IT Park va YeXHT IT va innovatsiyalar sohasidagi hamkorlikni muhokama qildi

9-avgust kuni YeXHT raisi Buyar Usmoniy boshchiligidagi 11 kishidan iborat Yevropa xavfsizlik va hamkorlik tashkiloti delegatsiya IT Park Uzbekistanga tashrif buyurdi.

Delegatsiyani IT Park Uzbekistan bosh direktori Farhod Ibrohimov, bosh direktorning innovatsiyalar boʼyicha oʼrinbosari Jahongir Rajabov, shuningdek, investitsiyalar va xalqaro aloqalar boʼlimi boshligʼi Nigora Mirjalilova kutib oldi.

Yigʼilishda IT Parkning yutuqlari va yangi loyihalari haqida taqdimot oʼtkazildi. Talabalarning katta qismi IT sohasida tahsil olayotgan Oʼzbekistonning inson salohiyatiga alohida eʼtibor qaratildi. Mamlakatda besh milliondan ortiq kishi ingliz tilini biladi va IELTS sertifikatlariga ega, bu esa Oʼzbekistonni BPO va autsorsing sohasidagi hamkorlikning istiqbolli hamkoriga aylantiradi.

YeXHTning iqtisodiy va ekologik oʼlchov boʼyicha milliy loyiha rahbari Umid Poʼlatov IT Park bilan uzoq muddatli hamkorlikni taʼkidlab, Open Data Challenge, Open Data Acceleration va HACK4REGION kabi qoʼshma loyihalar, ayollar tadbirkorligi qoʼllab-quvvatlash va yoshlarni raqamli rivojlantirish sohasidagi loyihalarni eslatib oʼtdi.

Uchrashuv yakunida hamkorlik boʼyicha quyidagi takliflar ilgari surildi:

• IT kompaniyalarni eksport sohasida qoʼllab-quvvatlash uchun murabbiylik dasturini ishlab chiqish va tajriba almashish uchun Yevropa Ittifoqi mamlakatlariga sayohatlarni tashkil etish;
• Inkubatsiya, akseleratsiya dasturlari va xakatonlar tashkil etish orqali startap hamjamiyatini qoʼllab-quvvatlash;
• Ayollar tadbirkorligi va salohiyatini oshirish dasturlarini qoʼllab-quvvatlash.

Ikkala tomon ham muvaffaqiyatli hamkorlikni davom ettirish va yangi loyihalarni rivojlantirishga umid bildirishdi. Uchrashuv esdalik sovgʼalarini topshirish bilan yakunlandi.