Oleg Pekos va Mahliyo Muksinova “Ayollar uchun yetakchilik maktabi” doirasida nutq so‘zlashdi

O‘zbekistonda tashkil etilgan “Ayollar uchun yetakchilik maktabi” maxsus kursi doirasida Raqamli texnologiyalar vazirining birinchi o‘rinbosari Oleg Pekos va IT Park xizmatlari eksportini rivojlantirish bo‘yicha direktori Mahliyo Muksinova “Davlat boshqaruvini raqamlashtirish, unga sun’iy intellektni samarali joriy etish va IT-eksport hajmini oshirish: odamlar hayotini yengillashtirish va aholining qo‘shimcha daromad olish imkoniyatlarini kengaytirish” mavzusida ma’ruza o‘tkazdilar.

Ma’ruza davomida mutaxassislar davlat boshqaruvi jarayonlariga raqamli texnologiyalarni joriy etishning asosiy jihatlarini yoritib, sun’iy intellektning davlat xizmatlarini optimallashtirish va fuqarolarning davlat organlari bilan o‘zaro munosabatlarini soddalashtirish borasidagi ahamiyatini ta’kidladilar. Shuningdek, ular ushbu texnologiyalar fuqarolar turmush darajasini yaxshilash, iqtisodiy imkoniyatlarni kengaytirish va yangi daromad manbalarini yaratishga qanday hissa qo‘shishi haqida fikr almashdilar.

Mahliyo Muksinova iqtisodiy o‘sish omili sifatida IT-eksportni kengaytirish muhimligiga alohida e’tibor qaratdi:

“IT Parkda biz rezidentlarimiz va startaplarimizning eksport salohiyatini faol qo‘llab-quvvatlaymiz va rivojlantiramiz, ularga xalqaro bozorlarga chiqish uchun noyob imkoniyatlar taqdim etamiz. Yaratilgan qulay biznes muhiti va qo‘llab-quvvatlash dasturlari tufayli kompaniyalar yangi bozorlarga kirib borish, investorlarni jalb qilish va o‘z bizneslarini global miqyosda kengaytirish imkoniyatiga ega bo‘lmoqda. Shuningdek, xorijiy eksport kompaniyalarini ham faol jalb etib, yangi ish o‘rinlari yaratmoqdamiz va mamlakatimizning texnologik ekotizimini rivojlantirishga hissa qo‘shmoqdamiz. Masalan, ‘Local2Global’ dasturi mentorlarni jalb qilish, xorijiy safarlarga borish, yirik xalqaro tadbirlar va ko‘rgazmalarda ishtirok etish xarajatlarining bir qismini qoplashga yordam beradi, bu esa ularning jahon bozoridagi o‘rnini mustahkamlash va rivojlantirishga ko‘maklashadi.”

Oleg Pekos, o‘z navbatida, sun’iy intellektni sog‘liqni saqlash, ta’lim va boshqaruv kabi turli sohalarga joriy etish istiqbollari haqida gapirdi, bunda sun’iy intellekt xizmatlarning samaradorligi va ommabopligini sezilarli darajada oshirishi mumkinligini ta’kidladi.

Ma’ruza “Ayollar yetakchilik maktabi” ishtirokchilarida katta qiziqish uyg‘otib, ularni raqamli texnologiyalar va davlat boshqaruvi sohasidagi yangi g‘oya va loyihalar yaratishga ilhomlantirdi.

Mazkur uchrashuv O‘zbekistonda ayollar yetakchiligini rivojlantirish dasturi doirasida muhim qadam bo‘ldi hamda ayollarni raqamlashtirish va innovatsiyalar kabi strategik sohalarga jalb qilishning ahamiyatini yana bir bor ta’kidladi.