2022-yilda rezidentlar eksporti hajmi $140 millionga yetdi

IT Park rezidentlari eksporti hajmi ijobiy dinamikani saqlab qolishda davom etmoqda. Shunday qilib, 2022-yilning 4-choragi yakunlariga ko‘ra, u $140 millionga o‘sdi, shundan $65,1 millioni BPO kompaniyalari xizmatlari eksportiga to‘g‘ri keldi. Shu bilan birga, eksportning 81 foizi AQShga, qolgani – Buyuk Britaniya, Germaniya, Rossiya, MDH va BAAga toʻgʻri keladi.

IT Park rezidentlari tomonidan ko‘rsatilayotgan xizmatlarning umumiy hajmida ham o‘sish kuzatilmoqda. U 5,1 trillion so‘mni tashkil etib, bu o‘tgan yilning shu davriga nisbatan 2 barobar ko‘p. Yoʻnalishlar boʻyicha hajm quyidagicha taqsimlandi:

• DT ishlab chiqish – 2,78 trln soʻm
• ma’lumotlarni qayta ishlash – 1,5 trillion so‘m
• BPO – 729,1 mlrd so‘m
• IT-ta’lim – 83,3 mlrd so‘m
• IT-konsalting – 8,5 mlrd so‘m

Eslatib oʻtamiz, 2022-yilning yakunlariga koʻra IT Park rezidentlari soni 1122 ta kompaniyani tashkil etgan boʻlsa, 2023-yil 1-mart holatiga koʻra 1173 taga (830 ta kompaniya – Toshkentda, 343 tasi – viloyatlarda joylashgan) yetdi, shundan:

• 419 – yangi tashkil etilgan kompaniyalar;
• 173 – xorijiy kapitalga ega kompaniyalar;
• 229 – taʼlim kompaniyalari;
• 352 – eksport qiluvchi kompaniyalar, ulardan 188 tasi – dasturchi-kompaniyalar va 164 tasi – BPO kompaniyalari.

Ta’kidlash joizki, taqdim etilayotgan imtiyozlar tufayli IT Park rezidentlari qo‘shimcha ish o‘rinlarini yaratib, mamlakatimizda IT-mutaxassislar safini ko‘paytirmoqda. 2023-yil 1-yanvar holatiga ko‘ra, rezident kompaniyalarda 18 000 kishi faoliyat yuritadi.

IT Parkʼning 2022-yildagi yutuqlariga bag‘ishlangan press konferensiyasida ma’lum bo‘lishicha, 2023-yil oxiriga qadar IT-xizmatlar eksporti hajmini $300 millionga, keyingi yilda esa – $500 millionga yetkazish rejalashtirilgan.