IT Park Uzbekistan xalqaro hamkorlikni mustahkamlamoqda: jahon IT gigantlari bilan istiqbolli muzokaralar

Xalqaro aloqalarni kengaytirish doirasida IT Park Uzbekistan delegatsiyasi “Shared Services & Offshore Outsourcing Week” tadbirida ishtirok etib, O‘zbekistonning IT-biznes yuritish imkoniyatlarini namoyish etdi.

Bu nima uchun muhim?

Orlandodagi “Shared Services & Outsourcing Week” xizmat ko‘rsatish, IT va autsorsing kompaniyalari rahbarlari uchun yetakchi platforma hisoblanib, unda asosiy strategiyalar, texnologiyalar va tendensiyalar muhokama qilinadi. To‘rt kun davomida 1000 nafardan ortiq ishtirokchi tajriba almashadi, ilg‘or amaliyotlarni o‘rganadi va biznesni rivojlantirish uchun yangi imkoniyatlarni izlaydi.

IT Park Uzbekistan o‘z stendini taqdim etdi, u xalqaro kompaniyalar tomonidan katta qiziqish uyg‘otdi. Konferensiya davomida O‘zbekistonni biznesni rivojlantirish uchun istiqbolli yo‘nalish sifatida namoyon etayotgan global IT-sektori vakillari bilan bir qator muzokaralar o‘tkazildi.

Yirik kompaniyalar rahbarlari hamkorlikka, jumladan, vakolatxonalar ochish, biznesni kengaytirish va investitsiyalarni jalb qilish imkoniyatlariga qiziqish bildirdilar. Professional va raqamli xizmatlar sektori salohiyati, yechimlarning iqtisodiy samaradorligi, shuningdek, imkoniyatlarni batafsil o‘rganish uchun O‘zbekistonga kelgusi uchrashuvlar va tashriflar rejalari muhokama qilindi. Muzokaralar chog‘ida kadrlar salohiyati, texnologik infratuzilma va xalqaro biznesni qo‘llab-quvvatlashga qaratilgan davlat tashabbuslariga alohida e’tibor qaratildi.

“Shared Services & Offshore Outsourcing Week” doirasidagi muzokaralar natijasida dasturiy ta’minot va raqamli xizmatlar ishlab chiqishga ixtisoslashgan 10 ta kompaniyani O‘zbekistonga jalb qilish rejalashtirilmoqda. Bu kamida 250 ta yangi ish o‘rni yaratilishiga olib keladi. Bundan tashqari, O‘zbekistonning jahon bozoridagi nufuzini oshirish va eksportga yo‘naltirilgan kompaniyalarni jalb qilish uchun xalqaro maslahatchilar bilan hamkorlik olib borilmoqda.

Keyingi qadamlar

Xalqaro kompaniyalar bilan olib borilgan muzokaralar O‘zbekistonga istiqbolli IT-markaz sifatida qiziqish tobora ortib borayotganini tasdiqlaydi. IT Park Uzbekistan qulay sharoitlar, malakali kadrlar va bozorga kirishning barcha bosqichlarida qo‘llab-quvvatlashni taklif etish orqali global o‘yinchilarni jalb qilish bo‘yicha faol ishlarini davom ettirmoqda. Ushbu aloqalarning yanada rivojlanishi mamlakatda xorijiy kompaniyalarning yangi ofislari ochilishi va yuqori texnologiyali ish o‘rinlari yaratilishiga olib kelishi mumkin.