Toshkentda startap ekotizimining 500 dan ortiq ishtirokchisi qatnashgan Startup & Venture Summit 2025 o‘tkazildi

2025-yil 25-sentyabr kuni “CAEX” markazida “ICT Week Uzbekistan” doirasida Markaziy Osiyoda investitsiya va hamkorlik uchun asosiy maydon hisoblangan “Startup & Venture Summit 2025” bo‘lib o‘tdi. Tadbir IT Park Uzbekistan va O‘zbekiston Raqamli texnologiyalar vazirligi tomonidan “Plug and Play Tech Center” bilan hamkorlikda tashkil etildi.

Sammitda 500 nafardan ortiq ishtirokchi, jumladan startaplar, venchur fondlari, akseleratorlar, korporatsiyalar, davlat tuzilmalari va xalqaro ekspertlar ishtirok etdi. Tadbir milliy startaplarning global innovatsion ekotizimga integratsiyalashuvi va mintaqaning investitsiyaviy jozibadorligini oshirishga turtki bo‘ldi.

Ma’ruzachilar nutqlari

Yoram Veyngarde: Uzbekistan.dealroom.com platformasining ishga tushirilishi va raqamli iqtisodiyotning rivojlanishi
“Dealroom.co” asoschisi va bosh direktori Yoram Veyngarde raqamli tadbirkorlik va davlat-xususiy sheriklik orqali O‘zbekiston iqtisodiyotining o‘sishi haqida so‘zladi.

“Biz IT Park Uzbekistan bilan hamkorlikda Uzbekistan.dealroom.com global platformasini ishga tushirdik. U mamlakatdagi startaplar, investorlar va innovatsion markazlar haqidagi ma’lumotlarni birlashtiradi hamda jahon ekotizimiga kirish imkonini beradi. Bu O‘zbekistonni yangi texnologiyalar va tadbirkorlik markazi sifatida tanitish yo‘lidagi muhim qadamdir.”

Panel muhokamasi: Scaling Startups Across Borders
“Scaling Startups Across Borders” nomli panel muhokamasi davomida so‘zga chiqqanlar startaplarni xalqaro miqyosda rivojlantirish tajribasi bilan o‘rtoqlashdilar. Sessiya moderatori vazifasini “Plug and Play Tech Center” hamkori Sasha Karimpur bajardi.

Robin Batler (Sturgeon Capital) yangi bozorga muvaffaqiyatli kirish faqat uning dinamikasi va mahsulotning mijozlar ehtiyojlariga mosligini aniq tushunish orqaligina mumkinligini ta’kidladi.

Kristi Kanida (Alchemist Accelerator) muloqot madaniyati va mijozlarning fikr-mulohazalari bilan ishlash hal qiluvchi ahamiyatga ega bo‘lgan akselerator yondashuvini tushuntirib berdi.

Ahmad Abbassa (Auzua Holding Group) strategik hamkorlik, mahalliy ekotizimlarga qo‘shilishning muhimligini ta’kidlab, sun’iy intellekt yordamida o‘z kuchiga tayanishga qiziqish ortib borayotganini, shuningdek, fintech va deeptech yo‘nalishlarining istiqbolli ekanligini qayd etdi.

Serxio Argento: Markaziy Osiyodagi venchur imkoniyatlari
“Argento > Ventures” asoschisi Serxio Argento Markaziy Osiyoning tez rivojlanayotgan bozorlarida venchur imkoniyatlari va investitsiya strategiyalari haqida so‘zlab berdi.

“Men startaplar avval bozorning qiziqishini isbotlab, keyin investitsiyalarni jalb qilishlarini ma’qul ko‘raman. Kapital faqat g‘oyalarni emas, balki haqiqiy natijalarni qo‘llab-quvvatlash uchun zarur.”

Baxtiyor Aliyev: Moneff kompaniyasining global bozordagi tajribasi
Moneff (Buyuk Britaniya) hammuassisi va tijorat direktori Baxtiyor Aliyev “Local Talents – Global Excellence, Founders Without Borders” mavzusidagi nutqida kompaniya misolini taqdim etib, Yevropada fintech startapini yaratish tajribasi va uni kengaytirish muammolari haqida so‘zladi.

“Biz to‘rt kishilik jamoa bilan ishni boshlaganmiz, bugun esa 12 mamlakatdan 60 nafardan ortiq xodimga egamiz, ularning uchdan biri O‘zbekistondan. Kompaniyamiz 7 milliard dollardan ziyod tranzaksiyalarni amalga oshirdi. Yosh tadbirkorlarga maslahatim — boshlashdan cho‘chimaslik: mahalliy muammolar ko‘pincha global yechimga ega bo‘ladi.”

Obidjon Komiljonov: Trestle kompaniyasining texnologik taraqqiyoti
“Trestle” kompaniyasining hammuassisi va texnik direktori Obidjon Komiljonov kompaniyaning texnologik rivojlanishi, Salesforce yechimlarini joriy etish tajribasi va O‘zbekiston IT-hamjamiyatini rivojlantirishdagi hissasi haqida so‘zlab berdi.

“Biz O‘zbekistonda kompaniyani yosh iste’dodlarga ishonch asosida qurdik. Bugun dasturchilarimiz dunyoning eng yirik brendlari uchun loyihalarni amalga oshirmoqda. Mamlakat va uning yoshlariga bo‘lgan ishonch muvaffaqiyat va innovatsiyalar yaratishga yordam beradi.”

Yan Davidek: Markaziy Osiyoning investitsion salohiyati
“Purple Ventures” hamkori Yan Davidek “Investing in Emerging Markets — Central Asia: How VCs Assess Startup Potential” ma’ruzasida Markaziy Osiyo startaplarining investitsion salohiyatini baholash bo‘yicha amaliy tajribasi bilan o‘rtoqlashdi.

“Rivojlanayotgan bozorlarda ulkan salohiyatni ko‘ryapmiz. Bu yerda kapital barqaror innovatsiyalar yaratish orqali samaraliroq ishlaydi. Biz Markaziy Osiyo uzoq muddatli investitsiyalar uchun jozibador nuqtaga aylanishi mumkinligiga ishonamiz.”

Charli Morris: mintaqaning venchur ekotizimini jadallashtirish
Buyuk Britaniya Tashqi ishlar vazirligining iqtisodiy rivojlanish (Markaziy Osiyo) masalalari bo‘yicha maslahatchisi Charli Morris “Accelerating Venture Capital Ecosystem” mavzusida taqdimot o‘tkazdi.

“Markaziy Osiyo yosh aholi va barqaror demografiyaga ega — bu uning kuchli ustunligi. Biroq xalqaro investorlar uchun shaffof qonunlar va biznes yuritishning soddaligini ko‘rish muhimdir. Bu mintaqa salohiyatini ro‘yobga chiqarishning kalitidir.”

Fireside Chat: korporatsiyalarning roli

“Corporate Innovation” mavzusidagi sessiyada “BILLZ”, “TBC” va “Payme” kompaniyalari vakillari startaplar bilan hamkorlik tajribasi va korporatsiyalarning ekotizimdagi o‘rni haqida so‘z yuritdilar. Oliver Xyuz (TBC Bank Group) o‘zbek startaplarining xalqaro darajada kengayish imkoniyatlarini, Stanislav Skvirskiy (Payme) esa moslashuvchanlik va tadbirkorlik ruhini saqlash zarurligini ta’kidladi. Rustam Hamdamov (Billz) kuchli jamoa shakllantirish va kompaniyani kengaytirish strategiyasi muhimligini qayd etdi.

Strategik kelishuvlar: yangi hamkorlik memorandumlari

Sammitda xalqaro hamkorlikni rivojlantirishga alohida e’tibor qaratildi. Uning doirasida “United Ventures” ikkita strategik memorandum imzoladi: biri — Astana Hub Ventures bilan, ikkinchisi esa — Yoshlar Ventures bilan.

• “Astana Hub Ventures” bilan kelishuv startaplarni qo‘llab-quvvatlash, investitsiya imkoniyatlarini kengaytirish va innovatsion ekotizimni rivojlantirishga qaratilgan.

• “Yoshlar Ventures” bilan esa qo‘shma investitsiyalar, ta’lim va mentorlik tashabbuslari, shuningdek PR, marketing va xalqaro bozorlarga chiqishni qo‘llab-quvvatlash bo‘yicha kelishuvga erishildi.

Yangi startaplarga sarmoya kiritish

Shuningdek, AloqaVentures umumiy qiymati $750 000 bo‘lgan investitsiyalarni e’lon qildi. Ular qatorida:

• Paidax — $200 000

• EGARANTI — $250 000

• KINESTEX — $150 000

• TRIDMO — $50 000

• RENTA — $100 000

Ushbu mablag‘lar fintech, texnologik yechimlar va raqamli xizmatlar yo‘nalishidagi loyihalarni rivojlantirish uchun yangi turtki bo‘lib xizmat qiladi.

Toshkent CEVF 2026 forumiga mezbonlik qiladi

Sammitda 2026-yil bahorida Toshkentda Central Eurasian Venture Forum (CEVF) o‘tkazilishi e’lon qilindi. Forum birinchi marta Qozog‘iston tashqarisida o‘tkazilib, AQSh, Yevropa, Janubiy Koreya, Yaqin Sharq va Markaziy Osiyodan investorlar, startaplar, korporatsiyalar va venchur fondlarini birlashtiradi. Tadbir MOST Holding va IT Park Uzbekistan tomonidan, Raqamli texnologiyalar vazirligi ko‘magida tashkil etiladi.

DOMiNO Ventures O‘zbekistonda fond tashkil etdi

Sammitning muhim natijalaridan biri sifatida DOMiNO Uzbekistan Fund tashkil etilgani e’lon qilindi — bu mamlakatdagi birinchi 20 million dollarlik xorijiy kapitalga ega xalqaro venchur fond. Fond DOMiNO Ventures (Niderlandiya) tomonidan UzVC ko‘magida tashkil etilgan bo‘lib, UzVC $10 million miqdorida majburiyat bilan asosiy investor bo‘ldi.

IT Park Ventures va AWS: startaplar uchun yangi imkoniyatlar

Shuningdek, IT Park Ventures AWS Activate Providers global tarmog‘iga qo‘shilib, “Amazon Web Services” kompaniyasining mintaqadagi rasmiy hamkoriga aylandi. Ushbu hamkorlik startaplarga $10 000 gacha promo-kreditlar, maxsus takliflar va AWS Activate Console platformasidan foydalanish imkonini beradi.

Yakuniy so‘z

Sammit yakunida IT Park Uzbekistan bosh direktori Abdulaxad Kuchkarov ekotizimning jadal rivojlanishini alohida ta’kidladi. Uning so‘zlariga ko‘ra, 2017-yilda IT Park faqat 4 ta kompaniyadan iborat bo‘lgan bo‘lsa, bugungi kunda rezidentlar soni 3000 dan oshdi. U ishtirokchilarga minnatdorlik bildirib, muloqotni ICT Week Uzbekistan doirasidagi keyingi tadbirlarda davom ettirishga taklif qildi.

B2B-uchrashuvlar

Sammit doirasida startaplar, akseleratorlar, korporatsiyalar va boshqa ekotizim ishtirokchilari uchun B2B-uchrashuvlar ham tashkil qilindi. Qizg‘in 20 daqiqalik uchrashuvlar davomida ishtirokchilar yo‘l xaritalarini ishlab chiqish, pilot loyihalarni boshlash va xalqaro dasturlar doirasida hamkorlikni muhokama qilish imkoniyatiga ega bo‘ldilar.

Startup & Venture Summit 2025 O‘zbekistonni innovatsiyalar va venchur sarmoyalarning yangi markaziga aylantirish hamda mamlakat uchun jahon miqyosida yangi istiqbollar ochish yo‘lidagi muhim voqeaga aylandi.

Tadbirlarning axborot hamkorlari: Aniq.uz, Daryo.uz, Frank.uz, Kursiv, Nova 24, The Tech, UzbekFintech, Weproject, Vzglyad.uz, Oriat Dono radiostansiyasi.