IT Park Uzbekistan va Qozog‘iston IT-yetakchilari Smart Point Almaty maydonida qo‘shma loyihalarni muhokama qildilar

O‘zbekiston Respublikasi Raqamli texnologiyalar vazirligi va IT Park Uzbekistan delegatsiyasi “OSON” va "BILLZ" kompaniyalari bilan muzokaralar o‘tkazdi, shuningdek “Smart Point Almaty” innovatsion markazida Qozog‘istonning yetakchi IT-kompaniyalari bilan ishchi uchrashuvlar uyushtirdi. Tadbir mintaqaviy hamkorlikni mustahkamlash va yagona texnologik ekotizimni shakllantirishda muhim qadam bo‘ldi.

OSON

Uchrashuvda O‘zbekiston Respublikasi raqamli texnologiyalar vaziri Sherzod Shermatov, IT Park Uzbekistan bosh direktori Abdulahad Kuchkarov, shuningdek, IT Park Toshkent filiali direktori Amir Mansurov ishtirok etdi.

Tomonlar 2023-yilda Olmaotada o‘z vakolatxonasini muvaffaqiyatli ochgan “OSON” kompaniyasining joriy yutuqlarini muhokama qildilar. Uchrashuv davomida kompaniyaning Qozog‘istondagi faoliyati natijalari: mijozlar bazasining o‘sishi, muvaffaqiyatli loyihalar va mintaqada hamkorlik aloqalarining mustahkamlanishi haqida ma’lumot berildi.

Bundan tashqari, kompaniya vakillari 2025 va 2026-yillarga mo‘ljallangan strategik rivojlanish rejasi bilan o‘rtoqlashdilar. Bu reja keng ko‘lamli kengayish va xalqaro maydondagi mavqeini mustahkamlashni o‘z ichiga oladi. MDH mamlakatlari, xususan, Qirg‘iziston va Tojikistonning yangi bozorlariga kirib borishga alohida e’tibor qaratildi.

BILLZ

Delegatsiyaning Olmaotaga tashrifi doirasida “Smart Point” innovatsion markazida O‘zbekistonda asos solingan va Qozog‘iston bozorida muvaffaqiyatli faoliyat olib borayotgan “BILLZ” kompaniyasi bilan uchrashuv o‘tkazildi.

“BILLZ” chakana biznesni boshqarish uchun yetakchi raqamli platforma hisoblanib, Qozog‘istonda o‘z faoliyatini jadal kengaytirmoqda. Uchrashuv davomida kompaniyaning asosiy yutuqlari, mijozlar bazasining o‘sishi, hamkorlik loyihalari va innovatsion xizmatlari muhokama qilindi.

“BILLZ”ning Qozog‘istondagi muvaffaqiyati O‘zbekiston IT-kompaniyalarining yuqori eksport salohiyati, texnologik yetuklik darajasi va jahon miqyosidagi raqobatbardoshligini namoyon etmoqda.

IT Park Uzbekistan kompaniyaning xalqaro maydondagi sezilarli yutuqlarini ta’kidlab o‘tdi hamda mintaqaviy hamkorlikni mustahkamlashga qaratilgan qo‘llab-quvvatlash choralarini muhokama qildi.

Smart Point Almaty’da kompaniyalar bilan ishchi uchrashuvlar

Smart Point Almaty — “Almaty Towers” biznes markazida joylashgan yetakchi kovorking maydoni va IT-hab hisoblanadi. Loyiha biznes uchun zamonaviy infratuzilma, ijodiy platformalar va ijtimoiy tashabbuslarni birlashtirgan holda, startaplar, IT-kompaniyalar va frilanserlar uchun qulay ekotizim yaratadi.

Asosiy kelishuvlar

“Smart Point Almat” markazida “EasyTap”, “Kwaaka”, “Sabre”, “ioka” kompaniyalari bilan uchrashuv o‘tkazildi. Sessiya doirasida Qozog‘iston startaplari o‘z mahsulotlarini, jumladan, fintech yechimlari, bulutli platformalar va elektron tijoratni avtomatlashtirish vositalarini taqdim etdilar. Ta’kidlash joizki, ushbu yechimlar logistika zanjirlarini raqamlashtirish, chakana savdo uchun sun’iy intellekt yechimlarini joriy etish va to‘lov ekotizimlarini rivojlantirishga yordam beradi. Bu esa xorijiy texnologiya kompaniyalari uchun qiziqarli bo‘lishi va kelajakda yangi xalqaro hamkorliklar uchun imkoniyat yaratishi mumkin.

Keyingi qadamlar

Olmaotadagi uchrashuv ikki mamlakat biznesining qo‘shma texnologik tashabbuslarga va yangi bozorlarga chiqish bo‘yicha sa’y-harakatlarni birlashtirishga qiziqishi ortib borayotganini tasdiqladi. Ushbu hamkorlik nafaqat Markaziy Osiyoning yangi global o‘yinchi sifatidagi mavqeini mustahkamlaydi, balki kengayish uchun yangi imkoniyatlar yaratib, Markaziy Osiyoning yagona raqamli ekotizimini shakllantirishga yo‘l ochadi.