Kanada universitetlari bilan hamkorlik yoʻlida yangi imkoniyatlar

21-fevral kuni IT Park Uzbekistan ofisiga Kanada elchixonasi savdo vakillari xizmatining biznesni rivojlantirish bo'yicha maslahatchisi Konisheva Aleksandra Nikolayevna tashrif buyurdi.

Tashrifdan koʻzlangan maqsad taʼlim va axborot texnologiyalari sohasida biznesni rivojlantirish sohalarida hamkorlik qilish imkoniyatlarini muhokama qilishdan iborat.

Mehmon Xalqaro aloqalar bo‘limi boshlig‘i Nigora Mirjalilova va xalqaro hamkorlik bo'yicha menejer Umida Odilova tomonidan kutib olindi. Uchrashuvda IT Park vakillari mamlakatni mintaqaviy IT xabga aylantirish bo‘yicha hukumat tomonidan ko‘rilayotgan chora-tadbirlar haqida so‘zlab berdi.

Nigora Mirjalilova IT Park faoliyatining asosiy yo‘nalishlari, xususan, O‘zbekiston hukumati tomonidan iqtisodiyotda IT-sohani rivojlantirish bo‘yicha ko‘rsatilayotgan koʻmak va tashabbuslar, IT-ta’limni rivojlantirish biznesni qo‘llab-quvvatlash dasturlari, shuningdek, xalqaro hamkorlik doirasida xorijiy tashkilotlar bilan birgalikda amalga oshirilayotgan loyihalar haqida batafsil ma’lumot berdi. Tomonlar IT Park o‘z rezident kompaniyalariga taqdim etayotgan erkin iqtisodiy zona, IT-ta’limni isloh qilish va IT-mutaxassis kadrlar tayyorlash borasidagi ishlarni muhokama qildilar.

Elchixona vakili IT Park University onlayn ta’lim muassasasi bilan ham tanishtirildi. Aleksandra Nikolaevna Kanada universitetlarida onlayn ta’lim dasturlari ommalashganini ta’kidlab, mamlakatning axborot texnologiyalariga ixtisoslashgan universitetlari bilan hamkorlikni ko‘rib chiqishni taklif qildi.

Uchrashuvni sarhisob qilar ekan, Aleksandra Nikolaevna Kanada universitetlari va O‘zbekistondagi birinchi onlayn ta’lim dargohi IT Park University o‘rtasida qo‘shma dasturlarni tashkil etishni qo‘llab-quvvatlashga tayyor ekanligini bildirdi.