President Tech Award 2024: Yakuniy bosqichlar va o‘tkazilish sanalari

2024-yil 1-7-dekabr kunlari O‘zbekistonda texnologiyalar va innovatsiyalar dunyosidagi eng muhim voqealardan biri bo‘lgan “President Tech Award 2024” Demo-kuni bo‘lib o‘tadi. Mamlakatning eng yaxshi startap jamoalari o‘z loyihalarini taqdim etib, nufuzli tanlovning g‘olibi bo‘lish imkoniyati uchun bellashadi.

“Demo Day” bosqichlari

2024-yil 1-dekabr — Birinchi bosqich: Mentorlik sessiyalari

Mentorlik sessiyalari davomida jamoalar o‘z loyihalari haqida batafsilroq ma’lumot berishadi. Bu baholash komissiyasiga Demo-kunidan oldin har bir loyiha haqida to‘liqroq tasavvurga ega bo‘lish imkonini beradi, natijada yanada samarali fikr bildirish va baholash mumkin bo‘ladi. Har bir jamoa yo‘nalishiga qarab mentor bilan vaqt belgilashi kerak bo‘ladi, bron qilish bo‘yicha batafsil ma’lumotlar birinchi bosqich sanasiga yaqinroq yuboriladi.

2024-yil 2-dekabr — Ikkinchi bosqich: Demo Day

Demo-kunning ikkinchi bosqichi onlayn baholashdan muvaffaqiyatli o‘tgan 50 dan ortiq jamoa ishtirokida boshlanadi. Ushbu jamoalar texnologiyalar kelajagiga o‘ziga xos qarashni taqdim etib, turli yo‘nalishlar bo‘yicha innovatsion loyihalarini namoyish etadilar. Loyihalarni baholash mezonlari tanlangan yo‘nalishga qarab belgilanadi, shuningdek, mezonlar haqidagi batafsil ma’lumotlarni tez orada ulashamiz. Ushbu bosqich natijalariga ko‘ra, eng yaxshi 15 ta jamoa (har bir yo‘nalishda 3 tadan) tanlab olinadi, ular mahsulotning ishlash qobiliyatini aniqlash uchun uchinchi “Fact Checking” bosqichidan o‘tishlari kerak bo‘ladi.

2024-yil 3-4-dekabr — Uchinchi bosqich: “Fact Checking”

“Fact Checking” deb nomlangan uchinchi bosqich 3-4-dekabr kunlari o‘tkaziladi. Mazkur bosqichda hakamlar hay’ati loyihalarning ishlash qobiliyati va kod sifatiga alohida e’tibor qaratgan holda ularni har tomonlama tekshiradi. Ushbu bosqich natijalariga ko‘ra, eng yaxshi 15 ta jamoa (har bir yo‘nalishda 3 tadan) saralab olinadi va ular finalda o‘z ishtirokini davom ettiradi. Agar ikkinchi bosqichda tanlab olingan jamoa ushbu tekshiruvdan o‘tmasa, ball to‘plagan loyihalar soni bo‘yicha keyingi o‘rinlardagi jamoalar tanlab olinadi va ko‘rib chiqiladi.

2024-yil 5-6-dekabr — To‘rtinchi bosqich: “Pitch Polish Session”

Ikkinchi bosqichdan o‘tgan finalchilar uchun “Pitch Polish Session” maxsus trening-sessiyasi tashkil etiladi. Ushbu butkemp jamoalarga taqdimot ko‘nikmalarini oshirish, ekspertlardan qimmatli maslahatlar olish va yakuniy taqdimotga tayyorgarlik ko‘rish imkoniyatini beradi.

2024-yil 7-dekabr — Final

Hal qiluvchi kun, 7-dekabr kuni 15 nafar finalchi xalqaro hakamlar hay’ati oldida o‘z loyihalarini namoyish etib, yuqori sovrinli o‘rinlar uchun bellashadi. G‘oliblar tantanali ravishda e’lon qilinib, taqdirlanadilar, bunda yosh innovatorlarning mamlakat texnologik ekotizimini rivojlantirishga qo‘shgan hissasining ahamiyati ta’kidlanadi.

“President Tech Award 2024” — bu startaplar uchun xalqaro miqyosda o‘zini namoyon qilish, tomoshabinlar va tadbir mehmonlari uchun esa kelajakni shakllantiruvchi ilg‘or texnologik yechimlar bilan tanishish imkoniyatidir.