Google Gemini sun’iy intellekt platformasida o‘zbek tili rasman joriy etildi

Toshkentda “Sun’iy intellekt davrida yetakchilik: strategiya va innovatsiya” nomli muhim xalqaro panel sessiyasi bo‘lib o‘tdi.

Unda Raqamli texnologiyalar vaziri Sherzod Shermatov, Dubai Future Foundation bosh direktori H.E. Khalfan Belhoul, Meta kompaniyasining sun’iy intellekt bo‘yicha tadqiqotlar vitse-prezidenti Ruslan Salakhutdinov va Google Cloud’ning hukumatlar bilan aloqalar bo‘yicha rahbari Marina Zhunich hamda IT Park University bosh direktori Bokhodir Ayupov ishtirok etdi.

Panel sessiyasi sun’iy intellektning global rivojlanish dinamikasi, davlat boshqaruviga AI texnologiyalarini joriy etish amaliyoti, innovatsion yondashuvlar va kelajak strategiyalarini qamrab oldi.

Spikerlar sun’iy intellektning jamiyat hayotiga ta’siri, undagi xavfsizlik, ma’lumotlar maxfiyligi, AI modellari uchun sifatli data jamlash masalalari, shuningdek davlatlararo hamkorlikning yangi shakllarini muhokama qildi.

Toshkentda bo‘lib o‘tgan “Sun'iy intellekt davrida yetakchilik: strategiya va innovatsiya” panel sessiyasida muhim yangilik e’lon qilindi. Muhokama ishtirokchilari qatorida bo‘lgan Google Cloudning hukumatlar bilan aloqalar va davlat siyosati bo‘yicha rahbari Marina Junich Google Gemini platformasi endi o‘zbek tilini qo‘llab-quvvatlayotganini ma’lum qildi.

Ushbu yangilik O‘zbekistonda raqamli texnologiyalar va sun’iy intellekt ekotizimini rivojlantirishda muhim qadam bo‘lib, mahalliy mutaxassislar, tadbirkorlar va aholi uchun zamonaviy AI yechimlaridan ona tilida foydalanish imkoniyatini yaratadi.

Ruslan Salakhutdinov AI tadqiqotlaridagi eng so‘nggi ilmiy natijalar haqida so‘zlab, sun’iy intellekt modeli samaradorligi va uning etik tamoyillarga sodiqligini ta’minlash bugungi kunning eng muhim vazifalaridan ekanini ta’kidladi. H.E. Khalfan Belhoul sun’iy intellekt dubaylik innovatsion tashabbuslar markazida turganini, AI yechimlari shahar boshqaruvi, transport, sog‘liqni saqlash va xavfsizlik tizimlarini tubdan o‘zgartirayotganini qayd etdi. Google Cloud vakili Marina Zhunich davlat siyosati va texnologiyalar integratsiyasi bo‘yicha o‘z tajribasini ulashib, davlat sektorida AI qo‘llanishini boshqarish, xatarlarni yumshatish va raqamli suverenitetni ta’minlash bo‘yicha dunyo amaliyotlarini ko‘rsatib o‘tdi.

Panel davomida O‘zbekistonning raqamli transformatsiya borasidagi natijalari, AI ekotizimini shakllantirishda amalga oshirilayotgan keng ko‘lamli sa’y-harakatlar ham alohida e’tiborga tushdi.

Raqamli texnologiyalar vaziri Sherzod Shermatov IT-ta’limning kengayishi, yoshlar uchun zamonaviy texnologik muhit yaratilayotgani, data-markazlar va digital infratuzilmaning tez sur’atlarda rivojlanayotganini, davlat xizmatlarida AI asosida avtomatlashtirish kuchayib borayotganini alohida ta’kidladi. Shuningdek, mas’uliyatli AI boshqaruvi, etik me’yorlar, xalqaro standartlarga mos yondashuvlar bo‘yicha ham batafsil ma’lumot berdi.

Mutaxassislar ushbu panel sessiyasini nafaqat mintaqada, balki butun Markaziy Osiyoda sun’iy intellekt bo‘yicha eng muhim fikr almashuv maydonlaridan biri sifatida baholab, O‘zbekistonning sun’iy intellekt sohasidagi global jarayonlarda faol ishtirok etayotgani va innovatsion tashabbuslari bilan e’tibor qozonayotganini ta’kidladilar.