Texnik sharh: Nokia smartfonlari va Appleʼning uzoq kutilgan yangi mahsulotlari
Texnik sharhning yangi sonida Nokia smartfonlari, AirPods uchun yangi dasturiy taʼminot va Apple yangi mahsulotlarining Wonderlust nomli yillik taqdimotida qanday gadjetlarni taqdim etgani haqida gapiramiz.
- Nokia telefonlari ishlab chiqaruvchisi oʻz smartfon brendini ishga tushirmoqda
Nokia brendi ostida smartfonlar ishlab chiqarish bilan mashhur boʻlgan Finlyandiyaning HMD Global kompaniyasi oʻzining mobil qurilmalar liniyasini ishga tushirish rejalarini eʼlon qildi. Kompaniya oʻz portfelini Nokia telefonlari bilan birgalikda mavjud boʻladigan yangi HMD brendi bilan kengaytiradi.
HMD tomonidan ishlab chiqarilgan Nokia telefonlari asosan oʻrta va byudjet narx toifalariga tegishli boʻladi. Koʻrinishidan, kompaniya kelajakdagi HMD smartfonlarini ham isteʼmolchilar uchun hamyonboplikni hisobga olgan holda ishlab chiqaradi.
Eslatib oʻtamiz, HMD Global kompaniyasi Microsoft 2016-yilda Nokia brendidan voz kechganidan soʻng yaratilgan. Hozirda uning asosiy egasi Foxconn asoschisi Terri Gou hisoblanadi.
Nokia brendi ostidagi qurilmalar hozirda Foxconn tomonidan ishlab chiqariladi va HMD brendining yaratilish jarayonidagi mahsulotlari ham Tayvan texnologiya giganti tomonidan ishlab chiqarilishi mumkin.
- AirPods uchun iOS 17 bilan mos keladigan yangi dasturiy taʼminotlar chiqarildi
Apple AirPods, AirPods Pro va AirPods Max uchun 6-versiya dasturiy taʼminotlarini chiqardi.
Eng katta funksiyalar toʻplami 6A301 dasturiy taʼminotiga ega AirPods Pro 2ʼda boʻlishi kutilmoqda. Roʻyxatga shovqinni bekor qiluvchi adaptiv audio, qoʻngʻiroqlarni kuzatish va ovoz balandligini personallashtirish funksiyalari kiradi.
AirPods Pro, AirPods 2, AirPods 3 va AirPods Max qurilmalari 6A300 raqamli dasturiy taʼminotni olishdi. Ular qoʻngʻiroq ovozini oʻchirish yoki yoqish tugmachasi, shuningdek avtomatik almashtirishning yaxshilanishini taklif qilishmoqda.
Yangi dasturiy taʼminot AirPods zaryadlash qutisida va iOS qurilmasiga ulangan paytda avtomatik ravishda oʻrnatiladi.
- Apple yangi gadjetlarini taqdim etdi
12-sentyabr kuni Apple yangi gadjetlarining yillik taqdimoti boʻlib oʻtdi. Kompaniya namoyishni Apple Watch 9 soati bilan boshladi. Qurilma tezlashdi va yangi U2 chipi bilan jihozlangan.
Soat bir qoʻl bilan boshqarish uchun Double Tap, ovozli buyruqlarni yaxshiroq aniqlash va Siriʼni “Salomatlik” ilovasi bilan integratsiyalash funksiyasiga ega.
Series 9, shuningdek, Name Drop funksiyasini qoʻllab-quvvatlaydi, bu orqali gadjetlarni bir-biriga yaqinlashtirish orqali boshqa soat egasi bilan aloqa maʼlumotlarini almashish mumkin boʻladi.
Bu Apple kompaniyasining birinchi toʻliq uglerodsiz mahsulotidir. Kompaniya kamarlarni yaratish uchun teridan voz kechdi va qadoqni qisqartirdi.
Taqdimotda Apple yangi iPhone 15 ni ham taqdim etdi. Smartfon yangilangan kamera va 14 Pro modelidagi kabi Dynamic Island maydoniga ega. Bundan tashqari, u birinchi marta USB-C uyasi bilan jihozlangan.
Asosiy yangilanish takomillashtirilgan kameralar tizimi boʻldi. Endilikda asosiy kamera sensori 48 megapikselli. Kompaniya “Tungi rejim”, “Live Photos” va “Harakat rejimi” da yaxshilanishlarni amalga oshirdi.
Yaratuvchilarning soʻzlariga koʻra, smartfon katta hajmli batareya tufayli “kun boʻyi quvvatlanmasdan ishlaydi”. Shuningdek, u MagSafe simsiz zaryadlash va USB-C orqali simli quloqchinlarni qoʻllab-quvvatlaydi.
Yanada kuchliroq va qimmat iPhone 15 Pro va iPhone 15 Pro Max modellari beshinchi darajali titandan foydalangan holda yaratilgan. Kompaniya ushbu yangilik telefonni yengilroq va mustahkamroq qilishiga vaʼda berdi.
Ikkala smartfon ham ProMotion funksiyasiga ega Super Retina XDR displeylariga ega boʻlib, Always-on-Display va iOS 17 da yangi kutish rejimini qoʻllab-quvvatlaydi. Nofaol rejimda smartfon ekranida interaktiv vidjetlar, ovozli pochta va boshqalar koʻrsatiladi.
iPhone 15 Pro ning chap tomonidagi ovozsiz rejim kaliti oʻrnini bosuvchi harakat tugmasi yorliqlarni ishga tushirish, maxsus xususiyatlarni chaqirish, kamerani ochish, chiroqni yoqish va boshqa koʻplab harakatlar uchun sozlanishi mumkin.
Smartfon kameralari asosiy modelga oʻxshash tarzda yaxshilandi.
2023-09-15