Oʻzbekiston-Koreya IT-biznes alyansi tashkil etildi

25-iyun kuni Koreya Respublikasida IT Park Uzbekistan va Koreya xalqaro sanoat hamkorlik instituti (KIIIC) oʻrtasida Oʻzbekiston-Koreya IT-biznes alyansini tuzish va bu orqali ikki mamlakat texnologik tarmoqlari oʻrtasidagi aloqalarni mustahkamlash toʻgʻrisidagi bitimni imzolash marosimi boʻlib oʻtdi. 

Bitimni imzolash marosimida Raqamli texnologiyalar vaziri Sherzod Shermatov boshchiligidagi Oʻzbekiston delegatsiyasi va IT Park Uzbekistan bosh direktori Farhod Ibragimov ishtirok etdi.

Koreya IT-sektori Koreyaning 6 ta yetakchi IT assotsiatsiyalari, jumladan Koreya sanoatlashtirish boʻyicha xalqaro hamkorlik instituti (KIIIC), Koreya dasturiy taʼminot assotsiatsiyasi (KOSA), Koreya xizmat koʻrsatish sanoati instituti (KSI), Koreya axborot texnologiyalari xizmatlari sanoati assotsiatsiyasi (ITSA), Koreya fan va sanoat assotsiatsiyasi (RNDIA), Koreya taʼlim texnologiyalari assotsiatsiyasi (KETIA), Seul raqamlashtirish jamgʻarmasi (SDF) va Kyonbuk Texnoparki tomonidan taqdim etildi.

Marosimni Raqamli texnologiyalar vaziri Sherzod Shermatov kirish nutqi bilan ochib berib, oʻzbek va koreys xalqlarining tarixiy, siyosiy va madaniy yaqinligi samarali hamkorlik garovi ekanini taʼkidladi. Bundan tashqari, Oʻzbekistonda yaratilgan imkoniyatlar tufayli Koreya kompaniyalari malakali IT-mutaxassislarini topish, shuningdek, ularning operatsion xarajatlarini sezilarli darajada optimallashtirish imkoniyatiga ega boʻladi.

Bundan tashqari, IT Park Oʻzbekiston bosh direktori Farhod Ibragimov viloyatlarda autsorsing faoliyati uchun yaratilgan shart-sharoitlar, tez fursatlar ichida korxona tashkil etish uchun “One Stop Shop” kabi keng qamrovli qoʻllab-quvvatlash va xizmatlar dasturlarining afzalliklari, shuningdek, Oʻzbekistonning inson kapitali salohiyati haqida maʼlumot berdi. 

Tadbirda Koreya IT-kompaniyalaridan Oʻzbekistonga buyurtmalarni jalb qilish va mamlakatda mavjud Koreya rezident kompaniyalarining muvaffaqiyatli faoliyatini taqdim etish maqsadida “KIII” raisi Chon Ok-Rae soʻzga chiqdi. Bularning barchasi ikki tomonlama hamkorlikni mustahkamlash va Oʻzbekistonda Koreya Respublikasining texnologik kompaniyalari ishtirokini oshirishga qaratilgan.

Marosimda imzolangan kelishuvga koʻra, mamlakatimizning Koreya bozoriga IT-xizmatlar eksportini oshirish, kompaniyalar bilan muzokaralar olib borish va Oʻzbekistonni yangi autsorsing yoʻnalishi sifatida ilgari surish maqsadida Koreya va Oʻzbekistonda hamkor IT-vakolatxonalar ochiladi. Shuningdek, mazkur ittifoq orqali Koreya bozorida oʻz loyihalari va xizmatlarini targʻib qilishga qiziqqan Oʻzbek kompaniyalariga amaliy yordam koʻrsatiladi. 

Tadbir chogʻida “Seul Digital Foundation” va “Miso Information Technology” IT biznes-alyansning birinchi ishtirokchi kompaniyalariga aylanishdi.

Shuningdek, imzolash marosimida Oʻzbekistonda autsorsing ofislarini ochishga qiziqish bildirgan Koreya IT-kompaniyalari ishtirok etishdi. IT Park vakillari ular uchun taqdimot oʻtkazdilar va unda Oʻzbekiston ishbilarmonlik bozoridagi mavjud vaziyat haqida maʼlumot berishdi. Maʼruzachilar mamlakatda biznes yuritishning afzalliklarini taʼkidlab, IT-sektorning oʻsish suratlari va xorijiy investorlar uchun qulay sharoitlarni eʼtirof etishdi. Kompaniyalarga soliq imtiyozlari, zamonaviy infratuzilma obyektlaridan foydalanish imkoniyati va ilgʻor axborot texnologiyalari boʻyicha mutaxassislar bilan hamkorlik qilish imkoniyatini taqdim etuvchi IT Park rezidentlik maqomiga alohida eʼtibor qaratildi. Taqdim etilgan shart-sharoitlar koreyalik hamkorlar orasida ulkan qiziqish uygʻotdi, bu esa kelgusi hamkorlik va Oʻzbekistonda xalqaro biznesni yanada rivojlantirish istiqbollarini ochib beradi.

Oʻzbekiston-Koreya IT-biznes alyansining tashkil etilishi xorijiy investitsiyalarni jalb qilish, IT-sektorini rivojlantirish, yangi ish oʻrinlari yaratish va mahalliy mutaxassislarning malakasini oshirishga yordam beradi. Xalqaro munosabatlar va hamkorlikni mustahkamlash ilgʻor texnologiyalar va innovatsiyalardan foydalanish imkoniyatini taqdim etadi, bu esa oʻz navbatida mamlakatning iqtisodiy oʻsishi va jahon bozoridagi raqobatbardoshligiga ijobiy taʼsir koʻrsatadi. Bundan tashqari, Koreya kompaniyalarining Oʻzbekiston biznes landshaftiga muvaffaqiyatli integratsiyalashuvi boshqa xorijiy investorlar uchun namuna boʻlib, Oʻzbekistonning jozibador va istiqbolli biznes platforma sifatidagi obroʻsini oshiradi.