IT Park Uzbekistan, Astana Hub va Growth Vision Pro startaplarning Xitoy bozoriga chiqishi uchun Xalqaro habni ishga tushirmoqda

Olmaota o‘tkazilgan “AlmatyFair.ai” sun’iy intellekt ko‘rgazmasi doirasida IT Park Uzbekistan, Qozog‘istonning “Astana Hub” va Xitoyning “Growth Vision Pro Ltd” kompaniyasi o‘rtasida strategik uch tomonlama memorandum imzolandi. IT Park Uzbekistan bosh direktori Abdulahad Kuchkarov, “Astana Hub” rahbari Magjan Madiyev va “Growth Vision Pro” direktori Lazzat Borankulova tomonidan imzolangan hujjat O‘zbekiston va Qozog‘iston startaplari hamda IT-kompaniyalariga Xitoy bozoriga kirishda yordam beradigan platforma — Xalqaro hab yaratilishiga asos bo‘ldi.

Hubning asosiy vazifalari

• Xitoy ekotizimida startaplarni tezlashtirish va kengaytirish;
• Biznes missiyalari, B2B uchrashuvlari va ixtisoslashgan ko‘rgazmalarda ishtirok etishni tashkil qilish;
• Mahsulotlarni mahalliylashtirish strategiyalarini ishlab chiqish, hamkorlar va investorlarni izlash;
• Ta’lim dasturlari va qo‘shma ilmiy-tadqiqot loyihalarini amalga oshirish;
• Xitoy texnologiya kompaniyalari va venchur fondlarini Markaziy Osiyoga jalb etish.

Abdulahad Kuchkarov ta’kidlaganidek, “Astana Hub “bilan tuzilgan qo‘shma alyans — “Central Asian Innovation Hubs” — allaqachon dastlabki natijalarini berdi: ikki mamlakatdan 40 dan ortiq kompaniya o‘z loyihalarini “Web Summit 2024” va “TechCrunch Disrupt 2024” tadbirlarida taqdim etgan. Yangi hab Xitoy bozoriga e’tibor qaratgan holda ushbu harakatni yanada kuchaytiradi, IT Park Uzbekistan rezidentlariga Xitoy akseleratorlari, mentorlik yordami va investitsiya imkoniyatlaridan foydalanish imkonini beradi.

“Growth Vision Pro”, o‘z navbatida, Xitoyning asosiy ishtirokchilari, jumladan, Shenchjen va Pekin texnologiya klasterlari bilan hamkorlikni ta’minlaydi. “Xitoy nafaqat ulkan bozor, balki ilg‘or texnologiyalar manbai hamdir. Bizning maqsadimiz — uni Markaziy Osiyo startaplari uchun ochiq qilishdir,” — deya ta’kidladi Lazzat Borankulova.

Imzolangan memorandum mintaqaviy IT-ekotizimni rivojlantirishda yangi bosqichni boshlab beradi. Loyiha O‘zbekiston va Qozog‘istonning innovatsion hablar sifatidagi mavqeini mustahkamlaydi, shuningdek, texnologiyalarni yaratishning global zanjirlariga qo‘shilish imkoniyatini yaratadi. Yaqin oylar ichida tomonlar yo‘l xaritasini amalga oshirishga kirishadilar, jumladan, Xitoyga birinchi biznes missiyalarini uyushtirish va startaplar uchun dastlabki akseleratsiya dasturlarini ishga tushirish rejalashtirilgan.