O‘zbekiston mintaqadagi eng xavfsiz mamlakat deb e’tirof etildi

“Numbeo” tomonidan 2025-yilning birinchi yarmi bo‘yicha e’lon qilingan yangilangan reytingga ko‘ra, O‘zbekiston dunyodagi eng xavfsiz davlatlar orasida 25-o‘rinni egalladi. Bu ko‘rsatkich o‘tgan yilning shu davriga nisbatan ikki pog‘onaga yuqorilagan. O‘zbekiston mintaqada jamoat xavfsizligini ta’minlash sohasida shubhasiz yetakchiga aylandi.

“Numbeo” butun dunyo bo‘ylab, shu jumladan O‘zbekistondagi foydalanuvchilarning anonim so‘rovnomalari asosida ma’lumotlar to‘plash bilan shug‘ullanadi. Reyting metodologiyasi xavfsizlik sohasidagi ilmiy va davlat tadqiqotlariga tenglashtirilgan. Indeks yiliga ikki marta yangilanadi va so‘nggi besh yillik davr mobaynidagi joriy hamda tarixiy ma’lumotlarni inobatga oladi. 

Reyting ikkita ko‘rsatkich — jinoyatchilik (Crime Index) va xavfsizlik indeksi (Safety Index) asosida shakllantiriladi, bunda birinchisining past, ikkinchisining esa yuqori bo‘lishi mamlakatdagi xavfsizlik darajasining yuqoriligini bildiradi. O‘zbekiston xavfsizlik indeksida 73,4 ball to‘plagan bo‘lib, bu bilan Shveytsariya va Chexiya mamlakatlaridan o‘zib ketdi va Finlyandiya hamda Daniya bilan bir qatorda turmoqda.

Taqqoslash uchun: 2024-yilning birinchi yarmida O‘zbekiston 71 ball bilan 27-o‘rinni egallagan edi. Bu esa jamoat xavfsizligi sohasidagi ijobiy tendensiyani ko‘rsatadi.
O‘zbekistonning xavfsizlik reytingida yuqorilashi nafaqat ichki vaziyatning yaxshilanganidan darak beradi, balki milliy IT-ekotizim rivoji uchun muhim strategik ustunlik hisoblanadi. 

Tez sur’atlar bilan rivojlanayotgan O‘zbekistonning axborot texnologiyalari va xizmatlar ekotizimi uchun bu reyting — faqatgina milliy g‘urur manbai emas, balki global maydonda real raqobatbardosh ustunlikdir. Xavfsizlik va barqarorlik — xalqaro investorlar, IT-mutaxassislar, startap asoschilari hamda mintaqaviy vakolatxonalarni ochish yoki autsorsingni rejalashtirayotgan xorijiy kompaniyalar uchun asosiy mezonlardandir.

Birinchidan, xavfsizlik — xorijiy investorlar biznesni boshlash yoki ofis ochishdan oldin e’tibor qaratadigan ilk mezonlardan biridir. Xotirjam muhit — bu past xavf darajasi demak. 

Ikkinchidan, xalqaro IT-mutaxassislar nafaqat ishlash, balki tinch va osoyishta hayot kechirish imkoniyati bo‘lgan joyni tanlaydilar.

Bu IT-kompaniyalar uchun ham afzallikdir: mamlakatda xavfsizlik bo‘lsa, biznes jarayonlari barqaror, uzilishlar kam, kelajakka ishonch katta bo‘ladi.  

Va nihoyat, bu — raqamli millat imidjini shakllantirish yo‘lidagi muhim qadamdir. Xavfsizlik — “aqlli” davlat konsepsiyasining ajralmas qismi bo‘lib, hamkorlar va global texnologik hamjamiyat uchun jozibadorlik omilidir. O‘zbekiston mintaqaning yangi IT-markaziga aylanib borayotganini ishonch bilan namoyon qilmoqda.  

Raqamli xizmatlar eksportining oshib borishi, xorijiy investitsiyalar oqimi va mahalliy IT-kadrlar tayyorlanayotgan hozirgi sharoitda, O‘zbekistonning xalqaro xavfsizlik reytinglaridagi yuqori o‘rni bizning asosiy xabarimizni yanada kuchaytiradi:

“O‘zbekiston — bu innovatsiyalar himoyalangan, hamkorliklar ishonchli va texnologik kelajak ishonch bilan qurilayotgan davlat.”