IMC O‘zbekistonda KRO yo‘nalishini kuchaytirmoqda

IT Park Uzbekistan vakillari, IT va xizmatlar eksporti departamenti boshlig‘i Jahongir Kagirov rahbarligida, “Israel Medical Center” (IMC) xalqaro klinikasi delegatsiyasi bilan uchrashuv o‘tkazdi. Delegatsiya tarkibiga kompaniya direktori Yaron Goyxman va rivojlanish bo‘yicha direktor Yelena Goyxman kirdi. Tomonlar “IMC”ning yangi ofislarini ochish, kompaniyaning hududlardagi faoliyatini kengaytirish hamda mahalliy tashkilotlar bilan hamkorlik rejalarini muhokama qildilar.

Israel Medical Center — Tel-Avivda bosh ofisi va Toshkentda filiali joylashgan xalqaro kompaniya bo‘lib, o‘z algoritmlari va genetik shifokorlar jamoasi yordamida DNKni tahlil qilish va genetik tadqiqotlar bilan shug‘ullanadi. Kompaniyada 50 ga yaqin xodim, jumladan, shifokorlar, tahlilchilar va ilmiy mutaxassislar faoliyat yuritadi. “IMC” tibbiy va konsalting xizmatlari eksportini muvaffaqiyatli rivojlantirmoqda: xorijiy mijozlardan yillik daromadi 1 million dollarga yetadi. Xalqaro hamkorlar qatoriga Yaponiya, Armaniston, Gruziya, Kipr va MDH davlatlari kiradi. Kompaniyaning O‘zbekistondagi filiali MDH mamlakatlari uchun ma’lumotlarni qayta ishlash bo‘yicha mintaqaviy markaz vazifasini bajaradi.

Tomonlar asosiy e’tiborni O‘zbekistonda “IMC” faoliyatini kengaytirish masalalariga qaratdilar. Kompaniya vakillari yangi ofislar ochish va Toshkentdan tashqari hududlarda o‘z faoliyatini rivojlantirishdan manfaatdor ekanliklarini bildirdilar.

IT Park Uzbekistan intellektual autsorsing sohasidagi ilg‘or xalqaro loyihalarni kengaytirish uchun sharoit yaratishni davom ettirmoqda. “Israel Medical Center” bilan hamkorlik O‘zbekistonga Med-Tech sohasidagi KPO-xizmatlari uchun mintaqaviy markaz sifatida qiziqish ortib borayotganini tasdiqlaydi. IT Park Uzbekistan biznesga barqaror o‘sish va global kengayish uchun zarur infratuzilma va qulay muhitni ta’minlash orqali bunday tashabbuslarni qo‘llab-quvvatlashga tayyor.