Xorijdagi o‘zbekistonlik asoschilar mamlakat startap ekotizimini rivojlantirishga yordam beradi

“ICT Week Uzbekistan 2025” doirasida O‘zbekiston raqamli texnologiyalar vaziri Sherzod Shermatov va IT Park Uzbekistan bosh direktori Abdulaxad Kuchkarov AQSh, Yaponiya, Janubiy Koreya, Buyuk Britaniya va BAA davlatlarida startaplarga asos solgan o‘zbekistonlik tadbirkorlar delegatsiyasi bilan uchrashuv o‘tkazdi. Tomonlar hamkorlikni kengaytirish, startap ekotizimini rivojlantirish, investitsiya va sheriklik uchun yangi yo‘nalishlar ochish, shuningdek, O‘zbekiston loyihalarining global bozorlarga chiqishi uchun sharoitlar yaratishga kelishib oldilar.

Uchrashuvda yetakchi xalqaro kompaniyalarning ta’sischilari va yuqori lavozimli rahbarlari ishtirok etdi.

Fleetroot (BAA) — avtoparkni boshqarish, logistika jarayonlarini optimallashtirish va “oxirgi milya” yetkazib berish uchun mo‘ljallangan platforma. Kompaniya transport va xizmat ko‘rsatish kompaniyalari uchun bulutli yechimlarni taqdim etish orqali MENA mintaqasida faol ishlamoqda.

Comfi (BAA) — innovatsion B2B SaaS to‘lov yechimlarini yaratuvchi fintech startap. Kompaniya mahsulotlari tranzaksiyalarning shaffofligi va moslashuvchanligini ta’minlash orqali biznesga hisob-kitob jarayonini soddalashtirish va shartnomalar tuzishni tezlashtirishga yordam beradi.

SPS Commerce (AQSh) — elektron tijorat va ta’minot zanjiri uchun bulutli yechimlar sohasida jahon yetakchilaridan biri. Kompaniya “SupplyPike” startapini 206 million dollarga sotib olish bo‘yicha kelishuvni muvaffaqiyatli yakunladi va global bozorda o‘z mavqeini mustahkamladi.

Clarity Flo (AQSh) — shartnomalar bilan ishlashni soddalashtirish va avtomatlashtirish uchun sun’iy intellekt vositalarini taqdim qiluvchi startap. Kompaniya LegalTech yo‘nalishini faol rivojlantirmoqda va biznesga hujjatlar bilan ishlashda xarajatlarni kamaytirishga yordam bermoqda.

CustomerBase.ai (AQSh) - sun’iy intellekt, mashinali o‘rganish va bulutli platformalar sohasidagi yechimlarga ixtisoslashgan texnologik kompaniya. Uning mahsulotlari fintech, ta’lim va korporativ avtomatlashtirishda qo‘llaniladi.

Rakuten Group (Yaponiya) — elektron tijorat, fintech, telekommunikatsiya va raqamli xizmatlar sohasidagi yechimlari bilan mashhur bo‘lgan Yaponiyaning eng yirik IT-konglomerati. Kompaniya xalqaro loyihalarni faol rivojlantiradi va IT-hamjamiyatni qo‘llab-quvvatlaydi.

Trestle (Janubiy Koreya) — turli sohalar uchun Salesforce yechimlarini joriy etish va moslashtirishga ixtisoslashgan kompaniya. Startap texnologik tajribani ko‘p madaniyatli jamoalarni shakllantirish tajribasi bilan birlashtiradi.

Moneff (Buyuk Britaniya) — o‘zbekistonlik mutaxassislar tomonidan asos solingan muvaffaqiyatli fintech startapi. Kompaniya kichik va o‘rta biznes uchun zamonaviy to‘lov xizmatlarini ishlab chiqish bilan shug‘ullanadi, shuningdek, Yevropadagi o‘zbek diasporasi uchun moliyaviy yechimlarni taklif etadi.

Salm Corp (Janubiy Koreya) — sog‘liqni saqlash texnologiyalari sohasida SaaS-yechimlari va AI-mahsulotlarini yaratuvchi texnologik startap. Kompaniya ruhiy salomatlik va farovonlikni qo‘llab-quvvatlash uchun raqamli vositalarni ishlab chiqishga e’tibor qaratadi. 

Smartup (O‘zbekiston, BAA) — “Green White Solutions” tomonidan boshqariladigan bulutli ERP-platformasi bo‘lib, distributsiya, savdo marketingi, ombor, moliyaviy jarayonlar va savdo nuqtalarini boshqarishni avtomatlashtiradi.

Ishtirokchilar O‘zbekiston startap ekotizimi o‘yinchilari va xorijdagi o‘zbekistonlik asoschilar o‘rtasida doimiy muloqotni yo‘lga qo‘yishga alohida e’tibor qaratdilar. Ular xalqaro bozorlarga chiqishda yosh kompaniyalar duch keladigan asosiy qiyinchiliklar: investitsiyalarni izlash, mentorlar va ekspertlar bilan ishlash, shuningdek, turli mamlakatlar mutaxassislaridan iborat jamoalar tuzish masalalarini muhokama qildilar. Shuningdek, o‘zbekistonlik IT-kadrlarni global loyihalarga integratsiya qilish uchun qulay istiqbollar va innovatsiyalarni rivojlantirishda diasporaning muhim roli qayd etildi.

Uchrashuv yakunida tomonlar startaplarni qo‘llab-quvvatlash bo‘yicha qo‘shma tashabbuslar, ta’lim dasturlari va investitsiyalarni jalb qilishning yangi vositalarini ishga tushirishga kelishib oldilar.

Mazkur kelishuvlar xalqaro hamkorlik, O‘zbekiston startaplarini ilgari surish va investitsiyalarni jalb qilish uchun qo‘shimcha imkoniyatlar yaratdi. Bu o‘z navbatida, mamlakatning mintaqadagi innovatsiyalar va tadbirkorlik markazi sifatidagi mavqeini mustahkamlashga yordam beradi.