Yaponiya bozoriga chiqish: O‘zbekiston IT-kompaniyalari uchun nimalarni bilish muhim

6-fevral kuni IT Park filialida “Kengayish va Yaponiya bozoriga chiqish imkoniyatlari” mavzusida seminar bo‘lib o‘tdi. Tadbir ma’ruzachisi “Ringi” kompaniyasining bosh direktori va hammuassisi Yerjan Karatayev edi.

Yerjan Karatayev Shimoliy Amerikada “Forbes 30 gacha 30” mukofoti sovrindori bo‘lib, texnologiyalar, startaplar va xalqaro biznesni rivojlantirish sohasida o‘n yildan ortiq tajribaga ega. U Markaziy Osiyo mamlakatlarini va Yaponiyani bog‘lovchi “Business Connect” tadbirkorlik hamjamiyatining asoschisidir. AQSh, Yaponiya va Qozog‘istonda keng tajribaga ega bo‘lgan Yerjan murakkab bozorlarga yo‘naltirilgan va hamkorlikka tayyor ko‘p tilli jamoaga rahbarlik qilmoqda.

Seminar davomida ishtirokchilar Yaponiyada biznes yuritishning asosiy jihatlari haqida qimmatli ma’lumotlar oldilar, jumladan:

• Yaponiya biznes madaniyati va yapon hamkorlar bilan o‘zaro munosabatlarning asosiy tamoyillari;
• Hozirgi bozor holati va rivojlanish tendensiyalari;
• Startaplarni 5 yilga strategik rejalashtirish;
• Innovatsiyalarning asosiy yo‘nalishlari;
• Korporativ venchur kapitalini (CVC) rivojlantirish;
• Miqyosni kengaytirish va Yaponiya bozoriga chiqish mexanizmlari.

Asosiy masalalardan biri mahalliylashtirish, strategik hamkorlik va davlat tomonidan qo‘llab-quvvatlash kabi Yaponiya bozoriga kirish strategiyalarini muhokama qilish bo‘ldi. Shuningdek, ma’ruzachi yapon yakkashox startaplarining muvaffaqiyatli misollarini taqdim etdi, ular orasida:

• SmartHR — bulutli HR-platformasi (baholanishi $2,6 mlrd);
• SmartNews — yangiliklar agregatori (baholanishi $2 mlrd);
• Preferred Networks — sun’iy intellekt sohasidagi yetakchi kompaniya;
• Playco — tezkor o‘yinlar ishlab chiqaruvchisi (baholanishi $1 mlrd);
• Va boshqa ko‘plab kompaniyalar.

Seminarda “Qulix”, “RealSoft”, “Alraqam”, “Progress Solution Technologies”, “Cloud-Solutions”, “Lifestyle Creative Agency”, “GreatSoft”, “United Soft”, “Fido-Biznes”, “DataPrizma”, “Giran Area”, “Datagaze”, “NNT Express” kabi kompaniyalar vakillari ishtirok etdilar.

 

IT va startap ekotizimini rivojlantirish bo‘yicha strategik uchrashuvlar

Ta’kidlash joizki, yaqinda Qozog‘istonga “Digital Almaty 2025” forumi doirasida amalga oshirilgan tashrif chog‘ida IT Park vakillari O‘zbekistonda startap ekotizimini rivojlantirish va startap rezidentlarining yangi bozorlarga chiqishini qo‘llab-quvvatlash uchun Ringi bilan kelgusidagi hamkorlik bo‘yicha muzokaralar olib bordilar.

Asosiy e’tibor ishonchli hamkorlarni topish, O‘zbekiston IT sohasini ilgari surish mexanizmlari va Yaponiya fondlari hamda akseleratorlarini jalb qilishga qaratildi. Muhokamalar yakunida Yerjan Karatayev Yaponiya bozoriga kirishdan manfaatdor kompaniyalar uchun amaliy mashg‘ulot o‘tkazdi.

Yaponiya bozoriga chiqish O‘zbekiston IT sohasiga qanday ta’sir ko‘rsatadi

Rezidentlar va startaplarning Yaponiya bozoriga chiqishi mamlakatning texnologik sektorini rivojlantirish uchun yangi imkoniyatlar ochadi. Yaponiya biznesi vakillari bilan seminar va strategik uchrashuvlar o‘zbek startaplariga dunyoning eng yirik va texnologik rivojlangan iqtisodiyotlaridan biriga kirish imkonini beradi. Bu nafaqat mahalliy IT-kompaniyalar va startaplarning raqobatbardoshligini oshiradi, balki xorijiy investitsiyalar, hamkorliklar va yangi biznes modellarini jalb qilishga yordam beradi.

O‘zbekiston uchun asosiy afzalliklar:

• IT-sanoatni rivojlantirish — Yaponiya bozorini o‘zlashtirish texnologik yechimlar darajasini oshirishni talab qiladi, bu esa mahalliy kompaniyalarning innovatsion o‘sishiga turtki bo‘ladi.
• Investitsiyalarni jalb qilish — yapon venchur fondlari va akseleratorlarining qiziqishi O‘zbekiston startaplarining rivojlanishini sezilarli darajada tezlashtirishi mumkin.
• IT-xizmatlar eksporti — sotuv bozorlarini kengaytirish IT-mahsulotlar va xizmatlar eksporti hajmini oshirish imkonini beradi, bu esa mamlakat iqtisodiyotiga ijobiy ta’sir ko‘rsatadi.
• Malakali kadrlarning o‘sishi — xalqaro kompaniyalar bilan hamkorlik IT-mutaxassislarni rivojlanishga undaydi, bu esa sohada kasb mahoratining oshishiga hissa qo‘shadi.

Bunday tashabbuslar xalqaro integratsiyaning O‘zbekiston IT-ekotizimi uchun strategik ahamiyatini tasdiqlaydi. Mustahkam hamkorliklarni o‘rnatish va global bozor talablariga moslashish mamlakatga Markaziy Osiyoning istiqbolli IT-hab sifatidagi o‘rnini mustahkamlash imkonini beradi.