O‘zbekiston va Koreya elektron hukumat loyihalarini tatbiq etadi

26-yanvar kuni Raqamli texnologiyalar vaziri Sherzod Shermatov Koreya Respublikasining O‘zbekistondagi Favqulodda va Muxtor Elchisi janob Kim Xi San bilan uchrashdi.

Tomonlar elektron hukumat va telekommunikatsiyalar sohasidagi ikki tomonlama hamkorlikni muhokama qildilar. Muloqot ishtirokchilari elektron hukumat sohasida istiqbolli loyihalarni amalga oshirish, raqamli texnologiyalar sohasida aholiga ko‘rsatilayotgan xizmatlar sifatini oshirish, shuningdek, mamlakatning ushbu yoʻnalishdagi xalqaro reytinglarda yuqori o‘rinlarni egallash masalalariga alohida e’tibor qaratdilar.

Uchrashuvda janob Elchi O‘zbekiston IT-xab sifatida IT Park, xususan, oʻz rezident kompaniyalarini qo‘llab-quvvatlash dasturi tufayli Koreya IT kompaniyalari tomonidan qiziqish uygʻotayotganligini ta’kidladi. Shunday qilib, ushbu shartlar tufayli Korea Cloud bugungi kunda IT Park rezidentiga aylandi. Yaqin orada Koreyaning boshqa IT-kompaniyalarini, jumladan, BPO kompaniyalarini IT Park rezidentlari qatoriga jalb qilish rejalashtirilgan.

Shuningdek, tomonlar O‘zbekistonda IT-ta’lim sohasini birgalikda rivojlantirish va AKT sohasida kadrlar malakasini oshirishga kelishib oldilar.

Uchrashuvda O‘zbekiston va Koreya o‘rtasidagi hamkorlik 2022-yilda yangi bosqichga koʻtarilgani, 2023-yilda esa faqat kengayib borishi taʼkidlandi. Ushbu ishlarni davom ettirib, 2023-yilda mamlakatning 5 ta hududida tashkil etilgan IT Markazlari negizida “Yoshlarning raqamli iqtisodiyot va raqamli tadbirkorlikni rivojlantirish” kurslarini tashkil etish rejalashtirilgan.