Ruminiyaning IT-kompaniyalari va IT Park Uzbekistan kengayish va hamkorlik imkoniyatlarini muhokama qilishdi

Ruminiyaga xizmat safari doirasida IT Park Uzbekistan bosh direktori Farhod Ibragimov boshchiligidagi delegatsiya Buxarestda bir qator uchrashuvlar o‘tkazdi. “Endava”, “UiPath” va “Tremend Software Consulting” kabi kompaniyalar vakillari bilan muzokaralar amalga oshirildi.

Uchrashuvlar davomida tomonlar O‘zbekistonda dasturiy ta’minot ishlab chiqarish markazini tashkil etish va qo‘shma loyihalarni yo‘lga qo‘yish imkoniyatlari muhokama qilib, mamlakat IT sohasining istiqbollari ko‘rsatib o‘tildi. O‘zbekistonning rivojlanib borayotgan mintaqaviy IT-ishlanmalar markazi sifatidagi salohiyatiga, jumladan, biznes yuritish uchun qulay sharoitlar, davlat tomonidan qo‘llab-quvvatlash va malakali mutaxassislardan foydalanish imkoniyatiga alohida e’tibor qaratildi.

Endava

“Endava” bilan uchrashuvda texnologiya sohasida 21 yildan ortiq tajribaga ega bo‘lgan va kompaniyaning global kengayishida muhim rol o‘ynagan Joylashuv strategiyasi va yetkazib berish bo‘yicha direktor Radu Grosu alohida ishtirok etdi. IT Park Uzbekistan delegatsiyasi O‘zbekistonning yutuqlari va raqamli infratuzilmaning rivojlanishini ta’kidlab, mamlakatning yuqori malakali mutaxassislarni jalb qilish va raqamli xizmatlar sohasini mustahkamlash borasidagi sa’y-harakatlarini qayd etdi. Shuningdek, O‘zbekistonning mintaqadagi texnologiya markaziga aylanish va xalqaro hamkorlik uchun qulay muhit yaratish imkoniyatlari muhokama qilindi.

Tomonlar ko‘p tilli kadrlarga, ayniqsa, ingliz tilini yuqori darajada biladigan (B2 va undan yuqori daraja) mutaxassislarga bo‘lgan talabning ortib borayotganini muhokama qildilar. Uchrashuvda intellektual mulkni (IM) himoya qilish mavzusi ham muhim o‘rin egalladi: IT Park Uzbekistan delegatsiyasi intellektual mulk himoyasi uchun huquqiy bazani mustahkamlashda erishilgan yutuqlarni namoyish etdi. O‘zbekistonning qulay vaqt mintaqasi strategik ustunlik sifatida e’tirof etildi, chunki bu qulay geografik joylashuv tufayli bir vaqtning o‘zida bir nechta hududlardagi mijozlarga samarali xizmat ko‘rsatishga imkon beradi. Ushbu yutuqlar O‘zbekistonning IT sohasida uzoq muddatli xorijiy investitsiyalar va hamkorlik uchun ishonchli va qo‘llab-quvvatlovchi muhit yaratishga sodiqligini tasdiqlaydi.

Tomonlar O‘zbekistonning IT-sektorini mustahkamlaydigan va hamkorlik uchun qo‘shimcha imkoniyatlar yaratadigan barqaror sheriklikni yo‘lga qo‘yish maqsadida muloqotni davom ettirishga tayyor ekanliklarini bildirdilar.

“Endava” — raqamli transformatsiya, moslashuvchan dasturiy ta’minot ishlab chiqish va IT-xizmatlar bilan shug‘ullanadigan texnologik kompaniya. Kompaniya moliya, sug‘urta, telekommunikatsiya va chakana savdo sohalari uchun yechimlar taqdim etadi. Autsorsingning asosiy yo‘nalishlari moliyaviy kompaniyalar va to‘lov tizimlari hisoblanadi. “Endava” butun dunyo bo‘ylab 12 000 nafardan ortiq mutaxassisga ega bo‘lib, 65 mamlakatda faoliyat yuritadi va kompaniyaning 2023-yildagi umumiy daromadi 860 million dollarni tashkil etdi.

UiPath

Uchrashuvda “UiPath” kompaniyasining asosiy vakillari, jumladan Ruminiya va Moldova bo‘yicha mintaqaviy vitse-prezident Tudor Kosechanu ishtirok etdi. Korporativ dasturiy ta’minot va IT-xizmatlar bo‘yicha tajribali rahbar Tudor “UiPath” kompaniyasining sun’iy intellektga asoslangan avtomatlashtirish sohasidagi so‘nggi yutuqlarini taqdim etdi. Bu yutuqlar ham xususiy, ham davlat tashkilotlariga odatiy jarayonlarni optimallashtirish imkonini beradi.

Muhokama mamlakat texnologik rivojlanishiga turtki berishi mumkin bo‘lgan jarayonlarni robotlashtirish (RPA) sohasida “UiPath” yechimlarini joriy etish uchun O‘zbekistonning mahalliy kompaniyalari bilan hamkorlik qilish imkoniyatlariga qaratildi. Shuningdek, ilg‘or avtomatlashtirish texnologiyalarini joriy etish va RPA sohasida hamkorlik qilish uchun yangi imkoniyatlar yaratish orqali O‘zbekistonning raqamli infratuzilmasini yaxshilashga imkon beradigan Toshkentda “UiPath” ishlab chiqarish markazini tashkil etish istiqbollari ko‘rib chiqildi. Bunday hamkorlik O‘zbekistonda IT sohasidagi iste’dodlarni rivojlantirishga sezilarli ta’sir ko‘rsatadi, mutaxassislarga talab yuqori bo‘lgan avtomatlashtirish ko‘nikmalarini taqdim etadi va mamlakatning istiqbolli mintaqaviy raqamli innovatsiyalar markazi sifatidagi mavqeyini mustahkamlaydi.

2005-yilda Ruminiyada tashkil etilgan va bosh qarorgohi Nyu-Yorkda joylashgan “UiPath” robotlashtirilgan jarayonlarni avtomatlashtirish (RPA) sohasida jahon yetakchisi hisoblanadi. Dunyo bo‘ylab 4000 dan ortiq xodimga ega bo‘lgan “UiPath” sun’iy intellektga asoslangan platforma moliya, sog‘liqni saqlash va telekommunikatsiya kabi sohalarda mijozlar uchun takrorlanuvchi vazifalarni avtomatlashtirish orqali ish jarayonlarini optimallashtiradi. 2023-yilda kompaniyaning daromadi 1,059 milliard dollarni tashkil etib, Shimoliy Amerika, Yevropa va boshqa mintaqalar bozorlarida o‘zining mustahkam ishtirokini tasdiqladi.

Tremend Software

Yaqinda IT Park Uzbekistan va “Tremend Software Consulting” vakillari o‘rtasidagi uchrashuvda O‘zbekistonning autsorsing uchun yangi strategik markaz sifatidagi salohiyati muhokama qilindi. Bosh ofisi Buxarestda (Ruminiya) joylashgan va “Publicis Sapient” tarkibiga kiruvchi yetakchi dasturiy ta’minot ishlab chiqaruvchi bo‘lgan “Tremend Software” turli sohalarda, jumladan, bank ishi, telekommunikatsiya, avtomobilsozlik va chakana savdo yo‘nalishlarida raqamli transformatsiyalashga ixtisoslashgan.

IT Park Uzbekistan bosh direktori Farhod Ibragimov boshchiligidagi delegatsiya O‘zbekistonning IT-infratuzilmani yaratish sohasidagi yutuqlari hamda biznes va investitsiyalar uchun mavjud qulay muhitni taqdim etdi. Uchrashuvda O‘zbekiston IT-mutaxassislari bozorining taniqli autsorsing markazlari bilan qiyosiy tahlili o‘tkazilib, mavjud muhandislar soni, ish haqi va raqobatbardoshlik darajasiga alohida e’tibor qaratildi. Shuningdek, O‘zbekistondagi qulay viza siyosati va siyosiy barqarorlik mamlakatni xorijiy investitsiyalar va yuqori malakali mutaxassislar uchun jozibador yo‘nalishga aylantirayotgani ta’kidlandi.

“Tremend Software” tomonidan uchrashuvga dasturiy ta’minotni ishlab chiqish sohasida jarayonlarni optimallashtirish bo‘yicha 20 yildan ortiq tajribaga ega bo‘lgan jarayonlar bo‘yicha vitse-prezident Den Dornyanu boshchilik qildi. Dornyanu kompaniyaning boshqa bozorlardagi tajribasiga asoslanib, o‘z faoliyatini kengaytirish uchun “Tremend” kompaniyasining mezonlari bilan o‘rtoqlashdi. 

Muloqotda O‘zbekistonning strategik o‘sish markazi sifatidagi salohiyati ta’kidlandi va tomonlar dasturiy ta’minot va texnologik innovatsiyalar sohasidagi hamkorlik istiqbollarini muhokama qildilar. “Tremend Software” O‘zbekistonning bozor dinamikasi, kadrlar zaxirasi va ishbilarmonlik muhitini kengroq o‘rganishga tayyorligini bildirdi va uning salohiyatini chuqurroq baholash maqsadida qo‘shimcha tadqiqotlar o‘tkazish rejalarini bildirdi.

“Tremend” — “Publicis Sapient” global dasturiy ta’minot markazi, raqamli transformatsiya uchun innovatsion yechimlarga ixtisoslashgan. 2005-yilda tashkil etilgan kompaniya “ING” va “Carrefour” kabi yirik mijozlar bilan hamkorlikda bank sektori, telekommunikatsiya, avtomobilsozlik va chakana savdo bo‘yicha loyihalarni amalga oshirgan. “Tremend” tarkibida butun dunyo bo‘ylab 20 ta ofisda 5000 nafardan ortiq xodim mehnat qiladi va yillik daromadi taxminan 500 million dollarni tashkil qiladi.

Ruminiyadagi uchrashuvlar Yevropaning yetakchi IT-kompaniyalari bilan hamkorlik aloqalarini mustahkamlashda muhim qadam bo‘ldi. Muzokaralar davomida O‘zbekiston IT-sektorini rivojlantirish, yuqori malakali mutaxassislar uchun ish o‘rinlarini yaratish va uning raqobatbardosh IT-xizmatlar markazi sifatidagi mavqeyini mustahkamlashga xizmat qiladigan qo‘shma loyihalarga asos solindi va yanada yaqin hamkorlik qilish uchun imkoniyatlar yaratildi. O‘zbekistonning global texnologik ekotizimga yanada integratsiyalashuvi bilan mazkur hamkorlik uning autsorsing va innovatsiyalar yo‘nalishi sifatidagi jozibadorligini oshiradi, barqaror o‘sishni rag‘batlantiradi va mamlakatning xalqaro IT-sahnadagi rolini kengaytiradi.