President Tech Award asosiy yoʻnalishlari boʻyicha onlayn tanlovning birinchi bosqichi natijalari

IT Park Plug and Play bilan birgalikda umumiy mukofot jamgʻarmasi $1 mln boʻlgan “President Tech Award” konkursining asosiy yoʻnalishlari boʻyicha onlayn tanlovning birinchi bosqichini yakunladi.

400 dan ortiq jamoalardan 106 tasi besh xil yoʻnalish boʻyicha tanlab olindi (jamoalar roʻyxati quyida keltirilgan):

• sunʼiy intellekt texnologiyalari — 16 ta jamoa
• ijtimoiy yoʻnalishdagi raqamli texnologiyalar — 37 ta jamoa
• axborot va kiberxavfsizlik texnologiyalari — 13 ta jamoa
• tadbirkorlik va moliyaviy texnologiyalar — 24 ta jamoa
• kompyuter va mobil oʻyin dasturlari — 16 ta jamoa

Jamoalar quyidagi asosiy mezonlar asosida tanlab olindi: minimal hayotiy mahsulot (MVP) yoki namoyish qiluvchi namuna mavjudligi, texnologik innovatsiyalar darajasi, tijorat salohiyati va jamoaning malakasi.

Tanlovdan oʻta olmagan jamoalar bir hafta ichida “Plug and Play” ekspertlarining fikr-mulohazalarini olishadi, bu esa ularga oʻz loyihalarini yaxshilash va kelgusi yilda qayta ariza topshirish imkoniyatini beradi.

Tanlovdan oʻtgan jamoalar 4-noyabrgacha ingliz tilida uch daqiqalik videorolik tayyorlab, taqdim etishlari kerak. Video mahsulot namoyishi, jamoani tanishtirish va biznes modelini tushuntirishni oʻz ichiga olishi kerak. Bu “Plug and Play” ekspertlariga loyihalarni yanada chuqurroq baholash va har bir yoʻnalish boʻyicha eng yaxshi 10 ta jamoani aniqlash imkonini beradi.

Ushbu bosqichda startaplarni baholash quyidagi mezonlarga asoslanadi: mahsulot innovatsiyasi (30%), loyiha salohiyati (25%), biznes modelining ravshanligi va loyihaning miqyosi (25%), shuningdek, jamoa tajribasi (20%).

Hakamlar hayʼati startaplarni har bir yoʻnalish boʻyicha 10 balli shkala boʻyicha baholaydi, soʻngra ballar mezonning ahamiyatlilik koeffitsiyentiga koʻpaytiriladi. Oʻrtacha ball startapning yakuniy natijasini belgilaydi.

“Plug and Play” ekspertlari tomonidan oʻtkazilgan chuqurroq tekshiruv natijalariga koʻra, beshta yoʻnalishning har biridan 10 ta jamoa tanlab olinadi va ular oʻzlarining startaplarini “Demo Day” kuni “Plug and Play” mutaxassislari oldida namoyish etadilar.