IT Park University Farg‘ona va Nukuslik abituriyentlar uchun 100 ta grant ajratadi

“IT Park University” Farg‘ona va Nukusdan kelgan bitiruvchilar uchun grant dasturini yo‘lga qo‘ymoqda. Yuz nafar talaba mamlakatning yetakchi IT-universitetlaridan birida bakalavriatning birinchi yilida bepul ta’lim olish imkoniyatiga ega bo‘ladi. Dastur hududlardagi iqtidorli yoshlarni qo‘llab-quvvatlash va ularning IT sohasida muvaffaqiyatli faoliyat boshlashlari uchun sharoit yaratishga qaratilgan.

IT Park University — 2022-yilda O‘zbekiston Respublikasi Prezidenti tashabbusi bilan tashkil etilgan bo‘lib, dastlabki kunlardanoq yangi IT-mutaxassislarni tayyorlashning asosiy markazlaridan biriga aylandi. Universitetdagi ta’lim jarayoni gibrid model asosida tashkil etilgan. Darslar ingliz tilida olib boriladi hamda amaliy topshiriqlar va real loyihalarni o‘z ichiga oladi. Oliy o‘quv yurtida bakalavriat va magistratura dasturlari mavjud. “EPAM” hamkorlik tarmog‘i talabalarga kompaniyaning Yevropadagi ofislarida amaliyot o‘tash imkonini beradi. Qabulning birinchi yilida 248 kishi talabaga aylandi. Bugungi kunda bu yerda 409 nafar talaba tahsil olmoqda.

“IT Park University”da talabalar IT sohasi talablariga muvofiq muntazam yangilanib turadigan dasturlar bo‘yicha ta’lim oladilar. O‘qituvchilar safida “EPAM” xalqaro kompaniyasi mutaxassislari ham bor. Ta’lim jarayoni hamkorlar bilan amaliy loyihalar va xorijda amaliyot o‘tash imkoniyatini o‘z ichiga oladi. Universitet ma’lumotlariga ko‘ra, bitiruvchilarning 80 foizdan ortig‘i allaqachon IT-kompaniyalarda faoliyat yuritmoqda.

Tashabbus doirasida birinchi o‘quv yili to‘lov-kontraktini to‘liq qoplaydigan 100 ta grant ajratilgan bo‘lib, ularning 50 tasi Nukuslik abituriyentlar uchun, qolgan 50 tasi esa Farg‘onalik bitiruvchilar uchun mo‘ljallangan. Nomzodlarni saralash ingliz tili va matematika fanlaridan kirish imtihonlari asosida o‘tkaziladi. Agar talabgorlarda bilim darajasini tasdiqlovchi xalqaro sertifikatlar (IELTS, TOEFL, CEFR, SAT, DTM, Astrum va boshqalar) mavjud bo‘lsa, ular imtihonlardan ozod etilishi mumkin. Imtihonlardan muvaffaqiyatli o‘tganlar orasidan natijalari bo‘yicha eng yaxshi 50 nafari tanlab olinadi va ular grant sohibiga aylanadi.

Har bir grant bakalavriatning bir yillik o‘qish xarajatining 100 foizini qoplaydi. Bu — talabalar uchun moliyaviy xarajatlarsiz sifatli ta’lim olish va eng istiqbolli sohalardan birida karyerasini boshlash uchun noyob imkoniyatdir. Farg‘ona va Nukuslik abituriyentlar uchun imtihonlar IT Park Uzbekistan’ning Marg‘ilon va Nukus filiallarida o‘tkaziladi.

“IT Park University” grant dasturi hududlardan kelgan bitiruvchilarni qo‘llab-quvvatlash va zamonaviy IT-ta’limdan foydalanish imkoniyatlarini kengaytirishga qaratilgan. Tashabbus yosh mutaxassislarga kasbiy rivojlanish uchun yangi imkoniyatlarga ega bo‘lish va axborot texnologiyalari sohasida karyerasini boshlash imkonini beradi.

Ishtirok etish uchun quyidagi havola orqali ro‘yxatdan o‘tish mumkin: my.itpu.uz.