O‘zbekistonning Pro-Data IT-kompaniyasi IT Park ko‘magida Qozog‘iston bozoriga chiqdi

2025-yil avgust oyida IT Park rezidenti — “Pro-Data” kompaniyasi Qozog‘iston bozorida o‘z faoliyatini boshladi. Bu uning bulutli xizmatlar geografiyasini kengaytirishda muhim qadam bo‘ldi va IT Park qo‘llab-quvvatlashining O‘zbekiston kompaniyalariga yangi bosqichga chiqishda qanday yordam berayotganiga yaqqol misol bo‘ldi.

Pro-Data — 2021-yilda tashkil etilgan va bulutli provayder xizmatlarini ko‘rsatuvchi mahalliy IT-kompaniya. Qisqa vaqt ichida kompaniya virtual va ajratilgan serverlar, xususiy bulutlar, yuqori yuklamali loyihalar uchun Kubernetes-klasterlar, sun’iy intellekt va katta hajmli ma’lumotlar bilan ishlash uchun GPU-serverlar, shuningdek, kiberhujumlardan himoya qilish va zaxira nusxa olish xizmatlarini taqdim etib, mahalliy bozorda yetakchilardan biriga aylandi. “Pro-Data” infratuzilmasi PCI DSS xalqaro xavfsizlik standartlari bo‘yicha sertifikatlangan.

Kompaniya xizmatlaridan O‘zbekistondagi yirik tashkilotlar — banklar, aviakompaniyalar va chakana savdo vakillari allaqachon foydalanmoqda. Masalan, O‘zbekiston Milliy banki o‘zining IT-infratuzilmasini “Pro-Data” bulutiga ko‘chirdi, jahon chakana savdosining yetakchilaridan biri esa kompaniyaga Markaziy Osiyodagi infratuzilmani boshqarishni ishonib topshirdi. Endilikda “Pro-Data” Qozog‘iston bozoriga ham kirib bormoqda. U yerda bulutli yechimlarga bo‘lgan talab ham tez sur’atlarda o‘sib bormoqda, biznes uchun esa ma’lumotlarni mamlakat ichida saqlash ayniqsa muhim hisoblanadi.

Kompaniyaning xorijga chiqishida IT Park hal qiluvchi rol o‘ynadi. Rezident kompaniya soliq va boshqa imtiyozlar, huquqiy va moliyaviy masalalar bo‘yicha maslahatlar oldi, hamkorlar bilan aloqalarni o‘rnatishda yordam va xalqaro ko‘rgazmalarda ishtirok etish imkoniyatiga ega bo‘ldi. IT Park ko‘magi tufayli kompaniya mahsulotlarni rivojlantirish va yangi mijozlarni jalb qilishga e’tiborini qarata oldi.

“Pro-Data” kompaniyasining Qozog‘iston bozoriga kirib borishi O‘zbekiston kompaniyalari tobora ko‘proq xorijiy bozorlarga chiqayotgani va raqobatbardosh yechimlarni taklif qilayotganini ko‘rsatmoqda. Bu O‘zbekistonning mintaqaviy IT-hab sifatidagi mavqeini mustahkamlaydi va butun milliy IT-ekotizimining o‘sishi uchun yangi imkoniyatlar yaratadi.