Toshkentda Startup Summit boʻlib oʻtdi

ICTWEEK UZBEKISTAN 2023 haftaligining birinchi kuni, 24-oktabrda poytaxtda Startup Summit bo‘lib o‘tdi.

Sammitdan ko‘zlangan maqsad - mehmonlarni O‘zbekiston startap ekotizimlari, mintaqadagi eng yaxshi startaplar, investorlar va innovatsion kompaniyalar bilan tanishtirishdan iborat.

Tadbirni O‘zbekiston raqamli texnologiyalar vaziri Sherzod Shermatov tabrik so‘zi bilan ochib berdi.

Shundan so'ng YeTTBning O‘zbekistondagi rahbari Andi Aranitasi va "Plug and Play" kompaniyasining boshqaruvchi direktori Sasha Karimpur so‘zga chiqdilar.

Andi Aranitasi O‘zbekistonda "Star Venture" dasturining ishga tushirilishi haqida gapirdi. YeTTB'ning ushbu dasturi istiqbolli innovatsion startaplarni aniqlash, ularga tajriba va moliyalashtirish imkoniyatini taqdim etishga qaratilgan. Loyiha strategiya, moliya, operatsiyalar, tashkil etish, marketing va sotish kabi turli jihatlar bo‘yicha maslahatlar berib, startaplarga o‘z bizneslarini rivojlantirishga yordam beradi.

Sasha Karimpur hozirda uning kompaniyasi O‘zbekistondagi faoliyatini kengaytirish va mahalliy startap ekotizimini rivojlantirishga e’tibor qaratayotganini ta’kidladi.

“Plug and Play Uzbekistan uchta asosiy maqsadni ko‘zlaydi:

Birinchidan, bu mintaqani innovatsiyalar va startaplar markaziga aylantirmoqda. Ikkinchi maqsad - mahalliy startaplarga jahon darajasidagi mavqega erishish va global bozorda ko‘tarilishda yordam berish. Uchinchisi esa, O‘zbekistonga jahonning eng yaxshi texnologiyalarini olib kirish bo‘lib, bu mahalliy kompaniyalarga ish jarayonlarini yangilash,  eng yaxshi ishlab chiqarish quvvatlarini ta’minlash, marketingni yaxshilash va jahon miqyosida raqobatbardoshlik qobiliyatini oshirishga yordam beradi”.

Sessiyada IT Park Uzbekistan startap ekotizimlarini rivojlantirish bo‘limi rahbari Jahongir Kagirov IT sohasida startaplar, investorlar va hamkorlarni birlashtirgan "Startap Base" platformasi ishga tushirilishi haqida ma’lum qildi.

 

Tadbir doirasida ikkita panel muhokamasi bo‘lib o‘tdi. Birinchisi -  “O‘zbekiston startap ekotizimining ochilishi: venchur kapitalni jalb qilish va global miqyosni kengaytirish” mavzusida bo‘ldi. Moderator "Silk Road Innovation Hub" asoschisi Asset Abdualiev bo‘ldi va muhokamada quyidagi spikerlar ishtirok etdi:

• Jorj Xeld — "Veon AdTech" bosh direktori;
• Sasha Karimpur — "Plug and Play" kompaniyasining boshqaruvchi direktori;
• Aleksandr Lixtman — "ITCOMMS" asoschisi;
• Pedro Vieira — "500 Global" kompaniyasining boshqaruvchi hamkori.

“Markaziy Osiyoning rivojlanayotgan raqamli bozori” mavzusidagi ikkinchi panel muhokamasining moderatori Markaziy Osiyo sun’iy intellekt assotsiatsiyasi hammuassisi va raisi Vladimir Norov bo‘ldi.

Ma'ruzachilar qatorida:

• Madi Tajikenov — "Astana Hub" xalqaro aloqalar va investitsiyalar boshqarmasi direktori;
• Chubak Temirov — Qirg‘iziston Oliy texnologiyalar parki bosh direktori;
• Abdulahad Kuchkarov — IT Park Uzbekistan ijrochi direktori.

Tadbirda xorijdan taklif etilgan mutaxassislar taqdimotlari o‘tkazildi. Xususan:

• "Sturgeon Capital" kompaniyasi hamkori va rahbari Robin Butler -  “O‘zbekistonda venchur ekotizimining 10 yillik imkoniyatlari” haqidagi ma’ruza bilan;
• YeTTBning O‘zbekistondagi bosh menejeri Sherzod Akbarov tomonidan muhokama qilinadigan YeTTB Star Venture dasturi;
• "Sturgeon Capital" venchur hamkori Stеfen Lin  - "Sturgeon Capital" kompaniyasining Swift Launch dasturi;
• Alliance-Tech.eu ijrochi direktori Adrien Henni -  Markaziy Osiyo startap va venchur sektorining xalqaro bahosi mavzusida taqdimot o'tkazdi.

Sammit xalqaro venchur fondlar va mahalliy startaplar vakillari o‘rtasidagi F2F uchrashuvlar bilan yakunlandi.