IT Park va Techno Women IT sohasida ayollarni qoʻllab-quvvatlash uchun kuchlarni birlashtirmoqda

IT Park va texnologiya sohalarida mehnat qiladigan ayollarni birlashtiruvchi “Techno Women” notijorat tashkiloti oʻzaro anglashuv va hamkorlik memorandumini imzoladilar. Memorandumning maqsadi Markaziy Osiyolik qizlar va ayollarni tadbirkorlik va IT sohasida rivojlantirish va qoʻllab-quvvatlashdan iborat.

Imzolash marosimida IT Parkʼning raqamli taʼlimni rivojlantirish boʻyicha bosh direktor oʻrinbosari Maxliyo Muksinova va “Techno Women” kompaniyasi prezidenti Aziza Shujeeva ishtirok etdi.

Kelishuv texnologiya sanoatida ayollar ishtirokini oshirishga qaratilgan boʻlib, IT sohasida ishlaydigan ayollarni qoʻllab-quvvatlash maqsadida tajriba, bilim va resurslar almashish, shuningdek, ularning kasbiy va shaxsiy oʻsishi uchun sharoit yaratishni nazarda tutadi.

Tomonlar IT Park va Techno Women oʻrtasidagi hamkorlik Markaziy Osiyo IT sohasidagi ayollar va qizlar uchun yanada qulay sharoitlar yaratishga hissa qoʻshishi va bu sanoatga yanada koʻproq iqtidorli mutaxassislarni jalb qilishini taʼkidladilar.

Ayollarning kasbiy koʻnikmalarni rivojlantirish va texnologiya sohasidagi ishtirokini oshirishga qaratilgan tadbirlar va dasturlar oʻtkazilishi rejalashtirilgan.

Memorandumning imzolanishi Oʻzbekiston IT sohasida tenglik va inklyuzivlikni rivojlantirish yoʻlidagi muhim qadam boʻlib, har ikki tomonning sanoatning barcha ishtirokchilari uchun teng imkoniyatlar yaratishga intilishini namoyish etdi.