Global Startup Awards — Central Asia Final Toshkentda “ICT Week” doirasida o‘tkaziladi

2025-yil 26-sentyabr kuni Toshkentda “ICT Week” doirasida “Global Startup Awards — Central Asia Final” — startaplar uchun eng nufuzli xalqaro mukofotning mintaqaviy finali bo‘lib o‘tadi. Tadbir 8 mamlakatdan startaplar, sohaning yetakchi mutaxassislari, investorlar, akseleratorlar va OAV vakillarini bir joyga to‘plab, Markaziy Osiyoda innovatsiyalarni rivojlantirish va uning jahon maydonidagi o‘rnini mustahkamlash uchun keng qamrovli platformaga aylanadi.

Global Startup Awards (GSA) — innovatsiyalar va texnologik tadbirkorlik sohasidagi startaplar ekotizimi uchun eng yirik xalqaro platforma bo‘lib, u xalqaro tanlovlar, tadbirlar, hamkorlik va jamiyat orqali istiqbolli va innovatsion tadbirkorlar hamda ularning startaplarini aniqlash va qo‘llab-quvvatlashga qaratilgan. 12 yil davomida platforma 19 ta mintaqa va 154 mamlakatni qamrab olib, 160 000 dan ortiq ariza va 822 000 dan ziyod ovoz to‘pladi. Uning ishtirokchilari va g‘oliblari orasida umumiy qiymati 64 milliard dollardan oshgan 16 ta “unicorn” kompaniyalar mavjud.

“Global Startup Awards — Central Asia Final” dasturiga tashkilotchilar va hamkorlar ishtirokidagi rasmiy ochilish marosimi, sakkiz mamlakatdan kelgan finalchilarning taqdimotlari, Markaziy Osiyoning yangi innovatsion markazga aylanishi haqidagi panel muhokamasi, shuningdek, xalqaro sanoat yetakchilarining ma’ruzalari kiritilgan. Tadbir yorqin shou va sovrinlar topshirish marosimi bilan yakunlanadi.

O‘zbekiston uchun finalning o‘tkazilishi milliy ekotizim salohiyatini namoyish etish, akseleratorlar va venchur fondlari bilan hamkorlikni kengaytirish, shuningdek, mintaqaga xalqaro OAV e’tiborini jalb qilish imkonini beradi.

Jonli efir onlayn tarzda uzatiladi.

Ishtirok etish uchun ro‘yxatdan o‘tish: https://outsource.gov.uz/en/events/ict-week-2025