“Alchemist Accelerator” va IT Park Uzbekistan 2025-yilgi akseleratsiya dasturi doirasida hamkorlikni muhokama qildi

San-Fransiskodagi “Alchemist Accelerator” shtab-kvartirasida IT Park Uzbekistan’ning IT-xizmatlar eksportini rivojlantirish bo‘limi boshlig‘i Jahongir Kagirov AQShning yetakchi akseleratori — “Alchemist Accelerator” vakili, katta direktor Kristi Kanida bilan uchrashdi.

Uchrashuvning asosiy mavzusi “Central Asian Innovative Hubs” tashabbusi doirasida 2025-yil iyun oyiga mo‘ljallangan akseleratsiya dasturi bo‘yicha ehtimoliy hamkorlikni muhokama qilish bo‘ldi.

Dastur va hamkorlik haqida

2012-yilda San-Fransiskoda tashkil etilgan “Alchemist Accelerator” korporativ yechimlarga va biznes uchun texnologiyalarni, jumladan SaaS va IT-mahsulotlarni ishlab chiqishga yo‘naltirilgan startaplarni qo‘llab-quvvatlashga ixtisoslashgan yetakchi akseleratorlardan biridir. “Alchemist Accelerator” dasturi olti oy davom etadi va murabbiylik ko‘magi, moliyalashtirish hamda netvorking imkoniyatlarini taqdim etadi. Dastur bitiruvchilari orasida 600 dan ortiq startaplar mavjud bo‘lib, ularning ko‘pchiligi “Rigetti Computing” va “LaunchDarkly” kabi yirik venchur investitsiyalarini jalb qilgan.

Akseleratsiya dasturining navbatdagi bosqichi 2025-yil iyun oyida boshlanadi va korporativ yechimlar hamda IT-mahsulotlarga ixtisoslashgan Markaziy Osiyo startaplariga qaratiladi. Bu esa mintaqada startaplar va venchur investitsiyalari ekotizimini mustahkamlashga xizmat qiladi.

Hamkorlik va rivojlanish rejalari

Uchrashuv davomida O‘zbekistonga shunga o‘xshash akseleratorlarni jalb qilish istiqbollari, shuningdek, Markaziy Osiyo startaplariga qo‘shma sarmoya kiritish imkoniyatlari muhokama qilindi.

Kristi Kanida hozirda AQShda tezlashtirish dasturidan o‘tayotgan o‘zbekistonlik startaplarni yuqori baholadi. “Alchemist Accelerator” O‘zbekistondagi loyihalarni qo‘llab-quvvatlashga va mintaqadagi startap ekotizimini rivojlantirishga ko‘maklashishga tayyor ekanligini bildirdi.

“Alchemist Accelerator” dasturida ishtirok etish o‘zbekistonlik startaplarga o‘z mahsulotlarini tajribali mutaxassislar va mentorlar yordamida xalqaro darajada rivojlantirish, shuningdek, investorlar va korporativ hamkorlarning global tarmog‘iga kirish imkonini beradi. IT Park Uzbekistan va “Astana Hub”ning “Alchemist Accelerator” bilan hamkorligi mintaqa startaplarini global innovatsion ekotizimga qo‘shilishi yo‘lidagi muhim qadam bo‘ladi.