IT Park jamoasi mini-futbolda Oliy Respublika ligasiga yo‘l oldi!

Joriy yilning 19-may kuni Muhammad al-Xorazmiy nomidagi Toshkent axborot texnologiyalari universitetida mini-futbol bo‘yicha “Aloqa sohasi kubogi-2023” Birinchi ligasining final bahsi bo‘lib o‘tdi. Bunga “IT Park Uzbekistan” va “O‘zbektelekom” AK “Telekommunikatsiya transport tarmog‘i” (TTT) filiali jamoalari o‘zaro to‘qnash kelishdi.

Shiddatli turnir ko‘plab muxlislar va sport ixlosmandlarini, jumladan, AKT sohasi bilan bog‘liq turli kompaniya va tashkilotlar vakillarini jamladi.

IT Park jamoasini quyidagi ishtirokchilar taqdim etdilar:

Sultonov Humoyun – Ta’lim sifatini oshirish bo‘yicha bosh menejer, jamoa sardori;

Mirxashimov Bahodir – Ishlar bo‘limi boshlig‘i, darvozabon;

Azamat Jo‘raev – Raqamli transformatsiyani rivojlantirish bo'yicha bosh menejeri, hujumchi;

Yangiev Baezbek – Yetakchi hisobchi, hujumchi;

Abdullaev Shohrux – Yetakchi hisobchi, hujumchi;

Jo'raev Azizbek - Ta’lim bo‘limi boshlig’i, himoyachi;

Miedinov Ummet – Avtomashina haydovchisi, yarim himoyachi;

Xamraev Abduvohid – Yetakchi hisobchi, yarim himoyachi;

Baxriddinov Nizomiddin – Yuridik maslahatchi, yarim himoyachi.

“Aloqa sohasi kubogi-2023” musobaqasining birinchi yarmida jamoalar gol ura olmadi. Ikkinchi bo‘limda vaziyat keskin o‘zgardi - IT Park jamoasi sardori Sultonov Humoyun raqib darvozasiga birinchi golni kiritishga muvaffaq bo‘ldi. 8 daqiqadan so‘ng Sultonov yana bir bor raqib darvosanini ishg‘ol etdi va hisob 2:0 IT Park foydasiga hal bo‘ldi.

Biroq raqiblar ham bir joyda turmay, jarima zarbasidan birinchi golni urishga muvaffaq bo‘lishdi. Birozdan so‘ng shiddatli qarama-qarshilik chog‘ida TTT jamoasi ikkinchi golini urdi va 2:2 hisobi qayd etildi. O‘tkazib yuborilgan ikkita goldan so‘ng IT Park hujumchisi Jo‘raev Azamat uchinchi golni urib jamoasiga ustunlikni qaytarishga muvaffaq bo‘ldi, ammo bu uzoqqa cho‘zilmadi - TTT jamoasi o‘zining uchinchi golini jarima zarbasidan kiritdi.

Uchrashuvning asosiy vaqti 3:3 hisobida yakunlandi. G‘olib esa penaltilar seriyasida aniqlanishi kerak edi. Penalti tepish natijasiga ko‘ra, TTT filiali jamoasi 3:1 hisobida g‘alaba qozondi.

 

Turnirda IT Park jamoasi yuqori saviyada ishtirok etib, faxrli ikkinchi o‘rinni egalladi. Oliy Respublika ligasi yo‘llanmasini qo‘lga kiritgan final ishtirokchilariga kubok, medal va esdalik sovg‘alari topshirildi.

Barcha jamoa a’zolarini tabriklaymiz va ularga kelgusida muvaffaqiyatlar va ko'plab g‘alabalarni tilab qolamiz. Jamoaga yordam berib, qo'llab-quvvatlayotgan turnir tashkilotchilari, ishtirokchilari va muxlislariga ham o‘z minnatdorchiligimizni bildiramiz.