IT Park Uzbekistan Seulda vakolatxonasini ochib, O‘zbekiston-Koreya IT-biznes alyansini mustahkamlamoqda

Bugun Seul shahrida IT Park Uzbekistan vakolatxonasining rasmiy ochilish marosimi bo‘lib o‘tdi. Bu tadbir O‘zbekiston va Janubiy Koreya o‘rtasidagi sheriklikni mustahkamlashda muhim bosqich bo‘ldi. Yangi ofis IT Park Uzbekistan va Koreya xalqaro sanoat hamkorligi instituti (KIIIC) o‘rtasida tuzilgan O‘zbekiston-Koreya IT-biznes alyansi doirasida tashkil etildi. U O‘zbekiston texnologik ekotizimini koreyalik investorlar va texnologiya sohasi mutaxassislari bilan bog‘lab, hamkorlikni rivojlantirishga xizmat qiladi.

“Koreya bozori texnologiya sohasida, ayniqsa sun’iy intellekt, o‘yin ishlab chiqarish va bulutli texnologiyalar kabi yo‘nalishlarda ulkan tajribaga ega. Bu sohalarga talab juda yuqori va O‘zbekiston Koreya kompaniyalari uchun ushbu yo‘nalishlarda yuqori malakali mutaxassislar tayyorlashga intilmoqda. Bizning maqsadimiz nafaqat autsorsing va IT-xizmatlarini ko‘rsatish, balki Koreya texnologik korxonalari uchun strategik hamkor maqomini mustahkamlashdir.

Koreyada ofisning ochilishi IT Park uchun muhim bosqich bo‘ldi. Bu O‘zbekiston Respublikasi Prezidenti tomonidan IT sohasini rivojlantirishga qaratilgan farmon imzolangunga qadar yetti yil oldin tasavvur qilish qiyin bo‘lgan yutuqdir. Ishonchimiz komilki, ushbu ofis mamlakatlarimiz o‘rtasidagi hamkorlikni tezlashtirib, ikkala ekotizimga ham foyda keltiradi. Bugun IT Park Uzbekistan vakolatxonasi vaqt o‘tishi bilan o‘sib, O‘zbekiston va Koreya o‘rtasidagi uzoq muddatli hamkorlik uchun mustahkam poydevor bo‘ladigan urug‘ sifatida barpo etildi,” — dedi Jahongir Radjabov.

Alyansning asosi IT Park va “KIIIC” o‘rtasida 2024-yil 27-iyunda imzolangan, Janubiy Koreyaning IT-kompaniyalarini O‘zbekistonga jalb qilishga qaratilgan strategik kelishuvga tayanadi. Dasturiy ta’minot, moliyaviy texnologiyalar va raqamli davlat xizmatlarini rivojlantirishga e’tibor qaratgan holda, hamkorlik har ikki mamlakatda vakolatxonalar tashkil etishni qo‘llab-quvvatlaydi. Ushbu ofislar O‘zbekistondan Koreyaga IT-xizmatlar eksportini kengaytirish, korporativ hamkorlikni rivojlantirish va O‘zbekistonni autsorsing uchun istiqbolli yo‘nalish sifatida tanitishga xizmat qiladi.

Chon Ok Re hamkorlik haqida umid bilan gapirdi: “Biz tadbirlar va ishbilarmonlik imkoniyatlarini ko‘paytirish orqali ikki tomonlama munosabatlarni mustahkamlashga intilamiz. “KIIIC” IT Park va Koreyadagi 1000 dan ortiq biznes uyushmalarini bog‘lovchi ko‘prik vazifasini bajarib, turli sohalarda hamkorlikni rivojlantirishga hissa qo‘shadi. O‘zbekiston-Koreya IT-biznes alyansi doirasida buning natijasida o‘yin ishlab chiqarish, SmartPharm, bulutli texnologiyalar va boshqa sohalarda ko‘plab kichik alyanslar paydo bo‘ladi.

Ushbu aloqa bozorlarimizni yaqinlashtiradi va texnologik ekotizimimiz doirasida innovatsiyalar va o‘sishga yordam beradi.” 

Seulda yaqinda ochilgan ofis 2024-yil iyul oyida Toshkentda tashkil etilgan Koreya vakolatxonasini to‘ldirib, Koreya kompaniyalariga O‘zbekistonning jadal rivojlanayotgan texnologiya bozoriga kirish imkonini beradi. Bu ikki vakolatxona birgalikda qo‘shma loyihalarni amalga oshirish, IT-xizmatlar eksportini ko‘paytirish va texnologik innovatsiyalar hamda autsorsing uchun yangi imkoniyatlar yaratishga qaratilgan.

Bu qadam Janubiy Koreyaning O‘zbekistonga istiqbolli global IT-markaz sifatida qiziqishi ortib borayotgani ifodasidir. 2024-yilning uchinchi choragi yakuniga ko‘ra, O‘zbekistondan Koreyaga IT-xizmatlar eksporti 4,6 baravarga oshdi. So‘nggi bir yil ichida o‘ndan ortiq O‘zbekiston-Koreya qo‘shma tadbirlari, jumladan Seulda uchta “Outsourcing Conference” o‘tkazilgani ushbu hamkorlikning jadal sur’atlarini ta’kidlaydi.

Seulda IT Park Uzbekistan vakolatxonasining ochilishi O‘zbekiston va Janubiy Koreya o‘rtasidagi iqtisodiy va texnologik aloqalarni mustahkamlash yo‘lidagi muhim qadam bo‘ldi.
IT Park Uzbekistan O‘zbekistonning Markaziy Osiyodagi yetakchi innovatsiya va texnologiyalar markazi sifatidagi salohiyatini o‘rganishdan manfaatdor bo‘lgan xorijiy investorlar va kompaniyalarni faol qo‘llab-quvvatlashni davom ettirmoqda.