TIPS konferensiyasida IT Park Koreya startaplari va investorlari uchun imkoniyatlar ochmoqda

IT Park’ning Koreyadagi vakili Nodirbek Berdikobilov Koreya biznes farishtalari uyushmasi tomonidan tashkil etilgan “TIPS Advanced Management Program” xalqaro konferensiyasida ishtirok etdi. Tadbirda 40 dan ortiq investor va top-menejer, shuningdek, kengayish va investitsiya jalb qilishdan manfaatdor 12 ta IT-kompaniya qatnashdi.

Nodirbek Berdikobilov O‘zbekistonda texnologik startaplar va investorlar uchun yaratilayotgan imkoniyatlarni batafsil tushuntirdi. U o‘z ma’ruzasida mamlakatning tez sur’atda rivojlanayotgan IT-sektori, investitsiyalar uchun qulay sharoitlar va IT Park tomonidan innovatsion loyihalarni rivojlantirish uchun ko‘rsatilayotgan yordam haqida to‘xtalib o‘tdi.

Bu nima uchun muhim?

Yangi aloqalar va hamkorliklar o‘rnatish

Konferensiya davomida “Kookmin Bank”, “Oion”, “Pando Platform”, “Interact”, “YYSoft”, “Pen Ventures”, “OCO”, “Flexarmour”, “MyLink” kabi bir qator yetakchi xalqaro kompaniyalar bilan muhim ishbilarmonlik aloqalari o‘rnatildi. Barcha ishtirokchilar muzokaralarni davom ettirish hamda birgalikda rivojlanish va hamkorlik yo‘llarini izlashga qiziqish bildirdilar. Bundan tashqari, kompaniyalar vakillari IT Park’ning Koreya bozoridagi faol ishini alohida ta’kidlab o‘tdilar.

O‘zbekiston — innovatsiyalar va investitsiyalar markazi

IT Park vakili O‘zbekistonning texnologik kompaniyalar uchun strategik jihatdan muhim bozor ekanligini, qulay sharoitlarda biznesni kengaytirish va yuritish uchun katta imkoniyatlar mavjudligini ta’kidladi. O‘zbekiston startaplarni qo‘llab-quvvatlash va IT-kompaniyalarga yordam berish uchun infratuzilmani jadal rivojlantirmoqda, bu esa xalqaro investorlarga biznes jarayonlarini optimallashtirish va yangi bozorlarga chiqish uchun yangi istiqbollar ochmoqda.

“TIPS Advanced Management Program” konferensiyasi IT Park’ning Koreyadagi vakili va xalqaro investorlar o‘rtasida tajriba almashish, aloqalar o‘rnatish va hamkorlik munosabatlarini shakllantirish uchun muhim platformaga aylandi. IT Park O‘zbekistonda texnologik tadbirkorlikni rivojlantirish va xorijiy investitsiyalarni jalb qilishga ko‘maklashish maqsadida bunday tadbirlarda faol ishtirok etishni davom ettiradi. Bu esa, o‘z navbatida, mamlakatimizning xalqaro miqyosdagi obro‘sini oshirish, yangi kompaniyalarni jalb qilish va vatandoshlarimiz uchun ish o‘rinlari yaratishga xizmat qilmoqda.