Frame va Sarkor Telecom hamkorlik memorandumini imzoladi

“ICT Week Uzbekistan 2025” doirasida IT Park Uzbekistan rezidenti bo‘lgan “Frame” kompaniyasi va mamlakatning yetakchi telekommunikatsiya operatorlaridan biri “Sarkor Telecom” o‘rtasida hamkorlik memorandumi imzolandi. Ushbu kelishuv raqamli xizmatlarni rivojlantirish hamda O‘zbekistonning IT-ekotizimini mustahkamlashga qaratilgan.

Frame — kontent taqdim etuvchi kompaniyalar uchun platforma ishlab chiqishga ixtisoslashgan IT Park Uzbekistan rezident kompaniyasi. Uning yechimlari asosida foydalanuvchilar qulay onlayn shaklda televizion kanallar, filmlar va boshqa kontentdan foydalanish imkoniyatiga ega bo‘ladilar.

Hamkorlik ikkala kompaniyaning texnologik imkoniyatlari va tajribasini birlashtirish, raqamli xizmatlar ko‘lamini kengaytirish hamda foydalanuvchilarga yangi innovatsion mahsulotlarni taklif etish imkonini beradi. Shuningdek, bu hamkorlik raqamli texnologiyalar sohasida ilg‘or yechimlarni joriy etish uchun istiqbollar ochadi.

IT Park Uzbekistan uchun ushbu memorandumning imzolanishi mamlakatning IT-biznesni rivojlantirish uchun jozibador markaz sifatidagi mavqeini mustahkamlash, xalqaro va mahalliy hamkorlikni kengaytirish, shuningdek, bozorda innovatsiyalarni joriy etish uchun yangi imkoniyatlar yaratishni anglatadi.