Open Data Challenge xakatoni doirasidagi vebinarlar yakuniga yetdi

27–29-yanvar kunlari poytaxtda Open Data Challenge xakatoni bo‘lib o‘tadi. Bo‘lib oʻtadigan “OpenDataChallenge 2022” xakatoni doirasida 17–20-yanvar kunlari ochiq ma’lumotlardan foydalanish bo‘yicha jalb qilingan mutaxassislar ishtirokida maxsus vebinarlar oʻtkazildi, 24-yanvar kuni esa vorkshop bo‘lib o‘tdi.

Mavzular 4 kunga boʻlingan:

• “Davlat organlari bilan ishlash orqali ochiq ma’lumotlarni shakllantirish. Davlat sektoridagi muammolarni hal qilishda ochiq ma’lumotlardan foydalanish” (spiker – O‘zbekiston Respublikasi Prezidenti huzuridagi Statistika Agentligi ochiq ma’lumotlar portali faoliyatini monitoring qilish va muvofiqlashtirish boshqarmasi boshlig‘i Akrom Sultanov);
• “Sektordagi mavjud muammolar, mavjud ijtimoiy loyihalar, loyihalarni ishlab chiqishda qayerda va qanday ochiq ma’lumotlardan foydalanish mumkin” (spiker – O‘zbekiston Internet-Tadbirkorlari va Elektron Tijorat Uyushmasi boshqaruvi raisi, unions.uz raqamli platformasi asoschisi, boshlangʻich treker, Pro bono volontyori Sabina Akbarxojayeva);
• “SI sohasida startap yaratishda ochiq maʼlumotlardan foydalanish”(spiker — CEO Mohirdev.uz Anvar Narzullayev);
• “Korrupsiyaga qarshi kurashish sohasida qanday muammolar mavjud va ochiq maʼlumotlar yordamida qanday yechimlar topildi?” (spiker — Davlat organlari va tashkilotlarining faoliyati ochiqligini ta’minlash boʻlimi bosh inspektori Qahramon Niyozxadjayev).

Har bir vebinarda 40 tadan 50 tagacha ishtirokchi qatnashdi.

Vorkshop Toshkent Davlat Iqtisodiyot Universiteti (TDIU)da bo‘lib o‘tdi. Tadbirga 80 ga yaqin kishi tashrif  buyurdi. Spikerlar “Elektron hukumat loyihalarini boshqarish Markazi” davlat muassasasining Loyihaviy-texnik hujjatlar ekspertizasi bo‘limi boshlig‘i Maqsumov Doniyor hamda “MODME”  texnik direktori va hammuassisi Ruslan Yuldashev ishtirok etdilar. Ular ochiq maʼlumotlarni misollarda aniq koʻrsatdilar va soʻzlab berdilar.

Xakaton 27–29-yanvar kunlari AKFA universitetida boʻlib oʻtadi. Eslatib oʻtamiz, “Open Data Challenge” xakatoni IT Park tomonidan YXHTning Oʻzbekistondagi loyihalari koordinatori va Virtual Group IT kompaniyasi bilan hamkorlikda Oʻzbekiston Respublikasi Prezidenti huzuridagi Statistika Agentligi, Korrupsiyaga qarshi kurashish Agentligi va Akfa University koʻmagida tashkil etilmoqda. Shuningdek, “Uzum”, “Geoalert”, “GDG” va boshqa tashkilotlarning ekspertlari mentor sifatida taklif qilingan.

Bugungi kunga qadar 281 ta jamoa qatnashish uchun roʻyxatdan oʻtgan (har bir jamoada 1-3 kishigacha).  Eng faol Toshkent shahri bo‘ldi – 141 ta ariza, keyingi o‘rinda esa Toshkent viloyati – 34 ta ariza. Boshqa viloyatlar kontekstida ko‘rsatkichlar quyidagicha taqsimlandi:

•  Andijon viloyati – 17 ta
•  Buxoro viloyati – 5 ta
•  Jizzax viloyati – 7 ta
•  Qashqadaryo viloyati – 19 ta
•  Navoiy viloyati – 3 ta
•  Namangan viloyati – 11 ta
•  Qoraqalpog‘iston Respublikasi – 7 ta
•  Samarqand viloyati – 12 ta
•  Surxondaryo viloyati – 5 ta
•  Sirdaryo viloyati – 10 ta
•  Farg‘ona viloyati – 9 ta
•  Xorazm viloyati – 1 ta

Yoʻnalishlar boʻyicha arizalar quyidagicha taqsimlandi:

• Davlat sektori (44 ta ariza)
• Ijtimoiy sektor (100 ta ariza)
• Biznes sektori (110 ta ariza)
• Korrupsiyaga qarshi kurash (27 ta ariza)

Roʻyxatdan oʻtgan ishtirokchilarning oʻrtacha yoshi 22 yoshni tashkil etdi.