eksportini rivojlantirishga bag‘ishlangan eng yirik strategik maydon vazifasini o‘tadi.

2004-yildan buyon har yili o‘tkaziladigan “ICT Week Uzbekistan” mamlakat axborot texnologiyalari sohasidagi asosiy tadbir hisoblanadi. Tashkilotchilar — O‘zbekiston Respublikasi Raqamli texnologiyalar vazirligi va IT Park Uzbekistan. Tadbir IT-xizmatlar eksportini rivojlantirish, O‘zbekistonning mintaqaviy raqamli markaz sifatidagi obro‘sini mustahkamlash va mamlakatning jahon IT-hamjamiyatiga integratsiyalashuviga qaratilgan.

Tadbirda 848 nafar mehmon, jumladan dunyoning 87 mamlakatidan 614 nafar xorijiy delegat — xalqaro ekspertlar, biznes vakillari va investorlar ishtirok etdi. Ma’ruzachilar sifatida xalqaro kompaniyalar vakillari so‘zga chiqib, global jamoalarni shakllantirish tajribasi haqida so‘zladilar va nima uchun O‘zbekistonni autsorsing yo‘nalishi sifatida tanlaganliklarini tushuntirdilar.

Sultonmurod Rasulov (IT Park Uzbekistan), Artur Grigoryan (EY), Ansari Zayn (Xpence), Xose De Soto (Ruby Talent Solutions), Mixael Germersxauzen (Antal International) va Ahmed Aboulezz O‘zbekistonning autsorsing yo‘nalishi sifatidagi afzalliklari, kadrlar salohiyati va kompaniyalarni qo‘llab-quvvatlashning yangi vositalari haqida so‘zlab berishdi.

IT Park Uzbekistan Shimoliy Amerika bozori yo‘nalishi rahbari Sultonmurod Rasulov O‘zbekiston salohiyati va 2019-yildan boshlab IT Park bosib o‘tgan yo‘l haqida ma’lumot berdi:

“2019-yilda IT Park Uzbekistan hali yosh jamoa edi va O‘zbekistonni autsorsing uchun global yo‘nalishga aylantirish g‘oyasi uzoq orzudek tuyulardi. Ammo bugun ushbu orzu ro‘yobga chiqmoqda.

O‘zbekiston siyosiy barqarorlik bo‘yicha 1-o‘rinni, moliyaviy jozibadorlik bo‘yicha 3-o‘rinni egallaydi va yashash hamda biznes yuritish uchun eng xavfsiz 10 ta mamlakat qatoriga kiradi.

O‘zbekiston endi shunchaki rivojlanayotgan bozor emas — bu autsorsing sohasi uchun yangi qudratli markaz.”

“EY” kompaniyasining Armanistondagi biznes-konsalting amaliyoti rahbari Artur Grigoryan “Enterprise Uzbekistan” markazining rivojlanishini mamlakatning uzoq muddatli strategiyasi bilan bog‘ladi:

“Enterprise Uzbekistan yo‘li 2024-yilda, O‘zbekiston prezidenti Raqamli texnologiyalar xalqaro markazini tashkil etish to‘g‘risidagi farmonni imzolagan paytdan boshlandi. Ushbu tashabbus mamlakatning texnologiya sektori uchun aniq maqsadlarni belgilagan keng qamrovli “Uzbekistan 2030” strategiyasiga mos keladi.

“Enterprise Uzbekistan” global texnologiya biznesi uchun noyob sharoitlarni taklif etadi. Biz yetakchi innovatorlar, moliyaviy institutlar, professional xizmatlar va iste’dodlarni birlashtiruvchi jonli ekotizimni yaratmoqdamiz.

Rezidentlar zamonaviy infratuzilma — ofislar va ma’lumotlar markazlari, shuningdek, o‘sish va kengayish uchun ishlab chiqilgan maxsus soliq va bojxona imtiyozlaridan foydalanish imkoniyatiga ega bo‘ladilar.

Ingliz huquqi elementlariga ega bo‘lgan maxsus huquqiy muhit huquqiy aniqlikni, investitsiyalarni himoya qilishni va xalqaro hamkorlar ishonchini ta’minlaydi.”

“Xpence” rahbari Ansari Zayn bozor ko‘lami va raqamlashtirish salohiyatiga e’tibor qaratdi:

“O‘zbekiston iqtisodiyoti yiliga 6,5% o‘sib, to‘lov bozori 100 milliard dollarga yaqinlashmoqda, shundan 55 foizi kichik va o‘rta biznesga to‘g‘ri keladi. Ushbu bozor barqaror va IT Park tomonidan rivojlantirilayotgan jahon darajasidagi iste’dodlarga tayanadi.

Biz mahsulotimizni mahalliylashtirish ustida ishlayapmiz va hamkorlik aloqalarini o‘rnatmoqdamiz. IT Park rezidenti bo‘lganimizdan so‘ng 90 kun ichida kompaniyamizni atigi 6 soatda ro‘yxatdan o‘tkazdik va bank bilan birinchi shartnomani imzoladik. Kuchli talab, davlat qo‘llab-quvvatlashi hamda kichik va o‘rta biznesning faolligi O‘zbekistonni raqamlashtirish uchun eng jozibador bozorlardan biriga aylantirmoqda.”

“Ruby Talent Solutions” bosh direktori Xose De Soto kompaniyasi uchun O‘zbekistonda ofis ochish nima sababdan mantiqiy qaror bo‘lganini tushuntirdi:

“Joriy yilda biz O‘zbekistonda ofisimizni ochdik va bu qaror biz uchun mutlaqo aniq edi. O‘zbekiston — o‘rganish va rivojlanishga intiluvchi, yuqori texnologiyalarni o‘zlashtirgan avlodga ega yosh va dinamik mamlakat.

Vaqt mintaqasi Yevropa, Buyuk Britaniya va hatto Shimoliy Amerika bilan tabiiy mos keladi, bu esa bizga jahon miqyosidagi mijozlarimiz bilan real vaqt rejimida aloqada bo‘lish imkonini beradi.

Bundan tashqari, hukumat raqobatbardosh soliq imtiyozlari bilan qulay shart-sharoitlarni yaratgan, bu esa bizga o‘xshagan kompaniyalar uchun sarmoya kiritish va kengayishni osonlashtiradi.  

“Ruby Talent Solutions” uchun O‘zbekiston iste’dod, ishonch va imkoniyatlarning ajoyib uyg‘unligidir va biz boshidanoq bu yo‘lning bir qismi bo‘lishimizdan mamnunmiz.”

“Antal International” mintaqaviy direktori Maykl Germersxauzen demografik afzalliklar va IT Park’ning iste’dodlarni mamlakat ichida saqlab qolishdagi rolini ta’kidladi:

“O‘zbekiston mintaqadagi eng yosh aholiga ega mamlakatlardan biri bo‘lib, kelajak uchun kuchli kadrlar salohiyatini shakllantirmoqda. Mahalliy mutaxassislar allaqachon AQSh va Yevropa kompaniyalari uchun xalqaro loyihalarda ishtirok etmoqda.

IT Park “O‘zbekiston 2.0” konsepsiyasini ilgari surmoqda — bu model doirasida mamlakat ichida ish o‘rinlari yaratilib, mutaxassislarga o‘z yurtida qolgan holda, global raqamli iqtisodiyotning bir qismi bo‘lish imkonini beriladi.

Xorijiy kompaniyalar uchun IT Park soliq imtiyozlari va soddalashtirilgan ishga qabul qilish tartiblari bilan rezidentlikni taklif etadi, bu esa O‘zbekistonda faoliyat boshlashni ancha osonlashtiradi.

O‘zbekiston endi shunchaki ishchi kuchini emas, balki ko‘nikmalar, xizmatlar va innovatsiyalarni eksport qilmoqda.”

Bosh direktor maslahatchisi Ahmed Aboulezz O‘zbekistonning kadrlar salohiyatini taqdim etdi:

“Bugungi kunda O‘zbekiston — nafaqat yuqori malakali IT-mutaxassislar soni tez sur’atlarda o‘sib borayotgan bozor, balki hamkorlik uchun ochiq va global muammolarga tayyor bo‘lgan noyob ekotizimni shakllantirayotgan davlat.

Mamlakatda milliondan ortiq IT-mutaxassis mavjud bo‘lib, yetakchi universitetlar faol rivojlanmoqda va xalqaro standartlarga muvofiq ta’lim bermoqda. Kuchli til ko‘nikmalari hamda xilma-xillik va global integratsiya qadrlanadigan madaniy muhit ahamiyat kasb etadi.

Ushbu omillarning barchasi O‘zbekistonning xalqaro investitsiyalar va texnologik innovatsiyalarning to‘laqonli markaziga aylanishi uchun qulay sharoit yaratmoqda.”

Konferensiya yakunida “CERT International” direktori Riyad Ibragimov IT Park Uzbekistan bosh direktori Abdulaxad Kuchkarovga axborot xavfsizligini boshqarish tizimi bo‘yicha ISO/IEC 27001:2022 xalqaro sertifikatini rasman topshirdi.

“Bu yutuq shunchaki navbatdagi sertifikat emas. Bu IT Park’ning xalqaro sifat, boshqaruv va ishonchlilik standartlariga muvofiqligining e’tirofidir. Bu global miqyosda shaffof, ishonchli va raqobatbardosh ekotizimni shakllantirish bo‘yicha olib borilayotgan uzluksiz sa’y-harakatlarimizning ifodasi hisoblanadi,” — dedi Riyad Ibragimov.

Yakuniy nutq bilan IT Park Uzbekistan bosh direktori Abdulaxad Kuchkarov so‘zga chiqib, quyidagilarni ta’kidladi:

“O‘zbekistonda siz o‘zingiz uchun ideal hamkor, xodim yoki ish beruvchini topishingiz mumkin. Hamma narsaning iloji bor — barcha imkoniyatlar qo‘lingizda. Bu taraqqiyot O‘zbekiston Prezidenti Shavkat Mirziyoyev va Raqamli texnologiyalar vazirligining qo‘llab-quvvatlashi hamda dadil strategik qarashlari tufayli amalga oshdi. Ishonchim komilki, bu hali boshlanishi. Keling, biznesni birgalikda quraylik va biz sizni bu yo‘lning har bir bosqichida qo‘llab-quvvatlaymiz.”

Konferensiyaning o‘tkazilishi O‘zbekistonni ishonchli autsorsing hamkori sifatida ilgari surish yo‘lidagi muhim qadam bo‘ldi. Tadbir mamlakatning xalqaro IT va BPO-xizmatlar bozoridagi mavqeini mustahkamladi va investitsiyalarni jalb qilish uchun yangi imkoniyatlar yaratdi.

Tadbirlarning axborot hamkorlari: Aniq.uz, Daryo.uz, Frank.uz, Kursiv, Nova 24, The Tech, UzbekFintech, Weproject, Vzglyad.uz, Oriat Dono radiostansiyasi.