“BIPO” kompaniyasi O‘zbekistonda o‘z faoliyatini boshlamoqda

IT Park Uzbekistan va Singapurning “BIPO” kompaniyasi “Global Business Services Forum” tadbiri doirasida uchrashuv oʻtkazdi. Uchrashuvda IT Park Uzbekistan delegatsiyasiga xizmatlar eksportini rivojlantirish boʻyicha direktor Maxliyo Muksinova boshchilik qildi, “BIPO” tomonidan esa kompaniyaning Xitoydagi mintaqaviy rahbari Yuriy Karp ishtirok etdi.

Mazkur uchrashuvdan maqsad mintaqada axborot texnologiyalari va autsorsingni rivojlantirishga qaratilgan hamkorlik strategiyalari va rejalarini muhokama qilishdan iborat boʻldi.

2004-yilda tashkil etilgan “BIPO” kompaniyasining shtab-kvartirasi Singapurda joylashgan boʻlib, butun dunyo boʻylab 42 dan ortiq ofislarga ega. Kompaniya HR jarayonlarini avtomatlashtirish, xodimlarni yollash va ish haqini hisoblash boʻyicha global autsorsingga ixtisoslashgan.

Kompaniya kengayib borayotgan imkoniyatlar va hukumati tomonidan koʻrsatilgan qoʻllab-quvvatlash tufayli mintaqada oʻsish uchun ulkan istiqbollarni koʻrmoqda. “BIPO” kompaniyasi IT Park tadbirlarida faol ishtirok etib, Oʻzbekistondagi texnologiyalar sohasi rivojiga hissa qoʻshish uchun oʻzining ekspert bilim va resurslarini taqdim qilishi rejalashtirilgan.

Yuriy Karp kompaniya Oʻzbekistonda roʻyxatdan oʻtish jarayonini allaqachon boshlagani va uni sentyabrgacha yakuniga yetkazishni rejalashtirayotganini tasdiqladi. “BIPO” oʻz faoliyatining birinchi yilida Oʻzbekistonda oʻnlab xodimlarni ishga qabul qilishni rejalashtirmoqda. Shuningdek, kompaniya delegatsiyasi sentyabr oyida “ICT Week” doirasida Oʻzbekistonga tashrif buyurish niyatida.

IT Park Uzbekistan “BIPO” kompaniyasi tashabbuslarini qoʻllab-quvvatlab, mintaqada investitsiyalarni jalb qilish va biznesni rivojlantirishga qaratilgan turli dastur va tashabbuslar doirasida hamkorlik qilish imkoniyatlarini muhokama qildi. Qoʻshimcha ravishda “BIPO” vakillarining Oʻzbekiston, Xitoy va Osiyoning boshqa mintaqalarida boʻlib oʻtadigan IT Park tadbirlarida spiker va hamkorlar sifatida ishtirok etish imkoniyatlari koʻrib chiqildi.

IT Park Uzbekistan va “BIPO” kompaniyasi oʻrtasidagi uchrashuv axborot texnologiyalari sohasida xalqaro aloqalar va hamkorlikni mustahkamlash muhimligini taʼkidladi. Muhokama qilingan rejalar va istiqbollar “BIPO”ning Oʻzbekistonda faol rivojlanish niyatidan dalolat beradi, bu esa kompaniyaga ham, butun mintaqaga ham sezilarli foyda keltiradi. Qoʻshimcha maʼlumot olish va yangiliklarni kuzatib borish uchun IT Park rasmiy saytiga tashrif buyurishni va yangiliklarga obuna boʻlishni tavsiya qilamiz.