IT Park Uzbekistan va Yaponiyaning “Orion Computer” kompaniyasi Yaponiya bozoriga chiqish uchun mutaxassislar tayyorlashda kuchlarini birlashtirmoqda

IT Park Uzbekistan xizmatlar eksportini rivojlantirish boshqarmasi rahbari Jahongir Kagirov boshchiligidagi vakillari Yaponiyaning “Orion Computer Co., Ltd.” kompaniyasi bosh direktori Naoko Ishikava rahbarligidagi vakillari bilan ishbilarmonlik uchrashuvini o‘tkazdi. Tomonlar Yaponiyada til ta’limi, kadrlar tayyorlash va ularni keyinchalik ishga joylashtirish sohasidagi hamkorlik istiqbollarini, shuningdek, O‘zbekistonda HR-agentlik va yapon tili maktabini tashkil etish imkoniyatlarini muhokama qildilar.

Orion Computer Co., Ltd. ——1998-yilda asos solingan yapon kompaniyasi bo‘lib, IT-xizmatlar, kasbiy ta’lim va xalqaro kadrlar tanlovi bo‘yicha ixtisoslashgan. 10 dan 43 nafargacha xodim va 20 million iyena ustav kapitaliga ega bo‘lgan kompaniya kompyuter va dasturiy ta’lim, veb va IT-yechimlarni ishlab chiqish, hamda xorijiy mutaxassislarni tayyorlash yo‘nalishlarini rivojlantirmoqda. Kompaniyaning yillik daromadi 100-300 million iyena atrofida baholanib, bu uning mintaqaviy bozorda barqaror va ko‘p tarmoqli faoliyat yuritayotganidan dalolat beradi.

Uchrashuv davomida “Orion” vakillari O‘zbekistonda yapon tili maktabi, HR-agentligi, shuningdek, mutaxassislarni keyinchalik Yaponiyada ishga joylashtirish uchun tayyorlaydigan ta’lim platformasini yaratishga qiziqish bildirdilar. Yaponiya bozori talablariga mos ravishda nomzodlarni ishga joylashishdan oldin va keyin qo‘llab-quvvatlash tizimini yaratishga alohida e’tibor qaratildi.

IT Park Uzbekistan, o‘z navbatida, O‘zbekistondagi yapon kompaniyalari uchun masofadan ishlash maqsadida yapon tilini biladigan mutaxassislarni tayyorlash dasturini ishga tushirishni taklif etdi. Bunday model xizmatlar eksporti va mamlakat ichida ish o‘rinlari yaratish uchun yangi imkoniyatlar taqdim etadi.

IT Park Uzbekistan ta’lim va masofaviy bandlik sohasidagi xalqaro loyihalar uchun qulay shart-sharoitlarni rivojlantirishni davom ettirmoqda. Bu esa IT-xizmatlarni eksport qilish va o‘zbekistonlik mutaxassislarni global raqamli iqtisodiyotga integratsiya qilish uchun yangi imkoniyatlar yaratmoqda. “Orion Computer Co., Ltd.” bilan potensial hamkorlik intellektual autsorsingni rivojlantirish va xalqaro hamkorlikni mustahkamlashga muhim hissa qo‘shadi. IT Park, o‘z navbatida, bunday tashabbuslarni har tomonlama qo‘llab-quvvatlashga, ularning barqaror rivojlanishi va jahon bozorlariga chiqishini ta’minlashga tayyor.