Toshkentda “ICT Week” doirasida “Startup & Venture Summit” o‘tkaziladi

2025-yil 25-sentyabr kuni Toshkentda “ICT Week” haftaligi doirasida 500 dan ortiq ishtirokchini birlashtiruvchi “Startup & Venture Summit” start oladi. Ushbu forum startaplar, venchur fondlari, akseleratorlar, davlat tuzilmalari va startap hamda venchur ekotizimining boshqa muhim ishtirokchilarini bir joyga jamlaydi. Sammit Markaziy Osiyoga qiziqish bildirgan xalqaro fondlar, strategik hamkorlar va korporatsiyalar bilan hamkorlik qilish uchun yangi imkoniyatlar yaratadi va o‘zbek startaplarining jahon innovatsion ekotizimiga yanada chuqurroq integratsiyasiga turtki bo‘ladi. Tadbirni tashkil etishda “Plug and Play” kompaniyasi hamkorlik qilmoqda.

Startup & Venture Summit — Markaziy Osiyo venchur olami va startap ekotizimining asosiy uchrashuv nuqtasidir. Sammit mintaqaning rivojlanish sur’atini namoyish etish, yangi hamkorlik aloqalarini o‘rnatish va global investorlarning e’tiborini O‘zbekiston hamda qo‘shni mamlakatlar imkoniyatlariga jalb qilishga qaratilgan. Bu yerda startaplar xalqaro bozorlarga chiqish uchun qo‘llab-quvvatlanadi, venchur fondlari esa o‘zlari uchun noyob salohiyatga ega jadal rivojlanayotgan bozorni kashf etadi.

“Startup & Venture Summit” dasturi startaplarni kengaytirish va venchur kapitalini rivojlantirish, o‘zbekistonlik startap asoschilarining xorijdagi muvaffaqiyat tarixi hamda investorlarning Markaziy Osiyo salohiyatiga bo‘lgan qarashlari haqidagi ma’ruza va munozaralarni o‘z ichiga oladi. Tasdiqlangan ma’ruzachilar orasida — “Dealroom.co” asoschisi va bosh direktori Yoram Veyngaarde, “Plug and Play Tech Center” (Germaniya) korporativ aloqalar bo‘yicha direktori Alfredo Gomez Soria, “Purple Ventures” (Chexiya) hamkori Yan Davidek, “StartX” (AQSh) biznesni rivojlantirish va hamkorlik bo‘limi rahbari Darsh Singx Mann, “Doha Tech Angels” (Qatar) boshqaruvchi direktori Sara Daniel va boshqalar bor.

Tadbir netvorking va B2B-uchrashuvlari bilan yakunlanadi. Bu yerda ishtirokchilar yangi hamkorlar topishi va xalqaro ekspertlardan mentorlik yordamini olishi mumkin.

Sammit O‘zbekiston uchun milliy startap ekotizimini global maydonda ilgari surish yo‘lidagi muhim qadam bo‘ladi. U mamlakatning investitsion salohiyatini namoyish etish, o‘zbekistonlik asoschilarning haqiqiy muvaffaqiyat tarixlarini ko‘rsatish, shuningdek, venchur kapitali uchun bozorning jozibadorligini ta’kidlash imkonini beradi.

Jonli efir onlayn tarzda namoyish etiladi.

Ishtirok etish uchun ro‘yxatdan o‘tish: https://outsource.gov.uz/en/events/ict-week-2025