YeXHTning Oʻzbekistondagi loyihalari koordinatori, BMT FAO va IT Park Fargʻonadagi IT-startaplar uchun inkubatsiya dasturini ishga tushirmoqda

YeXHTning Oʻzbekistondagi loyihalari koordinatori Birlashgan Millatlar Tashkilotining Oziq-ovqat va qishloq xoʻjaligi tashkiloti (BMT FAO) bilan hamkorlikda hamda IT Park koʻmagida Fargʻonadagi IT-startaplar uchun inkubatsiya dasturiga arizalar yigʻilishi boshlanganini eʼlon qiladi.

Inkubatsiya dasturi — bu gʻoya va jamoaga yoki boshlangʻich MVP’ga ega boʻlgan rivojlanishning dastlabki bosqichidagi startaplarni qoʻllab-quvvatlashga qaratilgan keng qamrovli dasturdir. U startaplarga oʻzlarining oʻsish va rivojlanishi uchun zarur boʻlgan resurslar va qoʻllab-quvvatlashdan foydalanish imkoniyatini beradi.

Dastur bir oy davom etadi va 15 ta IT-startaplar uchun moʻljallangan. Ushbu dastur Fargʻona vodiysining turli sohalarda, jumladan, agrotexnologiyada biznes samaradorligi va barqarorligini oshirish boʻyicha innovatsion yechimlarni ishlab chiqish bilan shugʻullanadigan yosh tadbirkorlarga moʻljallangan.

Ishtirokchilarni nimalar kutmoqda:

• Taʼlim va mentorlik: Startaplar keng qamrovli taʼlim tizimi va qishloq xoʻjaligi, texnologiya va biznes sohasidagi yetakchi mutaxassislardan murabbiylik yordamiga ega boʻladilar;
• IT-loyihalarni ishlab chiqish va amalga oshirishda qoʻllab-quvvatlash: startaplar dastur davomida va inkubatsiyadan keyingi davrda oʻzlarining innovatsion IT-mahsulotlari va xizmatlarini yaratish va joriy etishda faol qoʻllab-quvvatlanadilar;
• Infratuzilmadan foydalanish imkoni: Startaplar ofis maydoni, asbob-uskunalar va boshqa resurslardan foydalanish imkoniyatiga ega bo‘lishadi.

YeXHT, BMT FAO va IT Park oʻrtasidagi hamkorlik dastur ishtirokchilariga muvaffaqiyatli rivojlantirish va innovatsiyalarni joriy etish uchun zarur boʻlgan ekspert bilimlari va resurslaridan foydalanish imkoniyatini beradi.

Dastur 17-noyabrda boshlanadi. Arizalar 16-noyabrgacha quyidagi havola orqali qabul qilinadi: https://forms.gle/vqn4WU3sK9XRSuzd6

Inkubatsiya dasturi ikkita tashabbus doirasida amalga oshiriladi:

• YeXHTning Oʻzbekistondagi loyihalari koordinatorining iqtisodiy taraqqiyotni qoʻllab-quvvatlash dasturi;
• BMT FAOʻning Raqamli qishloqlar tashabbusi (DVI).

Inkubatsiya dasturining maqsadi innovatsiyalarni ragʻbatlantirish orqali Oʻzbekistonda startap ekotizim va biznesni rivojlantirishni faol qoʻllab-quvvatlashdan iborat. Dastur yangi ish oʻrinlari yaratish va mintaqaning iqtisodiy rivojlanishiga hissa qoʻshishi rejalashtirilgan.